Ruuka 3 - INDAGANO INYA:YA

Okusimura kwa Yoana Omubatija

¹ Mu mwaka gwa likumi na kata:nu ogwo kutunga kwa Tiberio Kaisari, anu Pontio Pilato ariga:ri musi:ba wa Buyaudi, na Erode anu ariga atungire Galilaya, na Filipo wa:bo ariga atungire Ituria ne ca:ro ca Tirakoniti, na Lusaniya ariga atungire Abilene.

² Mu siku jo bugabisi obukuru obwa Anasi na Kayafa, omusango gwa Nyamuanga nigwijira Yoana omwana wa Jakaria mwibara.

³ Naja mu:si yo:ne inu isije:ne na Yorodani, narasya okubatija kwo kuta kurwo kwiswaririrwa ebibi:bi,

⁴ rwa kutyo gwandikirwe mu citabo ce misango jo muragi Isaya ati, Oburaka bwa unu kakobyakobya mwibara ati, Mucumecume injira ya Ratabugenyi, Mugorore injira yae.

⁵ Amatina go:ne gari:jusibwa, Ne bi:ma ne bisuma byone biririŋanyirisibwa. Ne ci:ki:ke cirigororwa Na jinjira je migungurigunguri jiririŋanyirisibwa.

⁶ Na ba:nu bo:ne barirora omweruro gwa Nyamuanga.

⁷ Mbe nabwira ebise binu byaurukaga nibi:ja okubatijibwa ati, Emwe aba:na ba ji:miri, ?Niga unu abakabusisye okwiruka risungu rinu eryenda oku:ja?

⁸ Mbe mutwasye amatwasyo ganu ge:ire okuta, amwi mutaja kwamba kwaika munda jemwe ati, Ciri na saja, niwe Iburaimu, okuba enibabwira ati, Nyamuanga katura okumwinamusisya Iburaimu aba:na mu mabui ganu.

⁹ Na ka ori inse:na iteywe ku masina ga mati. Mbe riti ryone rinu ritakutwasya amatwasyo ge kisi eritemwa, ndyeswa mu muriro.

¹⁰ Ebise nibimubu:sya ati, ?Mbe cikore kutiki?

¹¹ Naindura nababwira ati, Unu ana jikanju ibiri amuyaneko eimwi unu atanayo, na unu ane biryo one akore kutyo.

¹² Abatobesya one niba:ja okubatijibwa, niba-mubu:sya ati, ?Omwiigisya, eswe cikore kutiki?

¹³ Nababwira ati, mutatobesyaga okusagirisya kukira omwo omuragirirwa.

¹⁴ Na basirikare nibamubu:sya ati, ?Eswe cikore kutiki? Nababwira ati, Mutasindiraga mu:nu amwi mutabeeresyaga mu:nu. Omuyero gwemwe gubamarega.

¹⁵ Mbe aba:nu bariga nibe:ikanya, bo:ne nibe:ganirisya emisango ja Yoana mu mitima jebwe ati, kefura amwi niwe ari Kristo.

¹⁶ Yoana nababwira bo:ne ati, Ni cimari anye enibabatija na manji, nawe unu ka:ja, niwe ankisisye amanaga, amwi anye nite:ire kusurumura orukoba rwe bikwirya byae. Niwe aribabatija no Mwoyo Mweru no muriro.

¹⁷ Ari no ruungo rwae mu kuboko kwae, korereki acume kisikisi ritare ryae, no kukofifya omusikure mu citara cae, nawe iŋunyu aryoca mu muriro gunu gutakutura kusimibwa.

¹⁸ Nabatongera aba:nu myafu ejindi mu kusimura kwae.

¹⁹ Nawe omusi:ba Erode, wejire aganyibwa nage kurwa Erodia muko:wabo, na kurwe bibi:bi byone binu akorere.

²⁰ Kwibyo byone nongesyako cinu kutya, nagwata Yoana, namuta mu mabubu:si.

Okubatijibwa kwa Yesu

²¹ Mbe aba:nu bo:ne wejire bamara okubatijibwa, na Yesu one nabatijibwa, nasabwa, orwire ndwiguka,

²² Omwoyo Mweru namwikako mu rususo rwa injiba, na riraka niriso:ka mu rwire niryaika ati, Awe na:we Omwana wani unu nendere. Awe ounkondisya.

Basaja wabo Yesu

²³ Omwene Yesu, anu ambire okwiigisya, ariga amarire myaka makumi gasatu, rwa kutyo be:ganirisyaga ati, ni mwana wa Yusufu, wa Eli,

²⁴ wa Matati, wa Lawi, wa Meliki, wa Yana, wa Yusufu,

²⁵ wa Matatiya, wa Amosi, wa Naumu, wa Esili, wa Nagai,

²⁶ wa Maati, wa Matatia, wa Semei, wa Yoseki, wa Yuda,

²⁷ wa Yoana, wa Resa, wa Jerubabeli, wa Salatieli, wa Neri,

²⁸ wa Meliki, wa Adi, wa Kosamu, wa Elimadamu, wa Eri,

²⁹ wa Yosua, wa Eliejeri, wa Yorimu, wa Matati, wa Lawi,

³⁰ wa Simeoni, wa Yuda, wa Yusufu, wa Yona, wa Eliakimu,

³¹ wa Melea, wa Mainani, wa Matata, wa Natani, wa Daudi,

³² wa Yese, wa Obedi, wa Boaji, wa Salimoni, wa Naasoni,

³³ wa Aminadabu, wa Aramu, wa Eseromu, wa Faresi, wa Yuda,

³⁴ wa Yakobo, wa Isaka, wa Iburaimu, wa Tera, wa Naori,

³⁵ wa Serugi, wa Reu, wa Falegi, wa Eberi, wa Sala,

³⁶ wa Kainamu, wa Arifakisadi, wa Syemu, wa Nuu, wa Lameki,

³⁷ wa Metusela, wa Enoka, wa Yaredi, wa Maleleli, wa Kainamu,

³⁸ wa Enosi, wa Seti, wa Adamu, wa Nyamuanga.