MARK 4 - ASIO THSAMLAI C.L. Bible (BSI)

Lelu Shiutsün Athatlu Ngio

¹ Yisuüh müjam Khiamnok haiu kou nai tsandeao yachu. Hoi thatü asong tsak apa dongai kamshiphe, apa kheng tsakai napkü noi, naiuso hoi chikü Khiamnok shimkü goh ai noiküla.

² Apaüh ngüso tü athatlu ngio piakü hakü nungti tsandekü ngiom.

³ “Anglu! lelu shiutsün tsak lelu nou shiuao khun.

⁴ Apaüh shiu nai lelu ajantso yamkok nai tha, naiuso waio nouso shikü nung hean.

⁵ Lelu ajantso goh piakü tsünoikün lungkap nai tha, naiuso goh nou aokü tsünoiphe, nungailu nung samsan.

⁶ Tilai aje nou jelut, nung da eiu tsünoiphe, jamaolu wonnan.

⁷ Lelu ajantso sang ongko tha, naiuso sang nou laiuküta nung thongat, naiuso nung da i-iu nou tsü-i-iu.

⁸ Naiuso lelu ajantso goh amei nai tha naiuso nung samküta ajantso aosam, ajantso aoluok naiuso ajantso tsom ngoikü i-iu nou i-iu.”

⁹ Yisuüh ngiom, “Sau da alulaao noukhan pokü noin, apaüh lü-ang!”

Athatlu Ngio Thaiutha Alat

¹⁰ Tilai Yisu pemsa noiküla, sahoi chekü nime nouko hoi nouso hakü athatlu ngio thaiutha sangloao apa dongai shin.

¹¹ “Goa nokshing akaungio asam hao kiu taim,” ta Yisuüh thashin. “Lüko amao sauhai achosan nai tsüha, ngüsoüh to athatlu ngio tsangkülu luji,

¹² Nungtiphe, ‘ngüsoüh jinlu-e, lüko tsü eppe; ngüsoüh a-ang to anglu-e, lüko tsüngela-e. Tititenai ngüsoüh Goa dongai phokle naito, apaüh ngüso angei wankiu-ephe.’”

Yisuüh Lelu Shiutsün Athatlu Ngio Sasakü Chiteji

¹³ Apaüh ngüso tü ngiom, “Asamüh nung athatlu ngio nou tsüngeso? Naito, asamüh athatlu ngio apem titi nge-e?

¹⁴ Lelu shiutsün nou Goa ngio nou shiuji.

¹⁵ Yamkok nai ngio shiutsün nung, ngüsoüh louji, naiuso nungailu Biya shiji, küta ngüso da ti ngio shiu nung kanlükhunji.

¹⁶ Nungti lungkab nai shiu nouso nungso, sauhaiüh ngio nou louji, nungailu ngio nou monglingkü louji,

¹⁷ lüko nung aokü tsünaphe, tsüthalaiuji. Nungai tilai nung ngio thaiutha angja omhe shi-e, nungailu ngüso shioheanji.

¹⁸ Amao sang ongko shiutsün nungso, ngüsoüh ngio nou louji,

¹⁹ lüko goumchi thaiutha yanghetsün nou, jengtsaiu chinek, naiuso goumchi chaisiou aiutsün ngio nou thongatji, küta nung da i-iu tsü-i-iu-e.

²⁰ Goh amei nai shiutsün nung, sauhaiüh ngio nou lulaji, küta nung louji, ajantso aosam ngoikü, ajantso aoluok ngoikü, naiuso ajantso tsom ngoikü i-iu i-iuji.”

Tson nou Kim nou Khemai

²¹ Yisuüh tsülaokü ngiom, “Tson nou aphantsün nai tsütaiukü kim nou khemai tsüdekünai then khemai taiuao kankü shiji süne?

²² Tilüsong tsangkü taim nung achiai losan-e, naiuso awon nai tsüshikü hao titso tsangkü tsütaiu;

²³ Khaiunia ajantso aluao noukhan pokü noinai apaüh a-anglu!”

²⁴ Loüh apaüh ngüso tü ngiom, “asamüh ti luji nung da mong lükiu! asamüh amao hai tü ti tsangkü thaisan Goa nou asam tü nungtü phopkü thaisanshi-e.

²⁵ Tititenai sauüh taim apa hao kiu-e; naiuso sauüh tsütaiu apa ti taim nung lüko apa ainou kanlükhun-e.”

Lelu Samtsün Athatlu ngio

²⁶ Yisuüh tsülaokü ngiom, “Goa nokshing nungti noin: khaiunia tsaküh eiu ai lelu nou shiuküta,

²⁷ asoh sai-anji naiuso ahom chukü chhi nou chhiji. Nung taoko lelu nou samji naiuso laiuji, lüko nung titi sungji apaüh tsünge.

²⁸ Goh nou meshen chija samsan-iji, i-iu i-iu-iji; aya nai asha, küta tsopung naiuso tsopung nai tsonyak sungpoji.

²⁹ Lüko tsonyak tilai nyan-e, nungailu apaüh tsolam sah nou lamloji, tititenai be-eiuyamao atao shi-iu.

Kiamjim Ou Athatlu Ngio

³⁰ Apaüh ngiom, “samüh Goa nokshing ti khekkü thatlu-e?” “Tsüdekünai nung sasakiuao samüh ti athatlu ngio kankei-e?

³¹ Nung kianjim lelu tsak khekkü noin. Khaiunia tsaküh kianjim uo tisübao goumchi ko noitsün lelu ongko ehenting nung loküta goh ai shiuthioji.

³² Intso noiküta nung samsanji naiuso chihle khiamle apem ongko asongtingao iulaji. Apa da ajong piakü khuji, nung tsangkü waio nouso shikü nung paikhemsu ai a-ap shanao shioji.”

³³ Nungtili athatlu ngio piakü nou, ngüsoüh ngelatsünko yangkü, apaüh ngüso hao chite.

³⁴ Athatlu ngio tsühakü apaüh ngüsoko titso tsüchite, lüko tsamai ngüso pemsa noinai sahoi nouso hao thathaiukü chiteshikü noiküla.

Yisuüh Ah-ou-Ahsheih Lolaoji

³⁵ Nungnyi ahsham nai, Yisuüh sahoi nouso tü ngiom, “Sam haiu etsai khuko.”

³⁶ Ngüsoüh hoi nou wanküta, Yisu noitsün kheng nai sahoi nouso lüko naploküta nung ainou khu, loüh amao kheng nouso lüko nungai piakü noiküla.

³⁷ Naiuso aoasheih asong tsak shin, naiuso khiampek nou kheng nai piothiotsün tsangkü kheng khiam nou miananao noiküla.

³⁸ Yisu to kheng mi ai khaiukham nou khamkü saikü noiküla. Sahoi nousoüh apa jonchukü ngiom, “Atsandetsün, sam mowanao noitsün ni tsüthaisanjiso?”

³⁹ Nai apa chuküta ahsheih nou “sangkü anoi” ta thut, naiuso khiampek tü ngiom, “tsülemlemkü tsamkü lünoi!” Nungai ahsheih nou lao naiuso thatü tsamkü iula.

⁴⁰ Yisuüh apa sahoi tü ngiom, “Tiau asam hatji? Asam loüh amonglam tsünoiso?”

⁴¹ Lüko ngüso thatü hat naiuso ngüso si ngüso chitekü ngiom, “Naito ahsheih si khiampek nou lüko angio angao nung sau!”