Ruuka 2 - INDAGANO INYA:YA

Yesu ne:burwa

¹ Mu siku ijo eciragiro niciso:ka ku Kaisari Augusito ati, gandikwe amasi:na ga be ca:ro bo:ne.

² Okwo nikwo okwandikwa kwo kwamba anu Kurenio ariga:ri musi:ba wa Syamu.

³ Aba:nu bo:ne nibagenda okwandikwa, buri nu:nu mu musi gwabo.

⁴ Yusufu one naso:ka Galilaya mu musi gwa Najareti, nagenda Buyaudi mu musi gwa Daudi, gunu ogutogwa Beteleemu, okuba ariga wa mu nyumba na wa mu ruganda rwa Daudi,

⁵ korereki andikwe aamwi na Maryamu unu asandaga, unu ari na inda.

⁶ Mbe anu bariga bari:yo, jisiku jae ejo kwibura niji:ya.

⁷ Ne:bura Omwana wo bubere, namuswikira mu myenda je ca:na, namuma:mya mwituba rya jiŋa, okuba batabwene mwanya mu buma:mo bwa bagenyi.

Bamaraika na bare:fi

⁸ Bariga bario abare:fi mu:si iyo bariga be:kae mu ndiri nibarinda riijo ryebwe mu ngeta.

⁹ Mbe maraika wa Ratabugenyi nabe:mereguruko, na rikusyo rya Ratabugenyi niribasingira niryeŋengeta, nibo:baya muno,

¹⁰ Maraika nababwira ati, Musige ku:baya, okuba rora, enibare:tera ebigambo byo bwana ebyo kukonderwa kwafu, kunu kuriba ku ba:nu bo:ne.

¹¹ Okuba rero mweburirwa Omukisya mu musi gwa Daudi, niwe Kristo Ratabugenyi.

¹² Cinu nico ecibarikisyo kwimwe. Omujo:rora omwana omwiburano aswikiye emyenda je ca:na ama:mibwe mwituba rya jiŋa.

¹³ Aonao nibabao ba:fu aba mu cise ca mu rwire aamwi na maraika, nibakuya Nyamuanga, niba:ika ati,

¹⁴ Rikusyo ribe ku Nyamuanga unu ari inguru muno, Na mu:si omurembe gube mu ba:nu banu abamukondisya.

¹⁵ Mbe bamaraika wejire babaso:kako okugenda mu rwire, abare:fi niba:ikana ati, Mbe cigende Beteleemu, cirore omusango gunu gwabayo, gunu Ratabugenyi ace:resya.

¹⁶ Nibaja bwangu, nibasanga Maryamu na Yusufu no mwana mwiburano ama:mire mwituba rya jiŋa.

¹⁷ Wejire barora, nibe:resya emisango jinu babwiriywe ku mwana oyo.

¹⁸ Bo:ne banu bonguywe nibarugu:ra jinu abare:fi bababwiriye.

¹⁹ Nawe Maryamu naja:ma emisango ejo jo:ne, naji:ganirisya mu mutima gwae.

²⁰ Mbe abare:fi nibasubayo, nibakusya Nyamuanga no kumukuya kurwe misango jo:ne jinu bonguywe na jinu barorere, rwa kutyo babwiriywe.

Okutendwa kwa Yesu

²¹ Mbe jisiku eta:nu ne:satu ejo kutenderako wejire je:ya, natogwa risi:na ryae Yesu, rinu atogerwe na maraika acari kuba na munda.

²² Mbe wejire je:ya jisiku jo kusomoka kwebwe rwe biragiro bya Musa kutyo byaragiriye, nibamugega nibamusira Yerusalemi korereki bamuyane Ratabugenyi.

²³ Rwa kutyo jandi kirwe mu biragiro bya Ratabugenyi ati, Ecirume co:ne cinu eca:ta inda ciratogwaga ce:ru ku Ratabugenyi.

²⁴ Nibaja okuso:sya eco:go rwa kutyo ca:ikirwe mu biragiro bya Ratabugenyi ati, Njiba ebiri amwi ba:na be bigu:ti babiri.

Okusi:ma kwa Simeoni

²⁵ Ariga:rio mu:nu mu Yerusalemi risi:na ryae Simeoni. Omu:nu uyo ariga murengeresi, no:baya Nyamuanga, narindirira okusi:ri:sibwa kwa Israeli. No Mwoyo Mweru ariga amuriko.

