MARKƏ 15 - JAA TƏMARWAŊ

Yeesu tiinə kumna Pilati

¹ Bə minti koŋ bə jeme da warda rəf-rəfiŋ, kəkamna kə *kaa kə keere Pepeŋ, kaa kəmtəŋ gə tiinə kaanə Ziwifiŋ daana *kaa kə hate ku gili kə Pepeŋ, haa *kaa kəmtəŋ gə jeme kəəti kə kaanə Ziwifiŋ, yə təpaŋ bə ke dər kela. Yə doŋ Yeesu, yə bəŋnu wəra baŋi, kəya yə kooroŋ a əyu a *Pilati, kumna bə minti Sezar usnuŋ.

² Pilati ləənu ku minti: «Tam haa kumna kə kaanə Ziwifiŋ mo?» Yeesu hərnu du minti: «Tam waataŋ haaŋa.»

³ Kəkamna kə kaa kə keere Pepeŋ kəənu də kel ablaw faɗi.

⁴ Pilati haraŋ bə law ku pa minti: «Tam paapa kir hare kel ba anə faɗi? Kel gə minti yə kaanam diiri gilaŋ keɗe, tam bə əskə-əski diiri bə mo?»

⁵ Səma Yeesu haraŋ kel ba tə bə moŋ, ŋələŋ Pilati ablaw faɗi.

⁶ Ana dər *kəɗwəy gə Pakiŋa saksaki ha'aŋ, hulum bə daŋgay bə minti kaa kə ablaw bele minti Pilati gaw la wəraŋ, wə gay di warda.

⁷ Də ko toŋ ha'aŋ, hulum kəman bə feke agum a kaa, səmu Barabasi, a daŋgaya də kumsə kaa kə feke kaŋ kardə kumsi, gə minti a awaŋ hulum a kəkəy bə minti yə a gaŋ waŋ sar kəkamnaŋaŋ.

⁸ Kəya kaa kə ablaw kooroŋ ger Pilati na bə ɗe a wəətu minti wə jəə kel gə minti wə a dayday bə jiyaŋ la a té.

⁹ Pilati hərnəy kel minti: «Aŋ bele minti ten gaa la warna haa kumna kə kaanə Ziwifiŋ mo?»

¹⁰ Wə waataŋ bədoona gud bə minti wə asaŋ wəra minti kəkamna kə kaa kə keere Pepeŋ jəw haa sərkə du bə minti yə bəŋ a əyu a toŋ.

¹¹ Səma kəkamna kə kaa kə keere Pepeŋ əsəŋ bə ke ku kaa kə ablawa minti yə waatə la minti wə gaa da warda haa Barabasi ɗaw.

¹² Pilati haraŋ bə lay kuya minti: «Hulum bə minti aŋ məntu minti kumna kə kaanə Ziwifiŋ, aŋ gə balə-bele minti ten jəə toŋ la naanaanə mo?»

¹³ Yə hərnu kel də naakte bə kuŋ faɗi minti: «Ɓəlu la wəra a kəbaŋ gə largaŋa ɓele!»

¹⁴ Pilati ləənəy kuy pa minti: «Wə jəŋ maa bə baymeleŋ mo?» Yə zeŋ naakte bə kuy máŋ pisi ze minti: «Ɓəlu la wəra haa ɓele!»

¹⁵ Pilati bə balə-bele minti kaŋ a ɓalke də tó ba ŋaanaanə moŋ, wə gəənəy Barabasi warna faɗi. Wə vaŋ sootoŋ bə witi Yeesu də keleki, adoro wə əynəy di minti yə ɗee la a ɓəlu wəra a kəbaŋ gə largaŋa.

Kəsootoŋ mele kaŋkəlaŋ kəjəm cəərə Yeesu

¹⁶ Kəsootoŋ kooroŋ də Yeesu giidə kuli kə kumna Pilatiŋ, a ko bə minti yə məntu «Peretəwar». Kəya yə mantaŋ kəsooto gə minti yə də kumsiŋ warda siri da keɗe.

