Filemoni 1 - Omulago Muhya 1946 (Kikahindurwa mu Kikerewe)

FILEMONI NA ONEZIMO.

¹ Paulo, embohe ya Yezu Kristu, na mutabani wabo Timote, hali Filemoni mwendwa, omuhwezi wetu,

² na hali Apya, omuhara wetu mwendwa muno, na hali Alikipo, owezaso w’obulemo, na hali eklezia eli mu ka yawe.

³ Mungu Tata wetu n’Omukama Yezu Kristu babahe enema n’omulebo.

⁴ Nkusima Mungu wange, ninkwizuka bucha bucha mu sala zange,

⁵ kuba nkuhuliza obwenzi bwawe no kwikiriza kwawe ha Mukama na ha batakatifu bona,

⁶ n’obugabi bwawe, obukuruga mu kwikiriza, obumanyisibwa ebikorwa bizima by’enganda ningi, ebikukorwa owawe muli Yezu Kristu.

⁷ Kuba nkasemererwa nimpumuzibwa muno obwendani bwawe, kuba emitima z’abatakatifu zikahumuzibwa iwe, mutabani wetu.

⁸ Nicho, naho ndi n’obuhicha bwona muli Yezu Kristu bwo kukulagira ebilagirwe,

⁹ hakili nkulembereze ha bw’obwenzi bwange hal’iwe, naho oli nk’okw’oli, n’ene ndi mugurusi, kai hati mbohe ya Yezu Kristu.

¹⁰ Mbe nkukusabira omwana wange Onezimo, owe nazalire mw’ibohero.

¹¹ Akakugasira kara, nawe hati akugasira ine n’ewe.

¹² Nkukumusubya. Omwanankule kuzima, nk’omutima gwange.

¹³ Sanga ninenda kumwangira, ankolere akalimo ha mwanya gwawe mw’ibohero lyange, elyo nkwemera kuber’Evanjeli;

¹⁴ nawe tinayenzile kukola kintu, ntakubulize, oyehinde omwene kukola ekizima echo, nawe kuti mani pai.

¹⁵ Kuba hamo akatagana n’ewe mwanya munoro, osube kumubona mu myaka ezitalihwaho,

¹⁶ kai hati nk’omwiru pai, nawe ha mwanya gw’omwiru, yabere mutabani wetu mwendwa, owetu nikwo, nawe muno muno owanu, ha bw’engingo na ha bw’Omukama.

¹⁷ Mbe raba nombara nk’owanu, omwanankule nk’ene omwene.

¹⁸ Akaba yakuhenere hamo ali n’ibanza hal’iwe, obimbalire ine.

¹⁹ Ine Paulo, nkukwandikiza omukono gwange; ndikurongora, leka ntakugambira nti: iwe omwene oli n’ibanza hal’ ine.

²⁰ Nikwo, mutabani wetu, ompe obusemererwa obwo mu Mukama; chuleza omutima gwange mu Mukama.

²¹ Nkukwandikira ninesigirira obuhulizi bwawe, nimmanya okwo olakola kukiraho ebyo nagamba.

²² Kandi onchumire aho kutura; kuba nkutegeza kusubibwa hal’imwe, kuber’esala zanu.

²³ Epafrasi, owezasu w’ibohero muli Yezu Kristu, nakubwacha,

²⁴ hamo na Marko, n’Aristarki, na Demasi na Luka, abahwezi bange.

²⁵ Enema y’Omukama wetu Yezu Kristu ebe n’omwoyo gwanu. Amina.