Wlɛfeleseɔn 18 - Ku̍o̍ Delee 1999

Nyɔsoa gbɔ̀lɔ Babeloun wlɔ̀-ɔ

¹ Ɛ̀ la ɛ̍ wɔ̀-a nɛ-ɛ, wɛ̀ ǐn jě Nyɔsoa-a ǐnchɔ̀ dɛɛ, nɛ̀ ɛ̍ sɔ dě ja̍i̍wlɔ̀ ɛ̍ ji̍ nɔ̌ sɔ̀n. Iě ɛ̍ blě tùn ɛ̀ ku̍-a wɔ̍n-ɛ, wɛ̀ ɛ̍ tìh-a i̍ bɛ̌-ɛ wɔ̀ sɔ̀npli ɛ̍ nu̍ bloa̍-a pɔ̀ɔ̀.

² Wɛ̀ ɛ̍ we̍le, ɛ̍ la̍a̍, “Babeloun wlɔ̀ wa̍ wɛ̀. Ɔ̀ ku̍-a wɔ̍n de-ɛ, ɔ̍ wa̍ wɛ̀. Dǒ ɔ̍ di̍i̍ nu̍ jeědih-a tǐn la̍-a wɛ̀. Ɛ̍ nu̍ kà kɔn jeědih ke na̍wɛ̍ᵻ ìh nyɔ̍gbei faɛn-aɛ, i̍h-a tǐn la̍-a wɛ̀.

³ Dɛ̍nu̍ɛ, ɔ̍ nu̍ ɛ̍ iě bloa̍ kli̍hgbɛ̍ nu̍ gbǎn ka nyɔ̍ sìèè nyɔ̍-a chɛ̀ wɔ̍n kma nmɔ̍ wlì-ɛ. Ɔ̍ ke kmɔ̌-a blǔh baaᵻ nu̍ gbǎn. Wɛ̀ kmɔ̌-a pɛlǔh po̍ nyɔ̍ kli̍hgbɛ̍ pàn ka dǒ ɔ̍ dɛ̍ᵻ sɔ̀nᵻ nu̍-ɛ we̍.”

⁴ Wɛ̀ ǐn wɔ̌n wlu̍ dɛɛ ɛ̍ sɔ dě ja̍i̍wlɔ̀. Ɛ̍ la̍a̍, “Ǎn nyɔ̍, mɔ̀ sɔ dǒ ɔ̍ we̍-e, wɛ̀ mɔ̀ɔ̍ je̍e ɔ̍ gblɛ̍n sɔ̀ɛ̀n gbǎ. Wɛ̀ ɔ̍ ke mɔ̀ɔ̍ je̍e kàn gbɛ̍n-ɛ.

⁵ Dɛ̍nu̍ɛ, ɔ̍ gblɛ̍n sɔ̀ɛ̀n tìèe̍-a dlǔ i̍-ɛ, i̍h jɛɛ ja̍u̍n. Wɛ̀ ɔ̍ gblɛ̍n sɔ̀ɛ̀n-a tìh sǐ ka dǒ Nyɔsoa wlì i̍.

⁶ Ɛ̀ kɔn taǐn wlɔ̀ laa̍ ɔ̍ nu̍-a mɔ̀ pùn-ɛ, ɛ̍ bo mɔ̀ iě ɔ̍ pùn nu̍ ke. Mɔ̀ nu̍ ɔ̍ pɛ̌ɛ-a gbɔ̍ᵻ sɔɔ̌n dǒ dɛ̍ ɔ̍ nu̍-a we̍. Jǐ-i ɔ̍ kàu̍n dǒ nmɔ̍ ɛ̀ kma-a i̍-ɛ we̍, ɛ̀ mu̍-a ɔ̍ naɛ nmɔ̍ ɔ̍ po̍-a gba̍a̍ dǒ mɔ̀ we̍-ɛ sìì-ɛa gbɔ̍ᵻ sɔɔ̌n nu̍-ɛ.

⁷ Ka ɔ̍ bɛ̌-ɛa ɔ̍ chɛ̀ i̍ iě ɔ̍ naɛ-a dě kmɔ̌-a gbà ja̍-ɛ, kǎ mɔ̀ iě ɔ̍ jua̍i̍ sàɛ̀ ke sùàɛ̀n pa̍-a we̍ ja-a nu̍ ke. Dɛ̍nu̍ɛ, ɔ̍ chɛ̍n ko̍o̍, ɔ̍ la̍a̍, ‘Mɔ̍ la ǐn kɔn bloa̍ wlu̍ i̍. Ǐn se̍ tèwànynɔ̌, sùàɛ̀n pa̍-a se̍ gba̍ ǐn we̍ ji̍.’

