2 Timote 1 - Ku̍o̍ Delee 1999

¹ Mɔ̍ Pɔɔ, ɛ̍ nu̍ Nyɔsoa-a wlùh iě Jusu Klai-a gba̍tòà nu̍ dǒ kmɔ̌ kɔn wlu̍ ɔ̍ po̍-a tɔ̀ma̍a̍-a kɛ̍n dě Jusu Klai ja̍a̍.

² Wlu̍ la ɛ̍ mu̍ dě ǎn tìh kma jǔ Timote we̍. Ǎn sà nǐ wɔ̍n Baa Nyɔsoa ke à Joi Jusu Klai-a blɛ ke wɔɛ ke wlùh-a i̍ tè-ɛ iě dǒ ìn we̍ nɛ.

Pɔɔ fùka Timote-a wlùh

³ Ǎn dbee Nyɔsoa jǔ dǒ kɛ̍-ɛ wɛ̀ wlùh we̍, kǎ ǐn baaᵻ nu̍. Ka ǎn ba̍le-a wlù ke sɔ̀n-ɛ, kǎ ǎn po̍ ɔ̍ tlɔ̌ ke ma̍u̍ dǒ àn tìh we̍.

⁴ Pò ǐn nu̍ àn mǐtɛɛn wlùh we̍-ɛ, nɛ̀ àn jě-e tɔ̌n-a nu̍ m kaa̍, wɛ̀ ǎn nmɔ-ɛ iě kwlǎ wɛ̀.

⁵ Àn wlùh gbaɛ-a nɛi̍ wɛ̀-ɛ bo ǎn nu̍ wlùh we̍. Ìn de̍ klaa Lowe ke ìn de̍ Nyune-a wlùh gbaɛ u̍h blě-aɛ, ǐn juo ɛ̍-ɛ ɛ̍ nɛ m̀ ke.

⁶ Ɛ̍ kɔn ǎn sǐ-i ìn tìh wlì i̍. Nyɔsoa-a nyǐ-dɛ̍ ɛ̀ gbǎ-a dě ìn ku̍sɔ̀n ti̍ iě-a ìn sɔ̍n dlǔ tè-ɛ, ìè ɛ̍ nɛ̍ i̍ tbà.

⁷ Nyɔsoa se̍ ɔ̍ Sùù àɔ̀ nyǐ ɛ̍ iě à slè sà. Jɛ ɔ̍ nyǐ ɛ̍ àɔ̀ wɛ̀ ɛ̍ iě à gbǐh ke, jbɛɛ ke, chɛ̀ i̍ gbɛ̍n-ɛ nyǐ.

⁸ Ɛ̍ tìh-ɛ, bɔ̌ à Joi-a tìh i̍ sà-a tɛ̀n ple̍-ɛ. Nɛ̀ ka ǐn nɛ-a kasoo ɔ̍ tìh-ɛ, bɔ̌ ɛ̍ tɛ̀n ple̍-ɛ ke. Jɛ tù pɔ̀n chɛ̀-a tìh ìè ǐn kɛ̍n gbǎ à iě jua̍i̍ sàɛ̀-ɛ la kwa̍a̍ i̍ gblè-e dě Nyɔsoa-a gbǐh di̍i̍.

⁹ Ɔ̍ sèìe àɔ̀, iě ɔ̍ dǎ àɔ̀ à iě ɔ̍ nyɔ̍ nu̍. Ɛ̍ se̍ à nu̍-dɛ̍ᵻá tìh ɔ̍ se̍ àɔ̀ dǎ, jɛ ɔ̍ chɛ̀-a wlùh dɛ̍ ke blɛ nɛ-ɛ bo ɛ̀ nu̍ ɛ̍ iě ɔ̍ dǎ àɔ̀. Ɔ̍ iě-a à blɛ la we̍ nu̍ dě Jusu Klai ja̍a̍-ɛ, nɛ̀ kmɔ̌ se̍ nui-ɛ ke̍.

