MARK 5 - ASIO THSAMLAI C.L. Bible (BSI)

Yisuüh Angei Onthso Sunkün Khaiunia tsak Lomeiji

¹ Yisu naiuso apa sahoi Galil khiamnok etsai noitsün Gerasin hai goumchi ai shin.

² Tilai apa kheng ainou sung, angei onthso noitsün khaiunia tsak etam ainou apa ko pheten.

³ Apa etam nai kihkü noiküla naiuso lotü sauüh apa keshiao tsüshio.

⁴ Tititenai apa phasihok piaküjam sonao nou keshi lüko, apaüh sonao chanthat, naiuso apa taimeao sau da oukong tsünoi.

⁵ Asaichi, ahnge ahnya apaüh etam naiuso king nouso ai wekü naiuso meshen chija lung nou tawailokü noiküla.

⁶ Apaüh Yisu kumai epkü, kopkü khukü, apa khako kau,

⁷ naiuso sang asong nou wekü ngiom, “Yisu, ni Atsokting Goa Thso! Ngo ainou ni ti aiuji? Ngo hau angja lakiu ta Goa nian jonkü ngü ni tü thatü kojaji!”

⁸ (Tiautenai “Angei onthso, nung khaiunia ainou asungan!” ta Yisuüh ngiotsün tsangkü apaüh nung ngiokü noiküla.)

⁹ Yisuüh apa tü sang, “Anian sau?” Nung khaiunia nou thashin, “Jü nian ‘Ahoi’ tititenai sam piakü noin!”

¹⁰ Apaüh Yisu tü ngüso kumaito lahongan ta thatü koja.

¹¹ Nungai king nai yah pin achih yamhekü noiküla.

¹² Onthso nousoüh Yisu tü kojakü ngiom, “Ngüso da napao lümeikü, sam yah nouso ongai ahongan.”

¹³ Yisuüh ngüso khu-in, nungai angei onthso nouso sungküta yahhoi da nap. Yah hoi nouso heng nime thatso noitsün jin nai kopkü khukü, khiamai sathiokü apem mowan.

¹⁴ Yah jimtsünso kopkü khuküta nok pungkü nai nung ngiongem chiten naiuso khaiuniahoi nou nung tü luao shin.

¹⁵ Ngüso Yisu dongai shinai angei onthso sau da piakü noiküla, apa meiankü ne tenkü noikü epküta ngüso hatat.

¹⁶ Angei onthso nou thaloutsün khaiunia nou tü naiuso yah nouso tü tilüsong thawao nung thaiutha e-eptsünsoüh akamshihoi nouso hau chiten.

¹⁷ Nungtiphe ngüsoüh Yisu tü ngüso elung ainou pungeao koja.

¹⁸ Yisu kheng nai naplonai, angei onthso nou thaloutsün nou apa tü “Ngü niko akhuha-i” ta kojakü ngiom.

¹⁹ Lüko Yisuüh apa tü tsüthalo, lüko ngiom, “Atsamai lüshi naiuso ahaiso tü Apaou nou athaiutha titi chhi asong chhin naiuso atsüojinyang han nungso thaiutha ngüso hau lüchite.”

²⁰ Nungtiphe Yisuüh apa thaiutha titi chhi asong chhin nung noksong che nouso ai khukü chiten; naiuso khaiunia chikü ngawan.

Jairus thso naiuso Yisu Nepeng tü Thantsün Nyiuhai

²¹ Tilai Yisu haiu etsai kheng nai müjam khu, hoi piakü apa dongai kamshin.

²² Yihuda kamthang ashe ongko tsak nian nou Jairus shikü, Yisu epküta apa khako kaukü,

²³ kojakü ngiom, “Jü thso menyiuthso ehen nou eao lümeikü thatü kiakü noin, apa mei-iao ni shiküta apha nou apa tü athan ta ngü ni tü kojaji!”

²⁴ Yisu apako khunai hoi piakü apa phiai hoilut, naiuso ngüsoüh apa lemluwan.

²⁵ Nyiuhai tsak pon chekü nime ngoikü she shetsün tsangkü, angjatsün shiha.

²⁶ Apa chaisiou apem khemankü naiuso mose ngetsün piakü hao paotsang-i lüko akia nou tekkü tsümeikü iula.

²⁷ Apaüh Yisu thaiutha ngio lulakü hoi nou phiai shin, naiuso apa neh nai than,

²⁸ tititenai apaüh yang, “Ngü apa neh nailu lüko thannai, ngü lomei-e.”

²⁹ Apaüh Yisu nepengthun tü thannai nungailu apa she shetsün laowan, naiuso apaüh akia nou meian-iu ta ngen.

³⁰ Nungailu Yisuüh apa ainou oukong khuwaniu ta ngekü, hoi tü ngiom, “Jü ne tü sauüh than?”

³¹ Apa sahoisoüh thalakü ngiom, “Khaiunia piakü nou ni lemluwankünto ni tü sauüh than ta titi sangji?”

³² Lüko sauüh than nung tsangsheiao Yisuüh lemkü thap.

³³ Lüko nyiuhai nou apa da ti thawao nung ngelakü hatkü Yisu dongai shikü kaukü napkü hatatkü ngaongaokü apa da ti shin nung ngekü apa hau ti tsüphikü apem chite.

³⁴ Yisuüh apa tü ngiom, “Meso, ni amonglam tsangkü ni lomei kiu-iu. Mongtsamkü lükhu, naiuso akia meilukü lünoi.”

³⁵ Apa loüh chitekü noinai, Jairus tsam ainou ajantso shikü ngiom, “Athso menyiuthso nou eaniu: lotü atsandetsün tü tsonjekau tsüposhi?”

³⁶ Lüko Yisuüh ngüso ngio tü tsüangkü, apa tü ngiom, “Lahat, amonglam lu lünoi.”

³⁷ Apaüh Peter, Yakob naiuso apa nio Yohan lu apa phiai hoilut-i.

³⁸ Ngüso Jairus tsamai shinai khaiunia peksingtsün ep naiuso miashap ngem nou lu.

³⁹ Tilai Yisu tsamai nap, apaüh ngüso tü ngiom, “Tiau asam ngemji? naiuso shapji? Menyiuthso nou tsü e, lüko asai saitaim!”

⁴⁰ Ngüsoüh apa lotsaokü nyaikiu. Lüko apaüh ngüso chikü shikhuwaniküta, menyiuthso nou posinyiu naiuso sahoi nouso hakü menyiuthso noitsün nai nap.

⁴¹ Menyiuthso phanai thakü apaüh ngiom, “Talitha kumi” athat nou “Menyiuthso, ngü ni tü ngioji, Achu!”

⁴² Nungailu menyiuthso nou chukü tsakei. (Apa pon chekü nime noiküla). Nung thawaotsünko ngüso thatü ngawan.

⁴³ Lüko Yisuüh nung sau hao lachite ta thatü mongkü ngiom, naiuso “menyiuthso nou hao eheao tso akiu” ta apaüh ngüso tü ngiom.