¹⁷ Yə dərnu dəməəmə hərlə suru, yə ləpaŋ kəjəm lapi, yə ɗəknu cuuru diiri.

¹⁸ Kəya yə əsəŋ bə le kəəsi faɗi bə waate minti: «Suuse nəmti kumna kə kaanə Ziwifiŋ!»

¹⁹ Kəya yə əsəŋ bə wutu cuuru də seeka, bə tuftu kiɗikiŋa suru, bə feke də gigiiri tiinu minti té haw cuuru apəya.

²⁰ Yə awtaŋ hin wəra cuuru pis-pisi kəyaŋ, yə bəŋ dəməəmə hərlə də suruŋ wəra, yə hərnu dəməəmə nuutuŋ suru. Kəya yə duunu, yə kooroŋ warna duuru bə ɗe a ɓəlu wəra.

Kəsootoŋ ɓele Yeesu wəra a kəbaŋ gə largaŋa

²¹ Bə minti yə bə ɗe naŋ, yə ŋəfaŋ də hulum kəman, səmu minti Simoŋ. Wə haa hulum bə Siren, wə haa bar anə Aleksandərə də Rufusi. Wə a jəŋ maska da. Kəsootoŋ həənu guudu bə he kəbaŋ gə larga kə Yeesuŋa.

²² Yə kooroŋ də Yeesu a ko kəman na yə məntu minti Golgota, gud sam toŋ haa minti ko haŋ kəskəŋ gə cə.

²³ Bə minti yə tuluŋ warna ada naŋ, yə əynu kumuy bə atələələma bə tapə-tepe duru də kaɗəkaw kəman, yə məntəy «mir». Səma wə doŋ haa bə saw ba.

²⁴ Kəya yə ɓəlnu wəra a kəbaŋ gə largaŋa, adoro yə jəŋ kooya bə siisi bə ɓarse dəməəmə nuutuŋ wəra a kusri.

²⁵ Yə ɓəlnu wəra haa bəbəgi də cəwa də kəccəŋ.

²⁶ Yə ɓəlaŋ karmə kəbaŋ anə pempereŋa cəərə kəbaŋ gə largaŋa, yə jeereŋ kel gə minti yə əwnu wəra guudiŋ ada minti: «Kumna kə kaanə Ziwifiŋ.»

²⁷ Yə ɓaltaŋ kaa kə dəgaaya suru ada ɓasi gəm, məna a kəəsu kemera, naytoŋ a kəəsu guluŋa. [

²⁸ Jeere bə giidə Kefter kə Pepeŋ doŋ ku wəra haa bədoona. Yə minti: «Yə əŋkunu adəwaldə kaa kə bayməlaŋa.»]

²⁹ Kaa gə minti bə feke a kəkəy toŋa sərtunu bə le ciiri le bə anə lam minti: «Tam! Tam bə minti pokte *Kuli kə Pepeŋ wəraŋ, dər hiti soope tam hare bə hursuŋ,

³⁰ vaa da warda a kəbaŋ gə larga da bə seere kusrum wəra tam də kusrum bə pə mo!»

³¹ Kəkamna kə *kaa kə keere Pepeŋ, də *kaa kə hate ku gili kə Pepeŋ əsəŋ bə dəfɗu aduubə də kumsi minti: «Wə seerteŋ kaa kaayaŋ wəra, wə neke bə seere kusru pədaŋŋa!

³² Wə *Hulum bə minti Pepeŋ ŋəmnuŋ, kumna kə kaanə *Israyel tə kəm, wə vaa da warda a kəbaŋ gə largaŋ da hebkəna da faɗi! Are asaŋ neŋ, are de guudu kəm ta.» Kaayaŋ gə minti gə ɓaltə-ɓalte suruŋ əsəŋ bə sərtu gəm.

Me də Yeesu

³³ Ɗeŋ a deye daaway ɗeker, koŋ gaŋ giziɓi wəra cəərə seŋka taŋa keɗe hãã də cəwa də le kaaraŋ aker daŋ.

