Mariko 9 - INDAGANO INYA:YA

Okuinduka kwa Yesu

¹ Nababwira ati, Ni cimari enibabwira ati, Ku banu bemereguyu anu, bario abandi banu batariraba rufu na katyari, kukinga runu barirora obukama bwa Nyamuanga nibu:ja na managa.

² Mbe wejire jaturao siku ita:nu na rumwi, Yesu nagega Petero na Yakobo na Yoana, nagenda nabo ku ci:ma ecire:ra benyere:ra bwitebe. Nainduka orususo rwae imbere yebwe.

³ Ebifwaro byae nibyeŋengeta nibiba byeru kobo kobo, atario mumoti mu ca:ro unu katura okubyesya kutyo.

⁴ Eliya na Musa nibabasoromokera, niba:ikana na Yesu.

⁵ Petero naindura nabwira Yesu ati, Rabbi, ni kwa bwana eswe okuba anu. Mbe cikumbe mau:na gasatu, erimwi ryao, ne rindi rya Musa, ne rindi rya Eliya.

⁶ Okuba ariga atakumenya cinu ka:ika, okuba bariga bo:baire muno.

⁷ Mbe eri:re niri:ja niribasirigisya. Oburaka nibuso:ka mu ri:re ati, Unu niwe Omwana wani omwendwa, mumungwe.

⁸ Aonao wejire bamagamaga batasubire kurora mu:nu, tari Yesu era aamwi nabo.

⁹ Wejire be:ka ku ci:ma, nabakomeresya basige kubwirako mu:nu binu barora, tari Omwana wo mu:nu ariba amara okusu:ka mu bafu:ye.

¹⁰ Nibagugwata omusango ogwo, nibabu:syanya abene:ra ati, ?Okusu:ka mu bafu:ye kuri na bugajuro ki?

¹¹ Nibamubu:sya niba:ika ati, ?Abandiki aba:ika atiki, kwiire Eliya atangate oku:ja.

¹² Nababwira ati, Eliya cimari kamba oku:ja no kucuma byone, nawe Omwana wo mu:nu andikiywe kutiki ati, arinya:sibwa kwafu no kugaywa?

¹³ Nawe enibabwira ati, Eliya are:jire, nibamukorera rwa kutyo bendaga byone, rwa kutyo andikiywe.

Yesu nairisya omusambwa

¹⁴ Wejire bakinga ku be:igisibwa bae, mbarora ecise cinene cibasingiye, na bandiki niba:ika nabo.

¹⁵ Aonao ecise co:ne nicimurora, nicitaŋaŋara muno, nibamuke:sya.

¹⁶ Nabu:sya abandiki ati, Omwaika nabo misango ki?

¹⁷ Umwi wa mu cise namuindura ati, Mwiigisya, nakure:tee Omwana wani. Ano musambwa gunu gutakwaika.

¹⁸ Enu wo:ne ogumugwata, ogumugaragasya, nafukumba efiro, naruma ame:no, ondeeko Nimbwira abe:igisibwa bao ati baguirisye, nibatamibwa

¹⁹ Naindura na:ika ati, Emwe aba riimbo rinu ritakwikirisya, ?ni:kare nemwe kukingari. ?Ni:gumirisys nemwe kukingari? Mumunde:tere.

²⁰ Nibamumure:tera. Omusambwa wejire gwamurora, nigumugaragasya muno. Nagwa a:si ne:siringisya, nafukumba rifiro.

²¹ Nabu:sya esemwene ati, ?Bwamwambireri oburwae bunu? Na:ika ati, Ni bwa mu buto:to.

²² Ogumwesa mu muriro na mu manji kwiya ka:fu korereki gumwite, nawe araba outura okukora omusango gwone, ucifwire ecigongo, ucisakire.

²³ Yesu namubwira ati, Ukatura okwikirisya, byone ebiturwa ku unu ke:kirisya.

²⁴ Aonao esemwene mwana nakungira inguru, na:ika ati, Eni:kirisya. Nsakira obute:kirisya bwani.

²⁵ Mbe Yesu ejire arora ecise nicikofyanyisya mbiro, nagonya omusambwa omujabi, nagubwira ati, Awe omusambwa omujabi gunyata:ika, no mwigare wa matwi, anye enikuragirira ati, numuso:kemo, utarija kumwingiramo rindi.

