MARK 3 - ASIO THSAMLAI C.L. Bible (BSI)

Phajeb Khaiunia Tsak

¹ Yisu müjam Yihuda kamthang nai napnai phajeb khaiunia tsak nungai noiküla.

² Apaüh Yihuda Anounyi nai lomei kiu-e süne tsülomei kiu-e ta, apa aphio thalouau thaiutha, khaiunia ajantsoüh apa tü jiokü noi.

³ Yisuüh phajeb khaiunia tü ngiom, “Nungai kha ai ashi”.

⁴ Apaüh khaiuniahoi nou tü sang, “Sam Ngiokhemüh Yihuda Anounyi amei chhiao tha süne tsümeikü chhiao thakü noin ta tsandeji? Aa nou kipsanau süne loatau tsandeji?” Ngüsoüh titso tsüthala.

⁵ Ngüso mong kong nou naiuso tsüthakü yangtsün shioko apaüh ngüso tü mongmat sungkü apemai thapluküta, nung khaiunia nou tü ngiom, “Apha atsadphu.” Apaüh nung tsadphu, küta apa pha meila.

⁶ Farisihoi nou Yihuda kamthang ainou sung, naiuso nungailu ngüso Herod hoiso ajantso ko eppeloküta Yisu loatau mongthat thatlo.

Khiamnok dongko Hoi Asong

⁷ Yisu apa sahoi hakü Galil Khiamnok dongai khunai hoi asong tsak apa tü hoilut. Nungko Galil ainou, Yihuda goumchi ainou,

⁸ Yirusalam ainou, Idumia ainou, Yordan chiai nou, Tair naiuso Sidon lemkü ainou hoi asong tsaküh apa chhi asong chhitsün lulakü apa dongai shin.

⁹ Hoi nou songphe apa tü thatü nyupkei-e tü noin ta, Yisuüh apa sahoi tü kheng nou ehen tsak khemlokü taiuao ngiom.

¹⁰ Tititenai apaüh akia khaiunia piakü lomeikiu nou shioko tititso da akia sunkü noiküla ngüso apa da thanao thoi-ekü shin.

¹¹ Angei onthso noitsün khaiuniahoi nou tilai apa ep, apa khako kaukü, “Ni Goa Thso!” ta wekü noiküla.

¹² Yisuüh angei onthso nouso tü apa sau ta tsüchiteao lohatkü ngiom.

Yisuüh Honghoi Chekü Nime Chosanji

¹³ Apa king nai sungküta apaüh aiutsün khaiuniahoi apa dongai jonshi.

¹⁴ Apaüh khaiunia chekü nime chosan, naiuso ngüso tü honghoi ta jon, apaüh ngüso tü ngiom, “Ngü asam ngüko haao chosan loüh ngü asam achim lüko honge,

¹⁵ naiuso asam da biya komanao oukong nou noi-e.”

¹⁶ Apaüh chosantsün chekü nime nou nungso noi-e: Simon (sau Peter ta niankiu)

¹⁷ Zebedi thso Yakob, naiuso Yakob nio Yohan, (Yisuüh ngüso tü Boanerges, athat nou “ah-mokthsoso” ta jon);

¹⁸ Andria, Philip, Bartholoma, Alfia thso Yakob, Thadia, Kana hai nou Simon,

¹⁹ naiuso apa janheantsün Yihuda Iskariot.

Yisu naiuso Belzebub

²⁰ Nungphiai Yisu apa tsamai shin, naiuso hoi nou piakü kamshi nou apa naiuso sahoi nousoüh eheshiuao atao tsüep.

²¹ Apa tsammongsoüh nung lulanai apa nialuao sung, tititenai khaiuniahoi nou “apa waiwaianiu!” ta ngemkü noiküla.

²² Yirusalem ainou saotsün ngiokhemtsandetsünsoüh ngiom, “Apa da Belzebub noin! naiuso apa da angei onthso ahei nou noitsün shioko apa angei onthso nouso komanao shioji.”

²³ Nungtiphe Yisuüh ngüso apa dongai jonshi küta athatlu ngio nou ngüso tü ngiom, “Biya nou biya titi komanao shio-e?

²⁴ Nok tsak meshen nokmongko janpek nai, nung nok nou tsakü noiao tsüshio.

²⁵ Tsamkhaiu tsak mongko hoi amomo janpek nai, nung tsamkhaiu tsakü noiao tsüshio.

²⁶ Nungti Biya nokshing nou janpek nai, apa tsakü noiao tsüshiokü mowan-e.

²⁷ “Oukong khaiunia tsak apa chong keshikü tsütaiuwankü naito sauühtso apa tsamai napkü ta jengtsaiu kaulo lükhunao tsüshio-e.

²⁸ “Atsüoting ngü asam tü ngioji, Khaiunia angei apem naiuso alutsaotsün ngio apem wankiuao shio-e.

²⁹ Lüko sauüh Asio Onthso lutsao-e tilai awan tsüeppe, tititenai apaüh athon tsüyangkün angei sonlo-iu.”

³⁰ (Tititenai “apa tü angei onthso noin” ta ngiom shioko Yisuüh nung ngiom.)

Yisu Nyiu naiuso Nioso

³¹ Yisu nyiu naiuso nioso shikü, kamai tsakü apa jonao hong.

³² Hoi nou apa lemkü mokkü noiküla, naiuso ngüsoüh apa tü ngioji, “Athaplu, anyiu naiuso aniosoüh kamai ni tü yamji.”

³³ Yisuüh ngüso tü thalakü ngiom, “Jü nyiu naiuso jü nioso sauhai?”

³⁴ Apa lemkü moknoitsünso tü thapkü apaüh ngiom, “Athaplu! Jü nyiu naiuso jü nioso nungso noin.

³⁵ Tititenai sauhaiüh Goa nou mongchiotsün chhi-e, pohai lüko, nyiuhai lüko, nung jü nyiu naiuso jü nioso.”