¹⁰ Jɛ à Sèìe Nyɔ̍ Jusu Klai-a ji̍-ɛ bo ɛ̀ sà ɛ̍ ka tà. Ɔ̍ sà mɛ̌ɛ klà, wɛ̀ feɛ ɛ̀ se̍-a mɛ̌ la̍ kɔn-ɛ, iě ɔ̍ ja ɛ̍ i̍ dě pɔ̀n chɛ̀ di̍i̍.

¹¹ Pɔ̀n chɛ̀ la ɛ̍ tìh bo Nyɔsoa tba̍ ǐn chèɛ̀ iě ɛ̍ tìh bla̍ nyɔ̍ ke, gba̍tòà ke nǎ po̍ nyɔ̍ nu̍.

¹² Ɛ̍ kɔn ǎn sàɛ̀-a ka jua̍i̍. Jɛ ǐn juo nyɔ̍ ǐn gbaɛ-a wlùh-ɛ, ɛ̍ bo ɛ̀ sà ǐn faɔn. Nɛ̀ ǐn juo ɛ̍-ɛ gblagblǎ dɛ̍ ɔ̍ po̍-a dě ǐn kwa̍a̍-ɛ, ɔ̍ bɛ̌ɛ ɛ̍ sɛ̍sɛ̍ nu̍-ɛ te̍e̍ wɛ̀ ɛ̍ iě bɔ̌ɛ-o weɛ̍ laa̍ jɛɛ.

¹³ Ǎn nyɔ̍ nǎ po̍ wlu̍ ɛ̀ slɛ̌-a i̍ ìn wɔ̌n-a ǐn wɔ̍ɔ̍n-ɛ, dǒ ɛ̍ blaiɛ̍ de̍e̍ ìè wɔ̀. Nu̍ ɛ̍ dě wlùh gbaɛ ke nyɔ̍ tìh kma-a nɛ-a dě Jusu Klai ja̍a̍-ɛ di̍i̍.

¹⁴ Nyɔsoa-a Sùù ɛ̀ tǐn-a dě à ja̍a̍-ɛ, tìh-a taǐn ɔ̍ po̍-a dě ìn kwa̍a̍-ɛ, dǒ ɛ̍ gbǐh we̍ bo ìè ɛ̍ sɛ̍sɛ̍ nu̍-i.

¹⁵ Ìn juo ɛ̍-ɛ nyɔ̍ kli̍hgbɛ̍ nɛ-a dě Esea bloa̍ kɛ̍n-ɛ, u̍h poe ǐn kɛ̍n i̍ wɛ̀. Fekɛlɔ ke Ɔmɔchini nɛ dě u̍h-a kòo ke.

¹⁶ Ǎn sà nǐ wɔ̍n Joi iě Onɛsefɔwlɔ ke ɔ̍ chɛ̌ wɔɛ jě. Dɛ̍nu̍ɛ, ɔ̍ se̍ ǎn dě kasoo nɛ-ɛ tɛ̀n i̍ ple̍-e, iě ɔ̍ nu̍ ǎn dɛ̍i̍ chɛ̍chɛ̍ kleǐn.

¹⁷ Ti̍ ɔ̍ sǐ-a dǒ Wlom wlɔ̀ di̍i̍ i̍-ɛ, ɔ̍ pɔ̀n ǐn i̍ te̍e̍ iě ɔ̍ jě m.

¹⁸ Nɛ̀ ǎn sà nǐ wɔ̍n Joi iě ɔ̍ wɔɛ jě dǒ bɔ̌ɛ-o weɛ̍ laa̍ di̍i̍. Àn chɛ̀ juo i̍h ke te̍kle̍e̍, ka ɔ̍ nu̍-a ǐn sɔ̍nᵻ we̍ i̍ naɛ-ɛ dě Ɛfɛsɔ wlɔ̀ di̍i̍-ɛ.