Matayo 9 - INDAGANO INYA:YA

Yesu naosya omukomborike

¹ Narinya mu bwato, naunguka nakinga mu musi gwabo.

² Nibamure:tera omurwae akomborikire ama:mire ku buriri. Yesu ejire arora okwikirisya kwebwe, namubwira omukomborike oyo ati, Mwana wani, si:ri:ka, we:swaririrwa ebibi:bi byao.

³ Mbe abandiki abandi niba:ika munda jebwe ati, Omu:nu unu kafuma Nyamuanga.

⁴ Yesu ariga amenyere okwiganirisya kwebwe, na:ika ati, ?Niki cinu ecikora nimwiganirisya kubi:bi mu mitima jemwe?

⁵ ?Kwo kuba ecangu ni ciya? ?Okwaika ati, We:swaririrwa ebibi:bi, tere amwi ati, Imuka uribate?

⁶ Nawe muture okumenya ati, Omwana wo mu:nu ari no buinga ku ca:ro bwo kwiswaririra ebibi:bi. Mbe niwo nabwira omukomborike oyo ati, Imuka witwike oburiri bwao, ugende ika.

⁷ Ne:muka nagenda ewae.

⁸ Ebise byejire byarora nibyubaya nibikusya Nyamuanga unu ayana aba:nu obuinga bwejabo obwo.

Yesu nabirikira Matayo

⁹ Yesu ejire aso:kayo, narora omu:nu unu natogwa Matayo enyanjire mwitobesyo rya rigoti. Namubwira ati, Ndu:ba. Ne:muka namuru:ba.

¹⁰ Anu ariga acenyanjire mu nyumba acarya, rora mba:ja abatobesya ba:fu na be bibi:bi ba:fu, nibenyanja aamwi na Yesu na be:igisibwa bae.

¹¹ Abafarisayo bejire barora, nibababwira abe:igisibwa bae ati, ?Omwiigisya wemwe niki cinu kakora narya na batobesya na be bibi:bi?

¹² Nawe ejire ongwa, na:ika ati, Abaanga batakenere mufumu, tari abarwae.

¹³ Nawe nimugende mwiigire obugajuro bwe cigambo cinu ati, Enenda ecigongo amwi nitakwenda co:go. Okuba nite:jire kubirikira abarengeresi tari abe bibi:bi.

Okusara:rira

¹⁴ Nibamu:jako abe:igisibwa ba Yoana nibamubu:sya ati, ?Niki cinu ecikora nicisara:rira eswe na Bafarisayo kwiya ka:fu, nawe abe:igisibwa bao batakusara:rira?

¹⁵ Yesu nababu:sya ati, ?Abejabo omutwasi abatura kutiki okusurumbara omutwasi acari nabo? Nawe jisiku jiri:ja omutwasi orwo aribaso:kako, mbe niwo nibasara:rira.

¹⁶ Atariwo mu:nu unu kabari:ra akatamba:ra akaya:ya ku mwenda omukokoro, okuba ako akabari:rirwako akatemura omwenda, na riundu niryongesya okugariya.

¹⁷ Amwi batakutu:ra amanji ge mijabibu amaya:ya mu nsagwa jiŋokoro, okuba bakakora kutiyo, jinsagwa jiŋokoro nijitemuka amanji ge mijabibu nigetika, jinsagwa nijifafanikana. Nawe abatu:ra amanji ge mijabibu amaya:ya mu nsagwa jinya:ya, bibiri byone mbi:yanya.

Omuyasya wa Yairo no mugasi wo bure:gu

¹⁸ Anu ariga aca:ika emisango ejo, na:ja Omukuru umwi, namuramya na:ika ati, Omuyasya wani amara kufwa woryanu. Nawe ija umuteko okuboko asubo:rora.

¹⁹ Yesu ne:muka namuru:ba na be:igisibwa bae one.

²⁰ Mbe omugasi unu ariga arwae obure:gu myaka ekumi ne:biri na:ja namuso:ka inyuma, naku:nia ku mufunjo gwe cifwaro cae.

²¹ Kwo kuba a:ikire munda yae ati, Araba naku:niako era ku cifwaro cae eniora.

²² Nawe Yesu ejire acu:ka namurora, na:ika ati, Muyasya wani, si:ri:ka, okwikirisya kwao kakuosya. Omugasi uyo naora kuso:ka mu mwanya ogwo.

²³ Yesu ejire engira mu nyumba yo mukuru oyo, narora ababumi ba jinkuri ne bise nibarira ji:mamu,

²⁴ Nababwira ati, Muso:keo, okuba Omwana atafu:ye, aongee era. Nibamuseka nibamugomberera.

²⁵ Ecise wejire camara kuurusibwamo, nengira namugwata okuboko, omuyara ne:muka.

²⁶ Orukuma orwo niruswira mu ca:ro eco co:ne.

Baofu babiri no mujibi nibaosibzua

²⁷ Yesu ejire aso:kayo, abaofu babiri nibamuru:ba nibaragirisya mba:ika ati, Awe Mwana wa Daudi, cifwire cigongo.

²⁸ Ejire engira mu nju abaofu nibamu:jako. Yesu nababu:sya ati, ?Omwikirisya ati, enitura okukora cinu? Nibamubwira ati, Yee, Ratabugenyi.

²⁹ Niwo naku:nia ku me:so gebwe, na:ika ati, Rwa kutyo mwekirisya gabe kutyo.

³⁰ Ame:so gebwe nige:guka. Yesu nabakomeresya muno na:ika ati, Mukabuke asige okubao mu:nu unu kamenya.

³¹ Nawe bejire bauruka, nibaswisya orukuma rwae mu ca:ro eco co:ne.

³² Anu bariga bacauruka, nibamure:tera omujibi, aungirwe omusambwa.

³³ Ejire airisya omusambwa, omujibi na:ika. Ebise nibirugu:ra, nibyaika ati, Anu cikabeere:ga bicariga kuboneka kutya mu Israeli.

³⁴ Nawe Abafarisayo niba:ika ati, Unu kairisya emisambwa kubwo mukuru we misambwa.

Orugeso na bagesi

³⁵ Yesu naturatura mu misi jo:ne na mu nguyo jo:ne, neigisya mu mekofyanyisyo gebwe, nasimura ebigambo byo bwana ebyo bukama, naosya jindwara jo:ne no burwaririsi bwone.

³⁶ Nawe ejire arora ebise, nabafwira ecigongo, okuba bariga baigirwe banyarambukire rwa ji:na:ma jinu jitana mure:fi.

³⁷ Niwo nabwira abe:igisibwa bae ati, Cimari orugeso ni rwafu, nawe abakosi bakeere.

³⁸ Mbe musabwe Omukuru wo rugeso, aku:re abakosi mu rugeso rwae.