Ruuka 9 - INDAGANO INYA:YA

Yesu natuma abe:igisibwa bae

¹ Nabirikira abe:igisibwa bae ekumi na babiri aamwi, nabayana amanaga no buinga ku misambwa jo:ne, no kuosya amarwara.

² Nabatuma okura:sya obukama bwa Nyamuanga, no kuosya abarwae.

³ Nababwira ati, Mutagega ci:nu ca mu njira, amwi simbo, amwi rukoba, amwi biryo, amwi mpirya, amwi mutaba na kanju ebiri.

⁴ Na inyumba yone inu murengiragamo, mubega omwo, muso:kega omwo.

⁵ Na bo:ne banu bararemaga okubakuma, mbe wora mwaso:ka mu musi ugwo, muba-ku:kumurirega oruteri rwa mu bigere byemwe, rube rusingiro ku be:ne.

⁶ Mbe nibagenda nibe:singa mu misi jo:ne, nibasimura Ebigambo byo bwana, nibaosya ba:nu wo:ne wo:ne.

Okwitwa kwa Yoana Omubatija

⁷ Mbe omukama Erode nongwa jo:ne jinu jakorerwe. Ne:tima:ta okuba abandi bariga niba:ika ati, Yoana asu:kire mu bafu:ye.

⁸ Abandi ati, Eliya abonekere, na bandi ati, Oumwi ku baragi ba kara asu:kire.

⁹ Erode na:ika ati, Yoana anye namutemereko mutwe, ?nawe ka niga oyo unu enungwako emisango jiri kutya? Nayenja okumurora.

Aba:nu 5,000 nibari:sibwa

¹⁰ Mbe jintumwa wejire jasuba, nibamutondera byone binu bakorere. Nabagega nagenda nabo bwitebe mu musi gunu gwatogwaga Betesaida.

¹¹ Nawe ebise wejire byamenya nibimuru:ba. Nabaramira akondeywe, na:ika nabo emisango jo bukama bwa Nyamuanga, nabaosya banu bariga bakenere okuosibwa.

¹² Risu:ba wejire ryarengesa, abo rikumi na babiri nibamutako, nibamubwira ati, Ku:ra ebise bagende mu misi na mu nguyo ja ayei bama:me, babone ebiryo, okuba ciri mwibara anu.

¹³ Nababwira ati, Emwe mubayane ebiryo. Niba:ika ati, Citari na ci:nu tari mikate eta:nu na swi ibiri, tari cigende cibagurire aba:nu banu bo:ne ebiryo.

¹⁴ Okuba abarume bariga uti bisira bita:nu. Nabwira abe:igisibwa bae ati, Mubenyanje ngobo uti makumi gata:nuta:nu.

¹⁵ Nibakora kutyo nibabenyanja bo:ne.

¹⁶ Nagega emikate eta:nu na swi ibiri, narora inguru mu rwire, nasi:ma najibeganya, nayana abe:igisibwa bae okujitu:ra imbere ye bise.

¹⁷ Nibarya nibe:guta bo:ne. Nibaboja ebiba:ra binu byasigae nibe:jusya bi:bo ekumi na bibiri.

Petero natogora ati Yesu niwe Kristo

¹⁸ Mbe anu ariga acasabwa enyere, abe:igisibwa bae bari aamwi nage. Nababu:sya ati, ?Ebise ebintogaga?

¹⁹ Nibaindura ati, Yoana Omubatija, nawe abandi aba:ika ati, Eliya, na bandi ati, Oumwi ku baragi ba kara asu:kire.

²⁰ Nababu:sya ati, ?Nemwe omuntogaga? Petero naindura ati, Na:we Kristo wa Nyamuanga.

²¹ Omwene nabakomeresya nabaragirira ati, mwasiga kubwirako mu:nu omusango ogwo.

²² Na:ika ati, Kumwiire Omwana wo mu:nu okunya:sibwa byafu no kuremwa abakaruka na bagabisi abakuru na bandiki, no kwitwa, no kusu:ka ku rusiku rwa kasatu.

Ebyo kwitwika omusaraba

²³ Nabwira bo:ne ati, Omu:nu akenda okundu:ba, e:ganye omwene, e:twike omusaraba gwae ku:siku, andu:be.

²⁴ Okuba unu kenda okukisya obuanga bwae aribubusya, na unu wo:ne aribusya obuanga bwae kubwani, oyo aribukisya.

²⁵ ?Okuba omu:nu aribona muri:ro ki, akarya ca:ro co:ne ke:nu nafwirwamo omwoyo gwae?

²⁶ Okuba unu wo:ne kanjirira jinswaro anye ne misango jani, oyo no Mwana wo mu:nu arimujirira jinswaro, ariba:ja mwikusyo ryae, ne rya Esemwene, ne rya bamaraika abe:ru.

²⁷ Nawe enibabwira ati, Ni cimari bario banu bemereguyu anu, banu batariraba rufu, kukinga runu barirora obukama bwa Nyamuanga.

Okuinduka kwa Yesu

²⁸ Emisango ejo wejire jawa, nijiturao siku ita:nu ne:satu, nagega Petero na Yoana na Yakobo, narinya mu ci:ma okusabwa.

²⁹ Mbe anu ariga aca:sabwa, orususo rwo busu bwae niruinduka, ne cifwaro cae niciba ce:ru nice:ŋengeta.

³⁰ Mbe rora, ba:nu babiri niba:ika nage, nibo Musa na Eliya.

³¹ Nibaboneka mwikusyo, niba:ika ejo kufwa kwae kunu ariga najo:ku:misya mu Yerusalemi.

