Mariko 3 - INDAGANO INYA:YA

Omu:nu wo kuboko kufu:ye naosibwa ku sabato

¹ Nengira rindi mu rikofyanyisyo. Mbe ariga:rimo omu:nu unu ariga:ri no kuboko kufu:ye.

² Nibamurore:rera kutyo aramuosisya ku rusiku rwa isabato, korereki bamubu:re.

³ Nabwira unu ariga no kukobo kufu:ye ati, Imereguru agati ao.

⁴ Mbe nababu:sya ati, ?Kwikirisibwe okukora ebyo bwana ku sabato, tere amwi kukora kubi:bi? ?Kwikirisibwe okuonya obuanga tere amwi kwita? nibajibira.

⁵ Nabarore:rera ei nei abiiywe, asurumbae kurwo bukomee bwe mitima jebwe, namubwira omu:nu ati, Gorora okuboko kwao. Nakugorora okuboko kwae, nikuora.

⁶ Aonao Abafarisayo nibaso:kamo nibarwaja aamwi na Baerodiani kutyo baramusimagisya.

Barwae ba:fu mbaosibwa

⁷ Mbe Yesu naso:ka aamwi na be:igisibwa bae nibaja ku mwaro. Ebise binene nibimuru:ba nibiso:ka Galilaya, na Buyaudi,

⁸ na Yerusalemi, na Idumiya, na ku ngego yenderya ya Yorodani, na ku ca:ro ca Turo na Sidoni. Niciba cise cinene, nibamu:jako okuba bonguywe binu akorere.

⁹ Nababwira abe:igisibwa bae ati, obwato bubeo okumurinda, korereki ecise cisige kumwiganya.

¹⁰ Okuba ariga aonyisye ba:fu, na ba:fu banu bariga na jinya:ko, nibamugwako korereki bamukunieko.

¹¹ Emisambwa emijabi wejire jamurora, nijigwa imbere yae nijikunga nija:ika ati, Awe nawe Omwana wa Nyamuanga.

¹² Najikomeresya muno jisige kumura:sya.

Yesu nasora abe:igisibwa

¹³ Narinya ku ci:ma, nabirikira banu endaga, Nibamugendako.

¹⁴ Nasora ekumi na babiri korereki babega aamwi nage, abatumega kusimura,

¹⁵ babega na managa go kuirisya emisambwa.

¹⁶ Nibaba banu, Simoni unu atogaga Petero,

¹⁷ Na Yakobo wa Jebedayo na Yoana omumura wabo Yakobo. Abo nabatoga Boanerige, kwo kwaika ati, Ba:na ba ribaruka.

¹⁸ Na Anderea, na Filipo, na Batolomayo, na Matayo, na Tomaso, na Yakobo Omwana wa Alifayo, na Tadayo, na Simoni Omukananayo,

¹⁹ Na Yuda Isikariote unu amuso:kere mu ciwi.

Ebyo kufuma Mwoyo Mweru

²⁰ Nibengira mu nyumba. Ebise nibisuba okwikofyanya, ndijei nibatamibwa okurya ebiryo.

²¹ Aba:bo wejire bongwa ejo, nibaja okumugwata, okuba ba:ikire ati, asarire.

²² Mbe abandiki banu batebee okuso:ka Yerusalemi niba:ika ati, Oyo ari na Belijebuli. Kairisya emisambwa ku managa go mukuru we misambwa.

²³ Nababirikira nababwira mu bijekekanyo ati, ?Syetani katura okuirisya Syetani kutiki?

²⁴ Obukama bukatasyanya obwene era, butakutura kwimereguru.

²⁵ Na inyumba ika:ukana eyene:ra, inyumba eyo itakutura kwimereguru.

²⁶ Ka mbe Syetani ake:rwana omwene:ra, na:ukanamo, atakutura kwimereguru, nawe kawao.

²⁷ Nawe atario mu:nu unu katura okwingira mu nyumba yo mu:nu wa managa asa:kure ebi:nu byae, tari atangatire okuboya owa managa niwe asa:kure inyumba yae.

²⁸ Ni cimari enibabwira ati, Aba:na ba ba:nu bari:swaririrwa ebibi:bi byone, no bufumi bwebwe bwone bunu abafuma.

²⁹ Nawe unu wo:ne arafumaga Omwoyo Mweru atari:swaririrwa kajanende, nawe ana iŋanga ye cibi:bi ca kajanende.

³⁰ Na:ika kutyo okuba ba:ikire ati, Ari no musambwa mujabi.

Nyiramwene na ba:na ba:bo nibayenja Yesu

³¹ Mbe nyiramwene na ba:na ba:bo niba:ja. Nibe:mereguru anja, nibatuma omu:nu okumubirikira.

³² Ecise cariga cinyanjire cimusingiye, nibamubwira ati, Rora, nyokomwana na ba:na ba:nyu bari anja abakuyenja.

³³ Nabaindura na:ika ati, ?Mai na ba:na ba:su ni baga?

³⁴ Narore:rera banu bariga benyanjire bamusingiye mbara jo:ne, na:ika ati, Rora, mai na ba:na ba:su nibo banu.

³⁵ Okuba mu:nu wo:ne unu arakoraga jinu Nyamuanga kenda, oyo niwe omumura wa:su no muyara wa:su na mai.