Mariko 7 - INDAGANO INYA:YA

Yesu natoŋanya Abafarisayo

¹ Nibamwikofyanyisya Abafarisayo na bandiki abandi, banu baso:kere Yerusalemi.

² Nibarora abe:igisibwa bae abandi nibarya na jingaro jinu jijabiae, kwo kwaika ati, bate:sa:bire.

³ Okuba Abafarisayo na Bayaudi bo:ne bakaba bate:sa:bire, batakurya, okuba abagwata ebyecikuru bya bakaruka.

⁴ Wora baso:ka mwika:niro bate:sa:bire, batakurya. Ne bindi one bayabirwe okukora, uti kwosyaga ebikombe na jinyungu, ne bi:nu bye byuma.

⁵ Abafarisayo na bandiki nibamubu:sya ati, ?Niki cinu eciganya abe:igisibwa bao okuribatira mu byecikuru bya bakaruka, nawe ka abe:ri:rari:ra:ra na riko mu ngaro?

⁶ Nababwira ati, Isaya aragire kisi kwimwe ba rurimi, rwa kutyo jandikirwe ati, Aba:nu banu abanana cibaro ku minwa, Nawe emitima jebwe ndinajo kura.

⁷ Nawe abandamya kutyo era, Nibe:igisya ebiragiro bya ba:nu era uti kwiigisya kwe cimari.

⁸ Nimusiga eciragiro ca Nyamuanga, nimu:mira ku byecikuru bya ba:nu.

⁹ Nababwira ati, Omurema kisiki:si eciragiro ca Nyamuanga, nimu:mira ku byecikuru byemwe,

¹⁰ Okuba Musa a:ikire ati, Ubarega esomwana na nyokomwana, na rindi ati, Unu arafumaga esemwene amwi nyiramwene afwe orufu.

¹¹ Nawe emwe omwaika ati, Omu:nu akabwira esemwene amwi nyiramwene ati, Co:ne cinu cari ci:ire nikuyane niyo Korobani, kwo kwaika ati, ni ciyanwa ku Nyamuanga,

¹² Mutace:kirisya akorere esemwene amwi nyiramwene musango gwone.

¹³ Omumaramo omusango gwa Nyamuanga ku byecikuru byemwe binu mweigisisye. Na ka omukora emisango ejindi myafu eje:ja:bo ejo.

¹⁴ Nasuba okubirikira ecise, nababwira ati, Nimunyungwe bo:ne musombo:kerwe.

¹⁵ Citario ci:nu cinu ecingira mu mu:nu cinu ecitura okumujabiasya. Nawe binu ebiso:ka mu mu:nu, ebyo nibyo ebijabiasya omu:nu.

¹⁶ (Omu:nu wo:ne akaba na matwi go kungwa, nongwe.)

¹⁷ Wejire aso:ka mu bise nengira mu nyumba, abe:igisibwa bae nibamubu:sya ecijekekanyo eco.

¹⁸ Na-babu:sya ati, ?Ka nemwe one mutakusombo:kerwa? ?Mutakumenya ati, co:ne cinu ciri anja cikengira mu mu:nu citakutura kumujabiasya?

¹⁹ Okuba citakwingira mu mutima gwae, tari munda yae, niciitiŋana nicigenda mu runio. A:ikire kutyo ne:sya ebiryo byone.

²⁰ Na:ika ati, Cinu eciso:ka mu mu:nu nico ecijabiasya omu:nu.

²¹ Okuba mu mitima ja ba:nu, nimwo agaso:ka ame:ganirisyo amabi:bi, no busengi no kwiba, no kwita, no kuromera,

²² Na inamba imbi:bi, no burangirangi, no rurimi, no buyerwa, no butima, no kufuma, ne cigundu, no butamutamu.

²³ Ebibi:bi ebyo byone ebiso:ka munda, nibijabiasya omu:nu.

Omugasi via Surofenisa

²⁴ Ne:muka, naso:kayo nagenda mu ca:ro ca Turo na Sidoni. Nengira mu nyumba ariga atakwenda mu:nu amenye, nawe ataturire kwiibisa.

²⁵ Nawe ariga:rio omugasi unu ariga no muyasya wae unu ariga:ri no musambwa omubi:bi. Oyo ejire ongwa ati ariwo, na:ja nagwa mu maguru gae.

²⁶ Mbe omugasi uyo ariga Mugiriki wa ruganda rwa Basurofenisa. Namuremberesya okuirisya omusambwa ku muyasya wae.

²⁷ Yesu namubwira ati, Siga aba:na batangate okwiguta, okuba kute:ire kugega ebiryo bya ba:na no kubyesera jimbwa.

²⁸ Omwene naindura namubwira ati, Nikwo kutyo, Ratabugenyi, nawe jimbwa one ejirya obuungururu bwa ba:na mwifu:fu rya imeja.

²⁹ Namubwira ati, Kurwo musango ogwo, genda. Omusamba gwaso:kere ku muyasya wao.

³⁰ Nasuba ika ewae, nasanga omuyasya wae ama:mire ku buriri, no musambwa nasanga gwamuso:kereko.

Omwigare wa matwi naosibwa

³¹ Naso:ka rindi mu ca:ro ca Turo, naitiŋana mu ca:ro ca Sidoni na aagati ye ca:ro ca Dekapoli, nakinga ku nyanja ya Galilaya.

³² Nibamure:tera omwigare wa matwi unu ariga nabojaboja, nibamuremberesya amuteko okuboko kwae.

³³ Namuso:sya mu cise bwitebe, natu:ra ebyara byae mu matwi gae, nafubura amafwefu, namukunia ku rurimi.

³⁴ Narore:rera inguru mu rwire, nasabwa, namubwira ati, Efata, nikwo kwaika ati, Iguka.

³⁵ Amatwi gae nige:guka, ecisina co rurimi rwae nicisurumuka, na:ika kisi.

³⁶ Nabakomeresya basige kubwirako mu:nu. Nawe rwa kutyo ongesisye okubaingirira, nyaburiko nibongesya okura:sya ejo.

³⁷ Ni-bataŋaŋara muno niba:ika ati, Kakora byone kisi. Ke:gura abe:gare ba matwi, ka ka:ikya na bajibi.