²⁶ Oyo asweruriywe no Mwoyo Mweru ati ataribona kufwa acari kurora Kristo wa Ratabugenyi.

²⁷ Natangasibwa no Mwoyo, nengira mu yekaru. Mbe abe:busi bae wejire bamure:ta Omwana Yesu korereki bamukorere rwa jintungwa je biragiro kutyo jiri,

²⁸ mbe, omwene namuyeka mu maboko gae, nasi:ma Nyamuanga na:ika ati,

²⁹ Ratabugenyi, woryanu waraga omugaya wao no murembe, rwa kutyo wa:ikire,

³⁰ Okuba ame:so gani garora omweruro gwao,

³¹ Gunu we:ra:bire imbere ya ba:nu bo:ne.

³² Gube bweru bwo kumurikira abamaanga, Na rikusyo rya ba:nu bao Abaisraeli.

³³ Yusufu na nyiramwene nibarugu:ra emisango ejo amwaikireko.

³⁴ Simeoni nabasabirwa ribando, nabwira Maryamu nyiramwene ati, Rora, Omwana unu ateyweo bagwe no kwimereguru ba:fu mu Israeli. Abe cibarikisyo co kufumwa.

³⁵ Nawe ecinyambutu cirikusoma mu mwoyo gwao one, Korereki ame:ganirisyo ge mitima ja ba:fu gasweruke.

³⁶ Mbe ariga:rio Ana omuragi, muyasya wa Fanueli, wa mu ruganda rwa Aseri. Oyo ariga:ri mukwekuru, amarire no murume wae myaka eta:nu ne:biri kuso:ka mu buto:to bwae.

³⁷ Ariga amarire myaka makumi gata:nu na gasatu ne:na ari mutumba. Oyo ataso:kaga mu yekaru, naramya no kusara:rira no kusabwa mu mwisi na mu ngeta.

³⁸ Na:ja mu mwanya ogwo ogwo, nasi:ma Nyamuanga, na:ika emisango jae ku bo:ne banu barindiriraga okucungurwa kwa Yerusalemi.

³⁹ Wejire bamara okuku:misya jo:ne jinu jiri mu biragiro bya Ratabugenyi, nibasuba Galilaya mu musi gwabo gwa Najareti.

⁴⁰ Omwana nakura nongesibwako amanaga, ne:jura obwenge. Ecigongo ca Nyamuanga nicibaga aamwi nage.

Omumura Yesu aagati mu be:igisya

⁴¹ Mbe abe:busi ba Yesu bagendaga Yerusalemi ku myaka ku marya ga Ipasaka.

⁴² Wejire amara myaka ekumi ne:biri, nibarinya Yerusalemi rwa kutyo jintungwa jariga jiri.

⁴³ Jisiku ja marya jejire jawa, anu bariga nibainduka, Omwana oyo Yesu nasigara mu Yerusalemi. Abe:busi bae bariga batamenyere.

⁴⁴ Nawe be:ganirisyaga ati, ari mu murobo gweswe, nibaribata rugendo rwa rusiku rumwi, nibamuyenja mu bairi babo na mu basa:ni bebwe.

⁴⁵ Wejire ababura, nibasuba Yerusalemi nibamuyenja.

⁴⁶ Wejire jaturao siku isatu, nibamusanga mu yekaru, enyanjire aagati mu be:igisya, nabategeresya nababu:sya.

⁴⁷ Bo:ne banu bamungwaga nibajuma kurwo bwenge bwae no kuindura kwae.

⁴⁸ Mbe wejire bamurora nibataŋaŋara. Nyiramwene namubu:sya ati, ?Mwana wani, okucikora kutya niki? Esomwana nanye cariga nicikuyenja asurumbae.

⁴⁹ Nababu:sya ati, ?Mwariga nimunyenjera ki? ?Mutamenyere ati, kunyiire okuba mu mirimu ja Rata?

⁵⁰ Batasombo:keywe omusango gunu ababwiriye.

⁵¹ Natebera nabo naja Najareti, nabo:roberaga. Nawe nyiramwene naja:ma emisango ejo jo:ne mu mutima gwae.

⁵² Yesu neyongesyako obwenge no kukura no kukondisya Nyamuanga na ba:nu.