1ቢጥሮስት እፃ 1 - ኽምጣጘ ኣይር ኪዳን

ፈወነ 1

^1-2 እየሱስ ክርስቶስት ኻወርየ ኣቐው ቢጥሮስቲስ፦ እደረ ኣይር በውርስ ኣርቐቍ፣ እየሱስ ክርስቶስስ ኣዚትጛንስመ ጝብሪዝ ትኒትጛንስ እደረ ማርፀቍ፣ መንፈስ ቅዱስት ኣማካይነትዝ ቀድስሽተቍ፣ ስድትኝጥ ኣቕጝ ባንጡስ፣ ገላትየ፣ ቀበደቅየ፣ እስየ፣ ቢታንየ፣ እንዳግልቅ ቢትንሽጝ ፅበቍ እቂዝ እፃሽተው እፃ። ፃገዝመ ዲግተዝ ክታጭስ ንቕፅነ።

ዘላልሚዙ ቲስፈይዝቍዝ እደረስ ኣልተው ሚዝየነ

^3-5 እየሱስ ክርስቶስ ክርጘይስ ጐነዊዝ ምላሰንዝ ፅበው ኣቐው ቲስፈዝመ ድዛው፣ ዊርየው፣ ዲቋው፣ ርስትል ጝኽየው ምስቝርቲዝ ይናት ሊጘት እዅረው ይናኣደረ እየሱስ ክርስቶስቲር ኣምላክም ኣቐው እደረ ሚዝየንሽትነ። እኒን እርስትድም ኻትሸነይዙ ዚምኒዝ ጋልፅሽትጠ ኣስልሸው ቓደነዝ እምንትዝ ኣማካይነትዝ እደረት ኻይልዝ ሊሚድሽርነቅ ክታጭስ ሲመይል ኣስልሽ ዊንጡ።

⁶ እንዝም ጭቕጘ ዲስ ይትርንቅ፤ ዊገድ ግን፣ ነን ቲተቲተው ፊተነዝ ዊትቍ ኰር ኻዝንትርንቅ ኣጠት።

⁷ እን ፊተነድ ክታግል ችጘውድ ድዘው ዊርቀድ እኳ ጝዊርተድ ኣረሰውድ ልየዝ ፊትንሻንድ ኣቐጘ፣ ድዘው ዊርቀዝሽⶖ ጭቕጘ ኪብረው ክታእምንትድም እማንተው ኣቐነውድ ደደደድሻንስመ እየሱስ ክርስቶስ ጋልፅሽተው ግርየይዝ ሚዝየነ፣ ክቭር፣ ውዳሲ፣ ችጝርናንስ የጝ።

⁸ ጝትም ቓሊጝቀ ቀንድርነኵ፤ ነን ቓሊርንሽም እኳ ጝት ኣምንድርነኵ፤ ጋልፅጥነ ቸልሻው ክቭርዝ እቻቐው ዲስተዝ ዲስ ይርነኵ።

⁹ ክታእምንቲዝም ኣርውድርነው ክታኒፍሲዙ ቓድትድ ችጝትርንቅ።

¹⁰ ክታጭስ ነይሽተው ፃገይዝቊዝ ትንቪት ዊግተቍ ነቭያታንድ እን ቓደነይዝቍዝ ቲግይጝ ጥጝቅቀዝ ሚርምርⶖ።

¹¹ ጛግል ዊነው ክርስቶስት መንፈስድ ክርስቶስትል ችጘው ሚከረይዝመ ሚከረይዝ ግረ ቈሽ ኣቐው ጝክቭሪዝ በውርስ ዊግተነውዝ ቓሊስ ዊኑ፤ ጛይም እኒን ኣውን፣ ኣወይም፣ ፋፅምሸጠጘድ ሚርምርጛⶖ ዊንⶖ።

