Mariko 5 - INDAGANO INYA:YA

Omusasi wa Geresene naosibwa

¹ Nibakinga ku ngego yenderya ya inyanja, ku ca:ro ca Bageresene.

² Wejire asyoka mu bwato, aonao nabonana no mu:nu unu ariga:ri no musambwa omujabi unu aso:kereraga mu bitu:ro.

³ Oyo ama:maga mu bitu:ro, ariga atario mu:nu unu aturire okumuboya, nakabee ari ku runyoro.

⁴ Okuba kwiya ka:fu bamuboyaga ku masega na mu nyoro. Natemyaga jinyoro, na masega nabuturabutura, na ka ariga atario mu:nu wa managa ga kumuiga.

⁵ Nawe mu mwisi na mu ngeta akungiraga mu bitu:ro na ku bi:ma kusiku, ne:temaga na mabui.

⁶ Wejire arora Yesu acari kura, namubirimira namuramya.

⁷ Narira na buraka bunene na:ika ati, ?Ni na:we ki, Yesu awe, Omwana wa Nyamuanga unu ari inguru? Enikuremberesya, unyifumire ku Nyamuanga wasiga ku:nya:sya.

⁸ Kwo kuba ariga amubwiriye ati, So:ka ku mu:nu unu, awe omusambwa omujabi.

⁹ Namubu:sya ati, Risi:na ryao nawega? Namubwira ati, Risi:na ryani ni Regioni, okuba ciri ba:fu.

¹⁰ Namuremberesya muno atabairisya mu ca:ro eco.

¹¹ Mbe ryariga ririo eijo enene rya jingurube jariga nijire:ba ku ci:ma ao.

¹² Emisambwa jo:ne nijimuremberesya ati, Ciku:rire mu ngurube cijo:jingiramo.

¹³ Naji:kirisisya. Emisambwa emijabi nijimuso:kamo nijingira mu ngurube. Riijo niriurutuka njiteberera ku bugema njigwirira mu nyanja. Jariga uti bisira bibiri nijifwira mu nyanja.

¹⁴ Mbe banu bajire:baga nibabirima, nibabwira aba mu musi na ba mu masambu. Nibaja okurora binu byagwao kutyo biri.

¹⁵ Nibakinga anu Yesu ariga:ri, mbarora unu ariga aungirwe emisambwa, enyanjire, afwae, abee no bwenge bwae, unu ariga:ri na Regioni. Nibo:baya.

¹⁶ Banu barorere nibabasombo:rera binu byabeeo ku unu ariga aungirwe emisambwa, ne bya jingurube.

¹⁷ Nibamba okumuremberesya Yesu aso:ke mu mbibi jebwe.

¹⁸ Mbe anu ariga acasyabara mu bwato, unu ariga aungirwe namuremberesya abega nage.

¹⁹ Yesu narema okumwikirisisya, nawe namubwira ati, Genda ika ku banyu, ubabwire jo:ne jinu Ratabugenyi akukorera, na rwa kutyo akufwiriye ecigongo.

²⁰ Nagenda namba okukumusya mu Decapoli, nasimura jo:ne jinu Yesu amukoree. Aba:nu bo:ne nibarugu:ra.

Omuyasya wa Yairo no mugasi wo bure:gu

²¹ Mbe Yesu wejire aunguka mu bwato nakinga rindi ku ngego yenderya. Ebise byafu nibikofyanya anu Yesu ariga:ri. Omwene ariga:ri ku mwaro.

²² Mbe naja oumwi wa ku bakuru be rikofyanyisyo, risi:na ryae Yairo. Wejire amurora ne:nama mu maguru gae,

²³ namuremberesya muno, na:ika ati, Akaasya kani kendo:kufwa. Enikuremberesya, u:je umuteko amaboko gao, aore abe muanga.

²⁴ Nagenda nage. Ecise cinene nicimuru:ba nicimuiganya-iganya.

²⁵ Mbe omugasi unu ariga arwae obure:gu myaka ekumi ne:biri,

²⁶ unu anya:kire muno ku bafumu ba:fu, nagwataga binu ariga nabyo byone, ne:seranya era, nawe neyongesya:ra okurwara.

²⁷ Wejire ongwa orukuma rwa Yesu, naja inyuma yae mu cise, nakuniako ku cifwaro cae.

²⁸ Okuba a:ikire ati, Nikakuniako era ku cifwaro cae eniora.

²⁹ Aonao okuurura kwa manyinga gae nikutemekera. Namenya mu mubiri gwae ati, naosibwa inya:ko yani.

³⁰ Aonao Yesu namenya munda yae ati, amanaga gamuso:keremo, nacu:ka mu cise na:ika ati, ?Niga unu ankuniako ku cifwaro cani?

³¹ Abe:igi-sibwa bae nibamubu:sya ati, Ourora ecise kutyo abakuku:ra-ku:ra, ?ka owaika ati, Niga unu ankuniako?

³² Namagamaga okurora oyo akora kutyo.

³³ Nawe omugasi uyo no:baya nayarara, amenyere cinu cariga cimubwene. Na:ja nafukama imbere yae, namubwira ebye cimari byone.

³⁴ Namubwira ati, Muyara, okwikirisya kwao kwakuosya. Nuwigendere no murembe, uore kata inya:ko yao.

³⁵ Mbe anu ariga aca:ika, niba:ja banu baso:kere ku mukuru we rikofyanyisyo, niba:ika ati, Omuyasya wao afu:ye. ?Awe ka ounya:sisya ki Omwiigisya?

³⁶ Nawe Yesu naremo:bara omusango gwebwe, nabwira Omukuru we rikofyanyisyo ati, Uto:baya, Ikirisya:ra.

³⁷ Ate:kiri-sisye mu:nu wo:ne okugenda nage, tari Petero na Yakobo na Yoana omumura wabo Yakobo.

³⁸ Nibakinga ku nyumba yo mukuru we rikofyanyisyo, narora injogere na banu abarira, nibarira jimamu nyafu.

³⁹ Mbe ejire engira, nababu:sya ati, ?Niki cinu ecikora nimuyogana no kurira? Omwana atafu:ye, nawe aongee era.

⁴⁰ Nibamuseka muno. Nawe ejire aurusya bo:ne, nagega esemwene mwana na nyiramwene na banu bariga nage, nengira omwo mwana ariga:ri.

⁴¹ Nagwata Omwana okuboko, namubwira ati, Tarisa Kumi, obugajuro bwagwo ati, Muyara, enikubwira ati, Imuka.

⁴² Aonao Omwana ne:muka naribata. Okuba ariga ana myaka ekumi ne:biri. Nibarugu:ra nibataŋaŋara muno.

⁴³ Nabakomeresya muno, mu:nu wo:ne atamenya eco. Nababwira bamuyane ebiryo.