Mariko 4 - INDAGANO INYA:YA

Ecijekekanyo co mubibi

¹ Namba rindi okwiigisya ku mbarama ya inyanja. Ecise cinene muno nicimwikofyanisyako, ndijei nasyabara mu bwato, nenyanjamo ku nyanja. Ecise co:ne niciba ku ca:ro ku njekekera ya inyanja.

² Nabe:igisya byafu mu bijekekanyo, nababwira mu kwiigisya kwae ati,

³ Nimungwe, omubibi aurukire okubiba.

⁴ Mbe anu ariga acabiba, ejindi nijigwa ku njira, jinyonyi nji:ja njijirya.

⁵ Ejindi nijigwa ku rutare anu maaru gatariga ma:fu. Aonao njimera okuba amaaru gariga gatariko ma:fu.

⁶ Risu:ba ryejire ryaka, nijiotoka kwo kuba jitariga na misi, niju:ma.

⁷ Ejindi nijigwa mu mawa. Amawa nigakura nigajisoritya nijirema okutwasya amatwasyo.

⁸ Ejindi nijigwa mu maaru go bwana, nijitwasya amatwasyo, nijikura niji:ongesya, nijitwasya amatwasyo, eindi nitwasya makumi gasatu, eindi makumi gata:nu na rimwi, eindi egana.

⁹ Na:ika ati, Unu ari na matwi go kungwa, nongwe.

¹⁰ Mbe anu ariga:ri enyere, banu bariga bamusingiye na bariya ekumi na babiri nibamubu:sya ecijekekanyo.

¹¹ Nababwira ati, Emwe mwayabirwe okumenya obumbise bwo bukama bwa Nyamuanga. Nawe ku bariya abe mwira byone ebyaikwa mu bijekekanyo,

¹² korereki bakarora barore, bareme okwite:ge:resya. Bakongwa bongwe, bareme okusombo:kerwa, bate:fura nibainduka, nibe:swaririrwa.

¹³ Nababu:sya ati, ?Mutakumenya ecijekekanyo eco? ?Mbe ka murisombo:kerwa atiki ebijekekanyo byone?

¹⁴ Omubibi kabiba omusango.

¹⁵ Aba ku njira anu omusango gwabibwa nibo banu. Wora bongwa omusango, aonao Syetani na:ja naso:syamo omusango gunu gwabibirwe mu myoyo jebwe.

¹⁶ Nikwo kutyo na banu babibirwe ku rutare, banu wora bongwa omusango, nibe:kirisya aonao no kukonderwa.

¹⁷ Batana misi nawe ababao mwanya muto:to. Inya:ko amwi kunya:sibwa kukabao kurwo musango, aonao nibe:ku:jura.

¹⁸ Mbe banu babibirwe mu mawa nibo banu. Abo abongwa omusango,

¹⁹ mbe, emifurubendo je ca:ro, no kubebeywa obuni:bi, no kurigira kwe bi:nu ebindi nibingira nibisoritya omusango, nigurema okutwasya.

²⁰ Mbe banu babibirwe mu maaru go bwana nibo banu abongwa omusango nibagwemera, nibatwasya amatwasyo, oundi natwasya makumi gasatu, oundi makumi gata:nu na rimwi, oundi egana.

Ecijekekanyo ca itara

²¹ Nababu:sya ati, ?Itara eire:twa korereki ifundikirwe ecitukuru, amwi abaitu:ra mwifu:fu ryo buriri, tari inguru ku cikango?

²² Okuba citario ci:nu cinu cibisire cinu citarimenywa. Amwi citario eco bumbise cinu citariswerurwa.

²³ Omu:nu wo:ne akaba na matwi go kungwa, nongwe.

²⁴ Nababwira ati, Mukabukire jinu omungwa. Mu ndengo inu omurengeramo, nimwo emwe one murirengerwa, na ka muryongesibwako.

²⁵ Okuba omu:nu unu ari ne ci:nu, ariyabwa. Na unu atana ci:nu, aritesibwa na cinu ari naco.

²⁶ Na:ika ati, Obukama bwa Nyamuanga buri rwo mu:nu unu kabiba imbibo ku:si.

²⁷ Nama:maga mu ngeta, ne:mukaga mu mwisi, omwene atakumenya kutyo imbibo eimera ni:kura.

²⁸ Okuba i:si eitwasya eyene:ra. Okwamba omutenga, kumara ecangara, okumara eryeke ekome:e ku cangara.

²⁹ Wora ryoma, aonao nibatako orugera, okuba rugeso rweire.

Inje ya karadari

³⁰ Nababu:sya ati, ?Mbe obukama bwa Nyamuanga cibususanye na ki? ?Tere amwi cibujekekanye na ki?

³¹ Obususana rwa inje ya karadari, inu ikeere kukira mbibo jo:ne jinu jiri mu ca:ro, anu eibibwa,

³² Nawe wora yakura, ni:ba nene kukira emikubi jo:ne, nigatya amatabi manene, ndijei jinyonyi ja mu rutumba nijitura okusumbira mu mbeo yayo.

³³ Nabasimurira omusango mu bijekekanyo byafu byejabo ebyo, rwa kutyo baturaga okungwa.

³⁴ Ata:ikaga nabo tari mu bijekekanyo, nawe nabe:resya abe:igisibwa bae byone bwitebe.

Yesu narembesya makonjo no muyaga

³⁵ Ku rusiku urwo, wejire kwaba kegoro, nababwira abe:igisibwa bae ati, Ciunguke cije ku ngego yenderya.

³⁶ Nibasiga ecise, nibamugegera mu bwato kutyo ariga:ri. Na ma:to agandi gariga aamwi nage.

³⁷ Omuyaga mwafu gwe ciure nigugonoka, amatuma nigabuma obwato nibwamba okwijura amanji.

³⁸ Yesu ariga aongee ku seji ku ci:saguro. Nibamurafya nibamubu:sya ati, Mwiigisya, ?awe utakuciku:kwa eswe cikafwa?

³⁹ Narafya nagonya omuyaga, nabwira inyanja ati, Core:ra ute:kane. Omuyaga nigufwa, ndiba etore.

⁴⁰ Nababu:sya ati, ?Niki cinu omu:baya? ?Mutari na kwikirisya kutiki?

⁴¹ Nibo:baya bu:ba bwafu, nibabu:syanya ati, ?Ka unu niga, ka omuyaga ogumungwa na inyanja one?