Mariko 8 - INDAGANO INYA:YA

Aba:nu 4,000 mbari:sibwa

¹ Mu siku ijo, ebise wejire byafura rindi, nibaburwa ebiryo. Yesu nabirikira abe:igisibwa bae, nababwira ati,

² Nabafwira ecise ecigongo, okuba rero camarire nabo siku isatu, ke:nu batana biryo.

³ Nikabaraga basube ika basara:riye, abajo:yutukira mu njira, na bandi baso:kere kura.

⁴ Abe:igisibwa bae nibamubu:sya ati, ?Omu:nu katura kutiki okwigusya aba:nu banu emikate mwibara anu?

⁵ Nababu:sya ati, ?Murina mikate eringa? Niba:ika ati, Eta:nu ne:biri.

⁶ Nabwira ecise okwinyanja a:si. Nagega emikate eta:nu ne:biri, najibeganyamo, nabayana abe:igisibwa bae okugabira aba:nu. Nibajigabira ecise.

⁷ Bariga na biswi bityari one. Nabisabirwa ribando, nababwira okubagabira.

⁸ Nibarya nibe:guta, nibakofya ebiba:ra binu byasigaeo bitukuru bita:nu na bibiri.

⁹ Na banu bari:ye bariga uti bisira bina. Kumara nabaraga.

Abafarisayo nibayenja ecibarikisyo

¹⁰ Aonao nasyabara mu bwato aamwi na be:igisibwa bae, nagenda mu mbara ja Dalimanuta.

¹¹ Abafarisayo nibaja nibamba okubambasyanya nage, nibamuyenjako ecibarikisyo co kuso:ka mu rwire, nibamusaka.

¹² Narumwa muno mu mwoyo gwae, na:ika ati, ?Aba riimbo rinu abayenja ecibarikisyo kubaki? Ni cimari enibabwira ati, Aba riimbo rinu batariyabwa ecibarikisyo.

¹³ Nabasiga, nasyabara rindi naja ku ngego yenderya.

Yesu nagajura ebye cifwimbya

¹⁴ Mbe nibarabirwa okugega emikate. Ka batariga najo mu bwato, tari mukate gumwi era.

¹⁵ Nabakomeresya na:ika ati, Mukabuke, mwikenge ecifwimbya ca Bafarisayo ne cifwimbya ca Erode.

¹⁶ Nibabu:syanya abe:ne:ra kwo kuba bariga batana mikate.

¹⁷ Yesu namenya ejebwe nababu:sya ati, Niki cinu omwaikana okuba mutana mikate? ?Mucari kwite:ge:resya, amwi mucari kusombo:kerwa? ?Emitima jemwe ni mikomee?

¹⁸ ?Muna me:so nawe mutakurora? ?Muna matwi nawe mutakungwa? ?Amwi mutakwicuka?

¹⁹ ?Anu nabeganyisisye aba:nu bisira bita:nu emikate eta:nu, mwakofifye bi:bo biringa bi:juye ebiba:ra binu byasigae? Nibamubwira ati, Ekumi na bibiri.

²⁰ Na runu nabeganyisisye ebisira ebina mikate eta:nu ne:biri, mwakofifye bitukuru biringa binu byejuye ebiba:ra bye mikate? Nibamubwira ati, Bita:nu na bibiri.

²¹ Nababu:sya ati, ?Mucari kusombo:kerwa?

Omuofu wa Betesaida naosibwa

²² Nibagoba Betesaida. Nibamure:tera omuofu, nibamuremberesya amukunieko.

²³ Namugwata okuboko omuofu uyo, namuurusya ku mwira gwo musi. Namufuburira ku me:so, namutako amaboko, namubu:sya ati, ?Ourora ci:nu?

²⁴ Ne:namusya me:so na:ika ati, Enirora aba:nu bari rwa mati, ngaribata.

²⁵ Nasuba okutako amaboko gae ku me:so gae orwa kabiri, ne:komeresya, naosibwa, narora byone kisi.

²⁶ Namuraga agende ewae, namubwira ati, Utengira mu musi gunu, amwi utabwira mu:nu wo:ne wa mu musi.

Petero na:ika ati, Yesu niwe Kristo

²⁷ Yesu ne:muka nagenda mu misi ja Kaisaria ya Filipi, aamwi na be:igisibwa bae. Nabu:sya abe:igisibwa bae mu njira ati, ?Aba:nu abanyaika anye ati nanyega?

²⁸ Niba:ika ati, Yoana Omubatija, nawe abandi ati, Eliya, abandi ati, Umwi wa ku baragi.

²⁹ Omwene nababu:sya ati, ?Nawe emwe omuntoga ati nanyega? Petero namuindura ati, Na:we Kristo.

³⁰ Nabakomeresya batabwirako mu:nu emisango jae.

Yesu naraga ejo kufwa kwae

³¹ Namba okube:igisya ati, Kumwiire Omwana wo mu:nu okunya:sibwa kwafu, no kuremwa abakaruka na bagabisi abakuru na bandiki, no kwitwa, na ariba jawa siku isatu okusu:ka.

³² Ariga na:ika omusango ogwo abweru. Petero namugega namba okumugonya.

³³ Nacu:ka narora abe:igisibwa bae, nagonya Petero, na:ika ati, Suba inyumba yani, Syetani, okuba utakwiganirisya ebya Nyamuanga, tari bya ba:nu era.

Okumuru:ba Yesu

³⁴ Nabirikira ecise aamwi na be:igisibwa bae, nababwira ati, Omu:nu akenda okundu:ba, e:ganya omwene, e:twike omusaraba gwae, andu:be.

³⁵ Okuba unu wo:ne kenda okukisya obuanga bwae aribubusya. Na unu aribusya obuanga bwae kubwani na kurwe Bigambo byo bwana, oyo niwe aribuonya.

³⁶ ?Okuba omu:nu aribonamo ki, akarya ca:ro co:ne nafwirwamo Omwoyo gwae?

³⁷ ?Tere amwi mu:nu arigwata ki eco kutambana no mwoyo gwae?

³⁸ Okuba unu wo:ne kanjirira anye jinswaro ne misango jani, mwiimbo rinu eryo buromesi ne rye bibi:bi, oyo Omwana wo mu:nu one arimujirira jinswaro, ariba:ja mwikusyo rya Esemwene aamwi na bamaraika abe:ru.