1ጢመቲወስስ 1 - ኽምጣጘ ኣይር ኪዳን

ፈወነ 1

¹ ይናቓዘተ እደረስመ ይናቲስፈ ኣቐው ክርስቶስ እየሱስት ትዛዝ ክርስቶስ እየሱስት ኻወርየ ኣቐር ያን ባውሎስቲስ፦

² እምንትዝ እማንተው ይዅር ኣቐው ጢመቲወስስ እፃሽተው እፃ። ይናኣይር እደረቲስ ይናኣደረ ክርስቶስ እየሱስቲስም ፃገ፣ ስቝርት፣ ዲግተም ክጭስ ኣነ።

ኻሽትዙ ክንድጝ ክንሰቍ እቂስ ጣጝቅቅሸነው

³ መቀደውንየ ፊጣንድ ክት ኽደርዘጘ፣ ጝግል እፊሰውን ጐይ፤ ጝግል ፅበቍ ላው ላው እቅ ነስየይስ ኻሽትዙ ክንድጝ ክንሳይጘጘ፣

⁴ ሲነዝመ ደርቸ እጀው ዅለዝ እግዘነውድየንት ቲኵራይጘጘም ኣዝ፤ እነየቍ ዊቅድ ክርክር ነስጘኵጚ እምንትዝ ሰራሽተው እደረት ሰቭዝ ውርም ጣቅማቍ።

⁵ እኒን ክት ኣዝረው ትዛዚዙ ኣለመድ ግን ጭቅየው እዘኒስ፣ ንፁኽ ኽሊነይስ፣ እማንተው እምንቲስ፣ ችጝሸው ፍቅር የጝ።

⁶ ላው ላው እቅድ እንዛት ቀርጝ ጊነቱ ጂጘይዝጐ ፈቀቅ ይጝኵ።

⁷ ወሪትት ኽግ ክንሰጥ ኣጥጘ በንጘኵ፤ ኣነጚ ዊግትጘውድንት ዊንም ኣርቕነኵን ይጝ ዊግትጘው ዊገድየንት ኣርቓቍም።

⁸ ዊገድ ግን ወሪትት ኽግድ ኣግቫቭዝ ሰራሽተውዝየ ቀሰው ኣቐጘ ኣርቕነኵን።

⁹ ቈሽም ወሪትት ኽግ ይውሽተውድ ፃድቃንዝ ኣዪጝቀ፣ ወኝጀልኝጢዝመ ኣመፅኝጢዝ፣ እደረት ጐውታቊዝመ ኽጥያትኝጢዝ፣ ቅድስነ እጀቊዝመ እደረት ነቀቊዝ፣ ጝታይር ጝታኘት ቍወቊዝመ ኒቭስ ድሰጢዝ፣

¹⁰ ሸርሙጣኒዝመ ግልቍ ኽርየቍ ጕልቊዝ፣ እጅር ቅየቍ ጅበቊዝ፣ ኻሽወጢዝ፣ ኻሽትዝ ፃረቊዝመ ጭቅየው ክንድጝድየንት ተቃውምሸቊዝቅ፣ ኣቐነውድጘ ኣርቕነኵን።

¹¹ እኒን ክንድጝድ ብሩክ እደረት ክቭርድየንት ቓሊሰው፣ ይጭስ ኽድር ነይኑ ወንጌሊጅቅ ቲስመመው የጝ።

ባውሎስስ ይውሽተው እደረት ፃገድ

¹² ይት ጝኣግልግለውቲል ይመነውዝ ኣምንሸው ፃቭ እግዛንስቅ ብርታት ነየው ይናኣደረ ክርስቶስ እየሱስት ሚዝየንዘኵን።

¹³ ውርም እኳ እንዝ ሚቅ ዛሽጠር፣ ሲድሰር፣ ገልታዘር ኣቓንም፣ እኒንት ፃበውድ ኣርቐነ በነውዝመ ኣምነነ በነውዝ ዊናንስቅ ስቝርት ችጙን።

¹⁴ ይናኣደረት ፃገድ ክርስቶስ እየሱስት ኣመካይነትዝ ይናቍ ኣቐቍ እምንትዝመ ፍቅርዝ ጅቅ ኣቕ ይጭስ ጭቕጘ ቲርፍርፍሽ ነይሽቱ።

¹⁵ «ክርስቶስ እየሱስ ኽጥያትኝጥድዛት ቓዝጠ እን ኣልሚል ተሩ» የው ዊገድ ኣምንሸው፣ እጝቅቅም ለምርጥጘ ጥውሸው የጝ፤ ኽጥያትኝጢስ ወሰር ኽጥያትኘድም ያን የጝ።

¹⁶ ዊገድ ግን ዘላልምዙ ርዅየድ ችጝጥጘ ጝት ኣምነቊዝቅ ተከ ኣቓንስ ማጥን ክርስቶስ እየሱስ ኽጥያትኝጢስቅ ወሰር ይጭስ ደርቸ እጀው ጝኣቕልድየንት ቓሊሳንስ ማጥን ስቝርት ችጙን።

¹⁷ ጘጝ ጝለ ኣምላክ ኣቐው፣ ክራው፣ ቓሊሽታው፣ ዚምናኒዙ ንጕሲዝ ዘላልም ኣልም ኣሽ ሚዝየነዝመ ክብርዝ ኣነ፤ ኣሚን።

¹⁸ ይዅር ጢመቲወስወ! እንዝ ሚቅ ክጭስ ዊግሸው ትንቪትዙ ቃሊዝ ሚስርትዝ፣ ጘጝ ቃልድ ቲክነነውዝ ቀሰው ትግልድ ቲግልሽራንስ ማጥን እኒን ትዛዝድ ነቀኵን።

¹⁹ እምንትዝመ ንፁኽ ኽሊነዝ ፃጭ፤ ላው ላው እቅ ጝታኽሊነድ ማልጝ ሚርክቭ ማቨልዝ ድዛንትጘ ጝታእምንትድየንት ድስጝኵ።

²⁰ እንዛጊስም ነስየይስቅ እደረት ተቃውምሸነውድ በርጛንስ ማጥን ሲጣንዝ ዲቍስ ይወቍ ኽሚነወስስመ እስክንድረውስስ ችጝሽጘኵ።