1ይዃንስት እፃ 1 - ኽምጣጘ ኣይር ኪዳን

ፈወነ 1 ርዅየዙ ቃል

¹ ርዅየዙ ቃሊዝቍዝ በውገይስ ዊነውድየንት፣ ወሽነውድየንት፣ ይናእልጣኒዝም ቓልነውድየንት፣ ኣስክሰነውድየንት፣ ይናናንጣንድም ዳቕጘውድየንት ኣውጅነኵን።

² ርዅየድም ጋልፅሽቱ፤ ይንም ቓልንኵኑን፤ ጝጭስም ሚዝርድነኵን፤ ኣይር ጅቅ ዊነውድየንት፣ ይናጭስም ጋልፅሽተው ዘላልሚዙ ርዅየድየንት ክታጭስ ኣውጅነኵን።

³ ክትንም ይናጅቅ ላው ኽቭር ፃይርነቅ ኣቕርናንስ ማጥን ቓልነዊዝመ ወሽነዊዝ ክታጭስ ኣውጅነኵን፤ ይናኽቭርድም ኣይር ጅቅ ጝዅር እየሱስ ክርስቶስ ጅቅም የጝ።

⁴ ይናዲስተድም ፍፅም ኣቓንስ ማጥን እኒንት ክታጭስ ፃፍነኵን።

ብርኻንዝ ዋጥርጥረነው

⁵ ጝጊስ ወሽነውድ፣ ክታጭስም ድቍነው እፃድ፦ «እደረ ብርኻን የጝ፤ ጥመም ጝግል እጀውም» የው የጝ።

⁶ ጥመዝ ዋጥርጥርናⶖ፦ «ጝጅቅ ኽቭር ፃይንኵኑን» ይናን፣ ኻሹነኵን፤ እማንትም ፃቫይነቅም።

⁷ ዊገድ ግን ጘጝ ብርኻንዝ ፅበጘ ይንም ብርኻንዝ ዋጥርጥርናን ይናስ ይናይ ኽቭር ፃይንኵኑን፤ ጝዅር እየሱስ ክርስቶስት ብርድም እጝቅ ኽጥያቲስቅ ይናት ዊርሽጡ።

⁸ ኽጥያት እጅነቅም ይናን ግን ይናቕምት ኻጝስነኵን፤ እማንም ይናግል እጀውም።

⁹ ይናኽጥያትድየንት እደረስ ነዚትናን፣ ይናኽጥያትድ ይቅር ይጠ ኣመፅይስቅም ዊርሽጠ ኣምንሽተው ፃድቅ የጝ።

¹⁰ ኽጥያት ሰራሺነቅም ይናን ግን ጝት ኻሽወረ ፃቭነኵን፤ ጝቃልድም ይናግል እጀውም።