Mariko 2 - INDAGANO INYA:YA

Yesu naosya omukomborike

¹ Mbe jisiku wejire jaturao, Yesu nasuba okwingira mu Kaperinaumu. Nibongwa ati, nguyo ari mu nyumba.

² Nibe:kofyanya ba:fu, nibe:jura na ku muryango. Nabasimurira omusango.

³ Nibaja ba:nu nibamure:tera omurwae akomborikire, aangirwe ba:nu bana.

⁴ Nawe wejire batamibwa okumwingisya kurwo bwafu bwa ba:nu, nibafumura orusara rwa inyumba anu ariga:ri. Wejire baurundura nibe:sisya omukomborike ku buriri bunu ariga ama:mireko.

⁵ Yesu ejire arora okwikirisya kwebwe, nabwira omukomborike ati, Mwana wani, we:swaririrwa ebibi:bi byao.

⁶ Nawe abandiki abandi bariga benyanjire omwo, nibe:ganirisya mu mitima jebwe ati,

⁷ ?Unu niki cinu ecikora nicimwaikya kutyo? Kafuma Nyamuanga. ?Niga unu katura okwiswaririra ebibi:bi tari umwi era niwe Nyamuanga?

⁸ Yesu namenya mu mwoyo gwae ati, nikwo kutyo abe:ganirisya munda jebwe, aonao nababu:sya ati, ?Niki cinu ecikora nimwiganirisya kutyo mu mitima jemwe?

⁹ ?Ecangu ni ci:ya? ?Okubwira omukomborike ati, We:swaririrwa ebibi:bi byao, tere okwaika ati, Imuka witwike oburiri bwao, uribate?

¹⁰ Nawe mumenye ati, Omwana wo mu:nu ari no buinga mu ca:ro okwiswaririra ebibi:bi. Namubwira omukomborike ati,

¹¹ Enikubwira ati, Imuka witwike ebima:miro byao ugende ika ewao.

¹² Ne:muka, ne:twika ebima:miro byae aonao, nauruka imbere ya bo:ne, ndijei nibarugu:ra bo:ne, nibakuya Nyamuanga, niba:ika ati, Cicariga kurora ce:ja:bo cinu.

Yesu nabirikira Lawi

¹³ Nauruka rindi nagenda ku nabarama ya inyanja. Ebise byone nibaja anu ariga:ri, nabe:igisya.

¹⁴ Anu ariga acaitiŋana, narora Lawi Omwana wa Alifayo enyanjire mu nyumba ya rigoti, namubwira ati, Ndu:ba. Ne:muka namuru:ba.

¹⁵ Yesu nenyanja mu nyumba ya Lawi narya. Mbe abaosya ba:fu na be bibi:bi nibenyanja aamwi na Yesu na be:igisibwa bae, okuba bariga ba:fu banu bamuru:bire.

¹⁶ Abandiki na Bafarisayo wejire bamurora narya aamwi na be bibi:bi na baosya, nibabu:sya abe:igisibwa bae ati, ?Kubaki karya no kunywa aamwi na baosya na be bibi:bi?

¹⁷ Mise Yesu ejire ongwa, nababwira ati, Abaanga batakenere mufumu, tari abarwae. Nite:jire kubirikira abarengeresi nawe abe bibi:bi.

Okusara:rira

¹⁸ Mbe abe:igisibwa ba Yoana na Bafarisayo basa-ra:riraga. Niba:ja nibamubu:sya ati, ?Kubaki abe:igisibwa ba Yoana na be:igisibwa ba Bafarisayo abasara:rira, ke:nu abe:igisibwa bao batakusara:rira?

¹⁹ Yesu nababwira ati, ?Aba:na bo bwenga abasara:rira kutiki, ke:nu omutwasi wo mwenga acari nabo? Anu bacari no mutwasi wo mwenga, batakutura kusara:rira.

²⁰ Nawe jisiku jiri:ja, ariba baso:sibwako omutwasi wo mwenga, mbe niwo barisara:rira mu siku ijo.

Ecijekekanyo co mwenda ne ca jinsagwa

²¹ Atario mu:nu unu kabari:ra ecisa:to eciya:ya ku ngubo iŋokoro, akefura nabari:ra, ciriya eciya:ya ecinyamura ingubo iŋokoro, no butemuke nibwiyongesya.

²² Ka atario mu:nu unu katu:ra amanji ge mijabibu amaya:ya mu nsagwa ja jinjai jiŋokoro, ake:fura natamo, amanji ge mijabibu amaya:ya agatemura jinsagwa, amanji ge mijabibu nige:tika, na jinsagwa nijinyamuka. Nawe abatu:ra amanji ge mijabibu amaya:ya mu nsagwa inya:ya.

Nibafuna obweke ku sabato

²³ Anu ariga acaitiŋana mu masambu ku rusiku rwa isabato, abe:igisibwa bae nibaribata nibamba okufuna obweke.

²⁴ Abafarisayo nibamubu:sya ati, ?Mbe kubaki abakora cinu cisisisye okukora ku rusiku rwa isabato?

²⁵ Nababu:sya ati, ?Si mucariga kusoma cinu Daudi akorere anu ariga akenere, narumwa omweko na banu bariga nage?

²⁶ Mbe nengira mu nyumba ya Nyamuanga, anu Abiatari ariga:ri mugabisi mukuru, narya emikate jo kweresya, jinu jasisyaga okuri:bwako, tari bagabisi benyere:ra, nabayanako banu ariga nabo.

²⁷ Nababwira ati, Isabato yateyweo kubwo mu:nu, tari ati omu:nu ateyweo kurwa isabato.

²⁸ Mbe Omwana wo mu:nu niwe Omukuru wa isabato.