MATHI 28 - ASIO THSAMLAI C.L. Bible (BSI)

Ahkü Shishitsün

¹ Yihuda Anounyi shi-anküta, anoujet ayanyi ah ngetaoko, Mari Magdalin, naiuso amao Mari etam tü thapluao shin.

² Nai alekta, gohhaiu thatü songkü shin, Apaou aünhong tsak aün ainou saokü lung nou lekkanküta nung chiai moknoi.

³ Apa athapau ou oukü, naiuso apa sheitho nouso nyinli thaiukü noiküla.

⁴ Ehühoi nouso apa lon hat nou ngaongaokü eanhaili iulan.

⁵ Nai aünhong nou menyiuhoi tü ngiom, “Asam hatkü lanoi.” “Yisu sau paiphu nai lalut, asamüh apa yamji ta ngo ngen.

⁶ Apa nungai tsünoi; apaüh ngiotsünli apa ahkü shi-iu. Shikü apa tiai taiuküla nung athang nou tü athap.

⁷ Lo shakta khukü apa sahoi tü lüngio, ‘Apa e ainou ahkü shi-iu, naiuso lo apa asam khako Galil ai khuji; nungai asamüh apa eppe!’ Ngü asam tü ti ngiom nung lüyangshi.”

⁸ Nungtiphe ngüso ahat nou liuliukü etam wankü khu, külüko amongling nou miankü ngüsoüh apa sahoiso hau jingkü khukü chite.

⁹ Alekta Yisuüh ngüso phetekü ngiom, “Asam ko aalu lünoi!” Nungai ngüso apa dongai sungkü apa hok nai thaloukü, apa tü am.

¹⁰ Yisuüh ngüso tü ngiom, “Hatkü lanoi,” “Jü deisinioso tü Galil ai lükhu ta khukü lüngio, naiuso nungai ngüsoüh ngü eppe.”

Ehü nou Ngio Kantsün

¹¹ Menyiuhoi nou ngüso yamai khukü noinai, etam jimtsün süpaihoi ajantsoüh noknio nai shithawaotsün alum atengting mesonhoi nouso hao chiten.

¹² Atengteng meson nouso petchehoi nouko aikü kamküta ngüso ayang ngemlou; ngüsoüh süpaihoi hao tangka piakü kiukü,

¹³ ngiom, “Asamüh apa sahoiso asam saiankü noinai asoh shikü apa mia kanlükhun, ta lüngio.

¹⁴ Nungti Nokshingpaou nou lulanaito, samüh aphio tsünoi ta asamüh apa hao yangi-e, naiuso asam nung thaiuthako ti yangelatao tsünoi-e.”

¹⁵ Ehühoi nou tangka nou lou, naiuso ngüso tü ngiotsünli chhin. Naiuso nung ngiongem Yihudahai ongko nok miankü lonyi saokü penglükhunkü noin.

Yisuüh Apa Sahoiso hau Ep-iji

¹⁶ Sahoi chekü tsak nouso, Yisuüh ngüso tü ngiotsünli Galil nai noitsün king ai khu.

¹⁷ Tilai ngüsoüh Apa ep, ngüsoüh apa tü amkham, lüko ngüso ajantsoüh to henyinyi.

¹⁸ Nungai Yisu ngüso dongai shimkü shikü ngiom, “Aün nai naiuso goumchiko oukong apem ngo hao kiuwan-iu.

¹⁹ Nungtiphe asam shingkhan chikü nai khukü ngüso jü sahoi lü-iula-i: Po nou, Thso nou, naiuso Asio Onthso nianko ngüso lülimkiu,

²⁰ Naiuso ngüso tü ngo thoiluttsün alum angio angau lütsande. Naiuso ngo asam ko vetao athon saokü asaita hakü noi-e.”