²⁶ Nigurira, nigumugaragasya muno, nigumuso:kamo. Naba uti afu:ye, ndijei abandi niba:ika ati, Afwa.

²⁷ Nawe namugwata okuboko, namwimusya, ne:mereguru.

²⁸ Wejire engira mu nyumba, abe:igisibwa bae nibamubu:sya bwitebe ati, ?Kubaki eswe citamatura okuguirisya?

²⁹ Nababwira ati, Ogwejabo ogwo gutakutura kuso:kamo era, tari kurwo kusabwa.

Yesu naraga ejo kufwa kwae

³⁰ Nibaso:kayo nibatura mu Galilaya. Ariga atakwenda mu:nu wo:ne kumenya.

³¹ Okuba ariga ne:igisya abe:igisibwa bae, nababwira ati, Omwana wo mu:nu aritu:rwa mu maboko ga ba:nu, nibamwita. Mbe ariba amara okwitwa, jiriturao siku isatu nasu:ka.

³² Nawe batasombo:eywe omusango ogwo, nibo:baya okumu-bu:sya.

Obukuru kutyo buri

³³ Nibakinga Kaperinaumu. Mbe anu ariga:ri mu nyumba nababu:sya ati, ?Mwari mubambasyanyisya ki mu njira?

³⁴ Nibajibira, okuba babambasyanyaga abene:ra mu njira ati, ?Omukuru niga?

³⁵ Nenyanja nabirikira ekumi na babiri, nababwira ati, Omu:nu akenda okuba owo kwamba, niwe arabaga wa ku bute:ro kukira bo:ne no mufurubendi wa bo:ne.

³⁶ Nagega Omwana omuto:to namutu:ra agati yebwe, namuyeka nababwira ati,

³⁷ Unu wo:ne karamira oumwi ku ba:na abato:to be:ja:bo unu mwisi:na ryani, oyo kandamira anye. No mu:nu wo:ne unu kandamira anye, atakundamira anye, tari Unu antumire.

³⁸ Yoana namubwira ati, Mwiigisya, ca:ma:rora omu:nu unu atakuciru:ba eswe nairisya emisambwa mwisi:na ryao, nicimuganya, okuba atakuciru:ba eswe.

³⁹ Yesu na:ika ati, Musige kumuganya, okuba atario mu:nu unu arakoraga ecirugu:ro mwisi:na ryani unu katura kunfuma bwangu.

⁴⁰ Okuba unu atari muremo weswe, kaba:ri kwiswe.

⁴¹ Okuba unu wo:ne arabanywesyaga emwe ecikombe ca manji mwisi:ma ryani, okuba muri ba:nu ba Kristo, ni cimari enibabwira ati, atariburwa muye:ro gwae na katyari.

Intambara ya banu abe:ku:jusya

⁴² No mu:nu wo:ne unu arayabyaga oumwi kwabo abato:to banu abanyikirisya, akiri aboywe orubui rwo kuse:ra mu cimiro cae, e:swe mu nyanja.

⁴³ Okuboko kwao kukakuyabya, kutemeko. Ni kwa bwana okwingira mu buanga uremae, okukira kuba na maboko gabiri, no kuja mu nyanja yo muriro, mu muriro gunyatasima,

⁴⁴ omwo inyorosi yebwe itakufwa no muriro gutarisima.

⁴⁵ No kuguru kwao kukakuyabya, kutemeko. Ni kwa bwana okwingira mu buanga una kuguru kumwi kukira okweswa mu nyanja yo muriro una maguru gabiri go:ne.

⁴⁶ Nimwo inyorosi yebwe itakufwa, no muriro gutarisima.

⁴⁷ Eri:so ryao rikakuyabya, ri:yemo. Ni kwa bwana okwingira mu bukama bwa Nyamuanga uri na nsongo, okukira kuba na me:so go:ne gabiri no kweswa mu nyanja yo muriro,

⁴⁸ omwo inyorosi yebwe itakufwa no muriro gutarisima.

⁴⁹ Okuba buri mu:nu arirungwa no muriro.

⁵⁰ Omunyu ni gwa bwana, nawe omunyu gukarema okukora, ?omusubyamo ki korereki gukore? Mube no munyu mwimwe, mwikare no murembe abene na bene.