³⁴ Də cəwa taŋ kəyaŋ, Yeesu naaktaŋ ku də kuy minti: «Eloyi, Eloyi lama sabaktani?» Haa minti: «Pep katən, Pep katən, tam ŋoryonon wəra səm mo?»

³⁵ Sərdə kaa gə minti a jəŋ adaŋ əskəŋ kel teŋ kəyaŋ, yə minti: «Aŋ golə laŋ, wə bə mante *Eli!»

³⁶ Hulum guudi gədaŋ də tara, wə kəlaŋ kosooso dər kumuy bə atələələm bəlan-bəlani da, wə kəpnu ku seeka kapi, wə əynu a Yeesu minti wə suɓu la. Wə minti: «Aŋ anə ba'i, áŋ ase yaŋ jəənə minti Eli bi a surku warda a kəbaŋ gə largaŋ daŋ.»

³⁷ Səma Yeesu naakaŋ ku koloŋ, wə guɓuŋ duru faɗi.

³⁸ Də ko toŋ anə derra Zeruzalemaŋ, dəməəmə mooto də minti də gaa-ge giidə *Kuli kə Pepeŋaŋ məlaŋ caareŋ apəy da, vaŋ wəra adawra no'-no'i.

³⁹ Kumna də sooto kəsaŋ bə minti a jəŋ gil tiinə Yeesu asaŋ kəkəy bə minti wə meŋ duuru bədoonaŋ, wə minti: «Hulum toŋ a haa Kormə Pepeŋ gəəzi!»

⁴⁰ Kəram kəman a jəŋ a ko toŋa gəm, yə a gə əsə-isi warda anə tooto laki bə gole da. A jəŋ aduubə di ha'aŋ Mari də giidə wəlasi də Magdalaŋ, Mari nər anə Zose də Zaki bə minti yə məntu Puranul. Salome a jəŋ ada gəm.

⁴¹ Haa kəram gə minti a jəŋ gə tapə-tepe guudu bə minti wə a Galileŋ, yə juunu guudu gəm. Kəram gaalaŋ gə minti a təpaŋ guudi bə koore duuru Zeruzalem, yaŋ ada bə gulu gəm.

Yə ge titi də Yeesu a tələŋkə

⁴² Hi toŋ a ha'aŋ *hi bə faake kə Pepeŋ a dibiinimaŋ. Wə a haa hi bə minti kaŋ ɗampe wəra bə kəɗwəy duruŋ gəm. Cəwaŋ wəra bə dere səm moŋ,

⁴³ Zosefi bə giidə vil də Arimateŋ tuluŋ. Wə aduubə də *kaa kəmtəŋ gə jeme kəəti kə kaanə Ziwifiŋa, kaŋ humi kosoŋ cuuru faɗi. Wə a də kusru gəm bə mi haa hi bə minti Pepeŋ bi a hame kumna nuutuŋ duruŋ. Wə doŋ giidu doo kəyaŋ, wə kooroŋ ger *Pilati bə ɗe a mante titi də Yeesu.

⁴⁴ Pilati əskəŋ kay minti Yeesu wəra bə mee-me ɗaw, wə ŋələŋ. Wə gaŋ hulum a mante kumna də sooto kəsaŋ da, wə bəŋ a law ku minti Yeesu meŋ wəra haa dendel mo?

⁴⁵ Bə minti kumna də sootoŋ tupnu bəlam də kel topiŋ, wə ayaŋ kəkəy a Zosefi minti wə ɗee la a haw titi du.

⁴⁶ Zosefi gusuŋ ladəra də awəy-awəy kəəsu na, wə ɗeŋ a sorke titi də Yeesu warda a kəbaŋ gə largaŋ da. Wə hayɗəna hayɗa, wə ɗeŋ a gaara giidə tələŋkə kəman də ceɗə-ceɗe kəəyə pərkiŋa. Adoro wə laktaŋ pərki boblo bə ceɗə-ceɗe bə gisə kuŋ.

⁴⁷ Mari də wəlasi də Magdalaŋ daana Mari nər Zose, bə gole ko bə minti wə bə gawa adaŋ gəm.