⁸ Ɛ̍ kɔn wlɔ̀ la dlǐ dɛ̍ᵻá mu̍ ɔ̍ we̍ ji̍ dǒ weɛ̍ due di̍i̍. I̍h-i bo ìh nu̍-a wɛ̌ᵻ ke sùàɛ̀n pa̍-a ke mɔ̌-a gbǎ-a. Nɛ̍-a mu̍ ɔ̍ fɔ̍n, dɛ̍nu̍ɛ, Joi Nyɔsoa ɔ̀ sà-a ɔ̍ kɛ̀n-ɛ, ɔ̍ blě gbǐh.”

⁹ Blǔh baaᵻ nɛ-a da̍a kmɔ̌ we̍ ùh ke ɔ̍ nu̍-a gbǎn ke dɛ̍ᵻ sɔ̀nᵻɛ́, nɛ̍ ɛ̀ mu̍-a ɔ̍ fɔ̍n-ɛ, pò u̍h jě ɛ̍ daluh-ɛ, nɛ̀ u̍h-a mu̍ we̍le u̍h iě fìn.

¹⁰ U̍h-a mu̍ nya̍ nyna-ɛ, dɛ̍nu̍ɛ, u̍h se̍ pɔ̀n u̍h iě jua̍i̍ sàɛ̀ ke. Wɛ̀ u̍h iě ka dǎ, “Chlě dǒ ìn we̍ Babeloun wlɔ̀. Mɔ̀ ɔ̀ nu̍-a tùgbàwlɔ̀ ɔ̀ ku̍-a wɔ̍n iě ɔ̀ kɔn-a gbǐh-ɛ, mɔ̀ bo gba̍i̍gba̍ se̍ gba̍i̍ bla̍ sǔh wɛ̀ ɔ̀ gbɛ̍n-ɛ kàn ae?”

¹¹ Kmɔ̌ la ɛ̍ pɛlǔh po̍ nyɔ̍-a mu̍ fìn u̍h iě sùàɛ̀n pa̍, dɛ̍nu̍ɛ, nyɔ̍ se̍ nɛ u̍h iě u̍h-a blewi̍h tɛ̀n dɛ fu̍u̍.

¹² U̍h-a blewi̍h nu̍-a kòo̍ ke, sebla̍ ke, sɔɔ̌ᵻ maloo ke, wli̍h ke, flɛmɛ̍ jlii̍ ke, jlii̍ ìh gbǎ-a dɛ̍kɛ̍n-ɛ ke, nɔ̌ chɛ̀ tu̍ᵻ kaɛn kaɛn ke nyɔ̍ se̍ i̍h tɛ̀n. U̍h-a dɛ̍ᵻ ìh nui-a do̍ɛ̍ᵻ nynɛ̌-ɛ ke, tu̍ᵻ pɔ̌ᵻ ìh gbǎ-a dɛ̍kɛ̍n-ɛ ke, tìɛ̀nᵻ ke, nɛ̍ne̍ɛ̍ᵻ ke gbɔ̀plu̍ sɔɔ̌ᵻ u̍h-a ple̍-aɛ, nyɔ̍ se̍ i̍h tɛ̀n ke.

¹³ Ɛ̍ ke smǎ chɛn-ɛ dɛ̍ᵻ ke, fɔ̍n-ɔ nɔ̌-dɛ̍ᵻ ke, chò ke, sùè chlǎn ke, nmɔ̍ ke, chlǎn ke, kwǐ kɛnɛ̌ ke blèe̍ pèbèè chɛ̀ ke, ɛ̍ ke bliᵻ ke, blawɛ̌ᵻ ke, soo̍bliᵻ ke kɛ̍n naɛdɛ̍ᵻ nɛ-a dǒ i̍h gbɔ̀ i̍-ɛ ke kèi̍ᵻ ke, nyɔ̍ duuh ke u̍h-a ple̍-dɛ̍ᵻ bo kli̍hgbɛ̍.

¹⁴ Wɛ̀ pɛlǔh po̍ nyɔ̍ la̍a̍ dě ɔ̍ we̍, “Dɛ̍ᵻ chɛ̀ kli̍hgbɛ̍ ìn gble-a iě ìn blě-aɛ, i̍h sɔ ìn kwa̍a̍ wɛ̀ wa. Àn pàn-a ke àn kmɔ̌ we̍ dɛ̍ᵻ kli̍hgbɛ̍ mǎ wɛ̀. Ìn se̍ i̍h de̍ jě mu̍ dɛ kleǐnklein.”

¹⁵ Pɛlǔh po̍ nyɔ̍ ùh jě-a tùgbàwlɔ̀ laa̍ dɛ̍ we̍-ɛ, u̍h-a mu̍ nya̍ nyna-ɛ, dɛ̍nu̍ɛ, u̍h se̍ pɔ̀n u̍h iě jua̍i̍ sàɛ̀ ke. U̍h-a mu̍ fìn u̍h iě sùàɛ̀n pa̍.