³² Mbe Petero na banu ariga:ri nabo bariga be:tirwe jintiro. Nawe wejire barafya, nibarora rikusyo ryae na ba:nu abo babiri bemereguyu aamwi nage.

³³ Mbe anu abo bariga nibajo:kwaukana nage, Petero nabwira Yesu ati, Ratabugenyi, ni kwa bwana eswe okuba anu. Cikore biuna bisatu, ecimwi cao, ne cimwi ca Musa, ne cimwi ca Eliya. Ariga atakumenya cinu ka:ika.

³⁴ Mbe anu ariga aca:ika ejo, eri:re niri:ja niribasirigisya. Wejire baburira mu ri:re nibo:baya.

³⁵ Riraka niriso:ka mu ri:re niryaika ati, Oyo niwe Omwana wani omusorwa, nimumungwe.

³⁶ Oburaka wejire bwamara okwaika, Yesu naboneka enyere:ra. Abe:ne nibajibira mu siku ijo, batabwiriye mu:nu musango na gumwi ku jinu barorere.

Yesu naosya omumura wo rusaro

³⁷ Mbe mwejo wejire baso:ka ku ci:ma, ecise cinene nicibonana nage.

³⁸ Mbe omu:nu wa mu cise na:ikirira inguru ati, Omwiigisya, enikuremberesya urore Omwana wani, okuba namwibuye umwi era.

³⁹ Rora omusambwa ogumugwata, narira aonao, nigumugaragasya nafukumba rifiro, nigumuso:kerako mamba, nigumukaraburakarabura.

⁴⁰ Anye namaremberesya abe:igisibwa bao okuguirisya, nibatamibwa.

⁴¹ Yesu naindura na:ika ati, Emwe aba riimbo rinyate:kirisya ne ri:ki:ke, ?ndikingya a:ki okuba nemwe no kube:gumirisya? Re:ta anu Omwana wao.

⁴² Anu ariga aca:ja, omusambwa nigumwesa a:si nigumugaragasya muno. Nawe Yesu nagonya omusambwa omujabi, naonya akamura, namusubya kwisemwene.

⁴³ Bo:ne nibataŋaŋara kurwo buinga bwa Nyamuanga. Nawe bo:ne anu bariga bacarugu:ra byone binu akorere, nabwira abe:igisibwa bae ati,

⁴⁴ Emisango jinu mujitu:re mu matwi gemwe, okuba Omwana wo mu:nu kajo:tu:rwa mu maboko ga ba:nu.

⁴⁵ Nawe abe:ne batasombo:keywe omusango ogwo, gwariga gubabisire bareme okugumenyegesya. Nibo:baya okubu:sya omusango ogwo kutyo guri.

Omukuru mu bukama bwa mu rwire

⁴⁶ Mbe nijibao jimamba mu be:ne ati, ?Niga ariba mukuru weswe?

⁴⁷ Yesu narora ame:ganirisyo ga mu mitima jebwe, nagega Omwana omuto:to, namuta mu rubafu rwae,

⁴⁸ nababwira ati, Unu wo:ne arafugesyaga Omwana omuto:to unu mwisi:na ryani, niwe kafugesya anye. Na unu wo:ne arafugesyaga anye, oyo kafugesya unu antumire, okuba omuto:to mwimwe bo:ne, oyo niwe Omukuru.

⁴⁹ Yoana naindura na:ika ati, Ratabugenyi, cabwene omu:nu nairisya emisambwa mwisi:na ryao, nicimuga:nya okuba atakuciru:ba eswe.

⁵⁰ Yesu namubwira ati, Mutamuga:nya, okuba unu atari muremo wemwe, oyo ni wa ku rubara rwemwe.

⁵¹ Mbe jisiku jae ejo kusirwa inguru jejire jafugera, narore:resya obusu bwae okugenda Yerusalemi.

⁵² Natuma jintumwa imbere yae, nibagenda mu musi gumwi gwa Basamaria okumwira:bira.

⁵³ Nibarema okumukuma okuba ariga arore:resisye obusu bwae okugenda Yerusalemi.

⁵⁴ Abe:igisibwa bae Yakobo na Yoana wejire barora ejo, niba:ika ati, Ratabugenyi, ?owenda ciragirire omuriro guso:ke mu rwire gubasimagisye, rwa kutyo Eliya akorere?

⁵⁵ Omwene nainduka, nabagonya na:ika ati, Mutakumenya omwoyo gunu muri nagwo kutyo guri.

⁵⁶ Okuba omwana wo mu:nu ate:jire kusimagisya buanga bwa ba:nu tari kubukisya. Mbe:muka nibagenda mu musi gundi.

Okuru:ba Yesu

⁵⁷ Mbe anu bariga bacagenda mu njira, omu:nu umwi namubwira ati, Ratabugenyi, enikuru:ba enu urajaga wo:ne wo:ne.

⁵⁸ Yesu namubwira ati, Banyamubwe bari na mo:bo, na jinyonyi ja mu rutumba jiri na mo:swi, nawe Omwana wo mu:nu atari na wa kuta mutwe gwae.

⁵⁹ Nabwira oundi ati, Ndu:ba. Nawe omwene na:ika ati, Ratabugenyi, siga mbere nijo:kwesa rata.

⁶⁰ Omwene namubwira ati, Siga abafu:ye be:sane abafu:ye bebwe, nawe awe genda, ura:syega obukama bwa Nyamuanga.

⁶¹ No undi na:ika ati, Ndakuru:baga, Ratabugenyi, nawe nunsige nambe nirage aba ike:wa:su.

⁶² Nawe Yesu namubwira ati, Omu:nu wo:ne akagwata isuka okurima, ne:kebukira inyuma, oyo ate:ire bukama bwa Nyamuanga.