¹² እንዛይ ነቭያታንድ ኣግልግልጛⶖ ዊንጘውድ ክታትጚ ጝታቕምት ኣየው ኣቐጘ ጛጭስ ጋልፅሽት ዊኑ፤ ኣግልግልጘውድም ሲመይስ እፃሸው መንፈስ ቅዱሲዝ ኣማካይነትዝ፣ ነን ወንጌልድየንት ኣቭዝርሰቍ እቅድ ክታጭስ ድቍጘውድየንት ዊግተነውዝ የጝ፤ እኒን ዊገድየንት መላካንድ እኳ ቃልጥጘ በንጛⶖ ዊንⶖ።

ቅድስነዝ ፅበነው

¹³ እንዝ ማጥን ክታዘንድየንት ኣስልጥን፤ ክታቕምትም ቅምጥን፤ ክታቲስፈድየንትም እየሱስ ክርስቶስ ጋልፅሽታንድ ክታጭስ ነየው ፃገይል ምሉ በምሉዝ ፃቭጥን።

¹⁴ እደረስ ኣዚትርነቅ ዅል ኣቕርናንስቅ በውገ ኣርቒጝቀ ፃይርን ዊንድርነው ጭቓ ምርቕፀድ ቲክንትርነ።

¹⁵ ዊገድ ግን ክታት ጭጘውድ ቅዱስ ኣቐጘ ክትንም ክታፅብጘይዝቅ ቅዱሳን ኣጥን።

¹⁶ ምላሰንድም፦ «ያን ቅዱስ የጝ፤ ክትንም ቅዱሳን ኣጥን» ይሽት ፃፍሽትኩ።

¹⁷ ኣውማውስቅ ኣድልዊጝቀ ጝሰቭ ጝሰቪዝጘ ፊርደውድየንት፦ «ይናኣይር» ይርን ጭጝርነቅ ኣቕርነውዝየ፣ እን ኣቭንወዝ ፅብርነው ዝቨይል ጝት ጐውተነውዝ ፅብጥን።

^18-19 በውገ ክታቅሊስ ዊርስርነው እርቫነ እጀው ፅብጘይስ ኻርነይ ፍርነውድ ድዘው ዊርቀዝ ዊንም ላየ ጊንዝቭዝ ኣቒጝቀ ዊገድ ግን ኒውርዝመ እምቘዝ እጀው ቢገይዝጘ ኣቐው፣ ኪብረው ክርስቶስት ብርዝ ኣቐጘ ክታቕም ኣርቕርነኵ።

²⁰ ጘጝ በውርስ ኣርቕሽተውድ ኣልም ፋጥርሸነዊስ በውገ ኣቓንድ፣ ነን ግን እን ኻትሸነይዙ ዚምኒዝ ክታማጥን ጋልፅሽቱ።

²¹ ጝኣማካይነትዝም ጝት ክርጘይስ ጒሰው፣ ክቭርም ይወው እደረት ኣምንድርነኵ፤ እንዝ ማጥን ክታምንቲዝመ ክታቲስፈይዝ ሚስርትሸውድ እደረትል የጝ።

²² ነስየ እማንስ ኣዚተነውዝ ክታቕምት ንፅዅ ፃቭርናንስቅ፣ ክታፅኒዝ ቅንነትዝ እቻቐው ፍቅር ፃይርንኵርኑ፤ ኣቓንስቅም ክታስ ክታይም ጭቕጘ ቀነቀንሽጥን።

²³ ሊጘት እዅርሽርነውድ ድዘው ዚረይስ ኣዪጝቀ ፅበው፣ ዘላልምም ፀናቕ ፅበው እደረት ቃሊዝ ኣማካይነትዝ ድዛው ዚረይስ የጝ።

²⁴ ምላሰንድም መፃፍ ያንትጘ፦ «እጅር እጝቅ ፃቀይዝጘ የጝ፤ ጝክቭርድም እጝቅ ፃቀ ኣቨቨይዝጘ የጝ፤ ፃቀድ ይዘኵ፤ ኣቨቨድም ኣርግፍሸኵ።

²⁵ ኣደረት ቃልድ ግን ዘላልም ፀናቕ ፅበኵ።» ክታጭስ ሲቭክሸው ኣቭዝርተይዙ ቃልድ እኒን የጝ።