¹⁶ Wɛ̀ u̍h iě ka dǎ, “Chlě dǒ tùgbàwlɔ̀ ɔ̀ ku̍-a wɔ̍n-ɛ we̍, mɔ̀ pa̍-a flɛmɛ̍ chɛ̀ ke jlii̍ sàɛ̀n ìh gbǎ-a dɛ̍kɛ̍n-ɛ, iě ìn pɛ̀ɛ̀-a kòo̍ ke, sɔɔ̌ᵻ maloo ke wli̍h de-ɛ.

¹⁷ Pàn-dɛ̍ᵻ kli̍hgbɛ̍ la bo gba̍i̍gba̍ se̍ gba̍i̍ bla̍ wɛ̀ i̍h mǎ ka.” Niɔ̍ mɛɛ̍ᵻá chapeᵻ ke, wìèlè mu̍ nyɔ̍ ke, mɛɛ̍-a dbo̍ we̍ nui nyɔ̍ ke, jbǒ kɛ̍n pɛlǔh po̍-e nyɔ̍ ke u̍h-a mu̍ nya̍ nyna-ɛ.

¹⁸ Nɛ̀ pò u̍h jě ɔ̍ si̍n-i nɛ̍-a daluh-ɛ, wɛ̀ u̍h iě we̍le. Nɛ̀ u̍h-a mu̍ ka dǎ, “Tùgbàwlɔ̀ dɛɛ se̍ nɛ ɔ̍ ke tùgbàwlɔ̀ la ɔ̀ ku̍-a wɔ̍n-ɛ iě wɔ̀ɛ.”

¹⁹ U̍h-a mu̍ fìn, u̍h iě sùàɛ̀n pa̍, wɛ̀ u̍h iě blǔh dlǔ po̍. Nɛ̀ u̍h-a mu̍ ka dǎ, “Chlě dǒ tùgbàwlɔ̀ la ɔ̀ ku̍-a wɔ̍n-ɛ we̍, ɔ̀ kɔn di̍i̍ niɔ̍ mɛɛ̍ᵻ blě nyɔ̍ kli̍hgbɛ̍-a sà-a pàn-a de dǒ ɔ̍ pàn-dɛ̍ᵻ we̍-ɛ. Ɔ̍ bo gba̍i̍gba̍ se̍ gba̍i̍ bla̍ ɔ̀ wa̍ wɛ̀.”

²⁰ Ja̍i̍wlɔ̀, nmɔ dǒ ɔ̍-ɔ gbɔ̀lɔ-ɛ we̍. Nyɔsoa-a nyɔ̍ ke, ɔ̍ tu̍owli po̍ nyɔ̍ ke, Klai-a gba̍tòà, mɔ̀ nu̍ mɔna̍ ke o. Dɛ̍nu̍ɛ, Nyɔsoa gbɛ̍n ɔ̍ kàn wɛ̀ dǒ dɛ̍ ɔ̍ nu̍-a mɔ̀ pùn-ɛ we̍ o.

²¹ Wɛ̀ kmu-u ǐnchɔ̀ dǔ sɔɔ̌ ɛ̀ ke dui-sɔɔ̌ klaa beɛ̍ɛ-aɛ, iě ɛ̍ po̍ ɛ̍ jbǒ kɛ̍n. Wɛ̀ ɛ̍ la̍a̍, “Kǎ Babeloun ɛ̀ nu̍-a tùgbàwlɔ̀ klaa-ɛ, ɔ̍ kloǒ-a mu̍ wa̍-a nu̍. Nɛ̀ ɔ̍ se̍ jě-ɛ mu̍ dɛ kleǐnklein.

²² Kain-a wlu̍ ke, ble̍-wlu̍ ke, pànkɔɛ̍-a wlu̍ ke, dɔ̍gbɛ̍-a wlu̍ se̍-e wɔ̌n-ɛ mu̍ dɛ dǒ ìn di̍i̍. Dbo̍ nu̍ nyɔ̍ se̍ gba̍ dbo̍ nu̍ dɛ dǒ ìn di̍i̍. Nyɔ̍ se̍ gba̍ dɛ̍ du̍ wlu̍ wɔ̌n dɛ dǒ ìn di̍i̍.

²³ Chlǎn nape̍-a sɔ̀npli se̍ gba̍ fa̍n dɛ dǒ ìn di̍i̍. Nynɔ̌ delee ke kɔan delee-a wlu̍ se̍ gba̍ wɔ̌n-ɛ mu̍ dɛ dǒ ìn di̍i̍. Àn pɛlǔh po̍ nyɔ̍ bo ùh ku̍ wɔ̍n de nɔ̌ kmɔ̌ kli̍hgbɛ̍ la we̍, wɛ̀ àn wù po̍-ɛ boe bloa̍ kli̍hgbɛ̍ i̍.”

²⁴ Dǒ ɔ̍ di̍i̍ bo Nyɔsoa-a nyɔ̍ ke ɔ̍ tu̍owli po̍ nyɔ̍-a nymɔ̍ wlǎ-ɛ i̍, ɛ̍ ke nyɔ̍ kli̍hgbɛ̍ ùh dbǎ-ɛa da̍a kmɔ̌ we̍-ɛ ke.