MARKƏ 3 - JAA TƏMARWAŊ

¹ Yeesu haraŋ hõy bə ɗe a kele giidə *kuli bə toose kə kaanə Ziwifiŋa. Hulum kəman ada kəəsu wəra gə mee-me.

² Kaa gə minti a jəŋ gil adaŋ gə balə-bele minti té gaw də kel səm moŋ, yə əsəŋ bə gulu anə ɗeketi minti wə seere kasi hulum yaŋ wəra dər *hi bə faake kə Pepeŋa mo?

³ Kəya, wə waataŋ hulum bə kəəsu gə mee-meŋ minti: «Faa la wəra apəya anə ɗal gil aduuba.»

⁴ Yeesu laŋ ku kaŋ minti: «Dər hi bə faakeŋaŋ, kəkəy bə ayə-aye haa minti tam jəə hulum la pisi mo, ɗalba jəw la baymele mo? Tam siiru dədərgə du la wəra mo, awə la wəra mo?» Kəya hulum bəŋəŋ ku wəra anə ɓehi ba.

⁵ Wə haŋ duru, wə gulnuy, wə gulnuy wəra bə kolə-kole waŋ. Wə laawaŋ wəra hasi gud ku tərməyəy də hẽŋə-hẽŋeŋa. Kəya wə waataŋ hulum minti: «Ɗekrə kaasam la warna». Hulum ɗeŋ a ɗekre kəəsu warna anəkay, yə haraŋ wəra dədərgə faɗi.

⁶ Kəya kaanə *Farisiyeŋ vaŋ warda giidə kuli bə tooseŋ da. Yə raawaŋ sar kaa gə gud *Erodiŋ faɗi bə ɗe a tepe kuy diiri cəərə hel də minti té awə Yeesu la wəra dəərəŋ.

Kaa ablaw bi sar Yeesu

⁷ Yeesu kooroŋ də *kaa gə guuduŋ warna ku kan kəmtəŋ na. Kaa kə ablaw kooroŋ guudu na, yə haa kaa gə minti pəətəŋ Galile da, Zude da,

⁸ Zeruzalem da, giidə seŋka də Idume da, giidə seŋka də minti warna cakaɗi cəərə vor bə Zurdeŋ na, giidə kuli bə giidə kaɗəkaw karra-karri sar anə vil də Tiraŋ daana də Sidoŋaŋ gəm. Kaa teŋ pəətəŋ suru da haa gud bə minti yə a əskətəŋ sam kar gə minti wə jiitiniy gila keɗeŋ.

⁹ Kəya wə waataŋ kaa gə guuduŋ minti yə malə turti la wəra a tó ta'i, kir minti kaa kə ablaw a hebe tó ba.

¹⁰ Yeesu waataŋ bədoona haa gud bə minti wə seereŋ kaŋ ablaw tə bə moŋ, kaa gə minti də ɗemeŋ keɗe əsəŋ bə lupi da kar də kumsi da anə faɗ-faɗi minti té bəə la a malte kasi té suru.

¹¹ Bə minti kəwal gə cəərə kaŋ asaŋ Yeesu ne anəkay, yə feke kəmnə diŋ də gigiiri tiinu, yə naakte kuy kəwəŋ-kəwəŋ minti: «Tam kəna Kormə Pepeŋ».

¹² Səma Yeesu ləytənəy wəra ablaw minti yə a ge gud tó wəra ba.

¹³ Kəya wə kooroŋ bə ɗe a li warna cəərə pərki kəman na. Wə mantaŋ kaa gə minti wə də caadiŋ warda. Yə bəŋ suru da,

¹⁴ kəya wə ŋamtaŋ kaa hor ciiri ɓasi, [wə məntənəy minti «*kaa kə vaa-veŋ».] Wə minti yə jəə la sar tó, tó fəkəy warna bə ɗe a waate kel wəra a kaŋ,

¹⁵ də abay də pi kəwal gə cəərə kaŋ wəraŋ kəəsi ada gəm.

¹⁶ Kaa hor ciiri ɓasi té gə minti wə ŋəmtənəy, haa anə Simoŋ, (wə məlnu sam minti Piyer),

¹⁷ Zaki, kormə Zebedeŋ, də siinu Zaŋ (wə məlaŋ sam teŋ minti Bowanergesi, gud sam toŋ minti «Karmə təbay də koŋ»),

¹⁸ Andere, Filipi, Bartelemi, Matiye, Tomasi, Zaki kormə Alfeŋ, Tade, Simoŋ bə minti bele seŋka nuutuŋ ablaw,

¹⁹ daana Zudasi Iskariyoti, haa toŋ anə derra bə minti bə ɗe a aye Yeesu wəra a kaa kə acukur nuutuŋ.

Yeesu hare kel a kaa gə minti gaw də kel

²⁰ Yeesu haraŋ bə koore da aker da. Kəya kaŋ haraŋ bə taare ablaw cuuru ha'aŋ, paapa ba ga'i ba. Kəya anə Yeesu də *kaa gə guuduŋ nəkaŋ bə fele ko bə hame karman pəda.

²¹ Bə minti kaa kə kusul-kusul nuutuŋ əskəŋ bədoona kəyaŋ, yə kooroŋ da bə bi a daw warna də waŋ, gud maa mo yə ɗəkəŋ minti cuuru əsəŋ bə ɓalke wəra haa ɓalke.

²² *Kaa kə hate ku gili kə Pepeŋ gə minti a pətəŋ Zeruzalem daŋ, əsəŋ bə waate gəm minti: «*Belzebul, kumna kə kəwal, bə vaa-ve cuuru», daana pa minti: «Əynu abay də sərməy haa tó toki gəm.»

²³ Kəya Yeesu məntənəy da, wə əsəŋ bə wəətiya də *ku kumti minti: «*Sataŋ neke bə sarme kusrə tá toki haa naanaanə mo?

²⁴ Aŋ golə laŋ, kaa gə minti giidə seŋka kə kumna bə məna'i haraŋ ne bə duuri aduubə də kumsi té tokiŋ, seŋka taŋ bə ji lam pəda.

²⁵ Kaa gə minti ger kusri akera haraŋ ne bə duuri də kumsi tokiŋ, kuli toŋ bə ji ada laki pəda gəm.

²⁶ Sə a jəəne minti Sataŋ hare a waŋa haa də kusrə tokiŋ, daana giidə səɓaki naataŋ ɓarsaŋ ne wəraŋ, kumna naata bə gerge a ko pəda, cuuru awe a ko toŋa faɗi.

²⁷ Ana pa ha'aŋ, hulum neke bə kele ger hulum bə səɓakiŋ na bə ɗe a humi kar nuutuŋ warda bay bəŋu wəra ba. Wə bəŋnu ne wəra taŋ, wə neke bə humi kar nuutuŋ kəm bədoona.»

²⁸ Kəya Yeesu wəətənəy pa minti: «Gəəzi ten waataŋ, baymele bə minti kaŋ juunu daana kel gə minti yə wəətənəy bə sarte sam Pepeŋ, jəə la nuutu ablaw naanaanə ɗaw, vəəgə bə giidu yaŋ cəərə kel teŋa.

²⁹ Səma hulum bə minti sarte sam Tiiru Cetcetaŋ, vəəgə bə giidu paapa cəərə kel teŋa ba anə hasi, wə haŋ cuuru haa baymele bə bay teweŋ faɗi.»

³⁰ Yeesu wəətənəy bədoona ana haa gud bə minti kaa kə hate ku giliŋ a waataŋ da minti kəwal cuuruŋ.

Kusul də Yeesu gə gəəzə-gəəziŋ

³¹ Kəya nər Yeesu də kəsəənuŋ tuluŋ ada, yə əsəŋ warda anə laki tiilim da, yə gaŋ hulum minti wə ɗee la a məntu da a té.

³² Kaŋ ablaw gə əsə-isi wəra cuuru ɓəki, kəya yə bəŋ a wəətu minti: «Ba'i kəm baŋ, anə nərəm yaŋ kəna laki tiilima də kəsaanam, yə mantam.»

³³ Wə hərnəy kel minti: «Nərən haa mindi mo? Kəsaanan haa anə mindi mo?»

³⁴ Kəya wə cəmaŋ duru anə kəla'-kəla'i cəərə kaa gə minti gə əsə-isi cuuru wəra ɓəki lakaŋ, wə wəətənəy minti: «Laki kənaŋ haa anə nərən də kəsaanan faɗi.

³⁵ Gud maa mo, mindi mindi mo bə minti ji karman bə minti giidə Pepeŋ bəluŋ, hulum toŋ haa seenən, nawrən, nərən faɗi gəm.»