TAHINGA 8 - Buka Apuna (I Lotu Katolika)

¹ Ma hemuri na Araha ki vi tanga o Moise, ki vi: “Gu râ i pasina na maneraha, ma ko vi tanga, ko vivi, na Araha ki vi vikê: ‘Gu hagamarumungenira hura na kariaku, hanana ge rahesiê.

² Manga igo ma ko usisi, hoi, inê kê page hagaitangia na agua iamu renira na kararê, ga page manasia,

³ ma na ve i Nile ki page vunuvunu aharê renira na kararê, ma ka page vunusigi na ruma raha iamu, na kiboru ni mêriha iamu, na bea iamu, na ruma iata na kariamu ma na ruma iata na ai ni Esipito hato, ma igê nikâ na êmu ma na apira ni ngêra.

⁴ Ngaira ka page asireke hurigamu, igo ma na kariamu ma na enoni hato go marungira.”

⁵ Na Araha ki vi tanga o Moise, ki vi: “Go vi tanga o Aroni, ki tagarenia rârâ na vato iana surigi na ve, na âpavoro ma na rano, hanana ga akê me igê na kararê ma ka manasia i Esipito hagenani.”

⁶ Vikê o Aroni ki têa rârâ na vato iana surigi na ve hato, ma na kararê ka akê me ma ka manasia i Esipito.

⁷ Ma na mane ni girarasiha ka kato vikana nogata igê na mangataniha iata, ma na kararê ka akê me mamata.

⁸ Na maneraha i Esipito ki unirerua me o Moise mo Aroni ma ki vi: “Muru nungia na Araha, ke hagamagahurura râ na kararê agini, hanana gê hagamarumungenira hura na kariamu ka vogasia na Araha.”

⁹ O Moise ki arami, ki vi: “I koro ma. Inê kê agana, hanana vigê nungia na Araha tangago. Hoi, gu surua me na matena, hanana gê nungia igê na Araha tangagamu, igo ma na kariamu ma na enoni go marungira, hanana ga magahuru tenigamu na kararê. Ngaira ka page magahuru ngavê, nga noga ma i ve i Nile.

¹⁰ Na maneraha ki arami, ki vi: “I gomaha ko nungia na Araha tangê.” O Moise ki vi: “Hoita, i gomaha nga. Ma igo ko page tahetara, vi i mareha rârâ ta na enoni, vige maratorana na Araha mi rahesia.

¹¹ Hoi, na kararê ka page magahuru tenigamu, igo, na kariamu ma na enoni go marungira, nga noga ma i ve i Nile.”

¹² Hemuri o Moise mo Aroni karu râ pania na maneraha. O Moise ki nungia na Araha, ki hagamagahurura na kararê, i hagaitangia na maneraha renira.

¹³ Na Araha ki aganaria na nungiha iana o Moise, ma na kararê hato surigi na ruma, na mahera ma na mu ka me hato.

¹⁴ Na ai ni Esipito ka rurura haku na kararê hato, ma i Esipito ki mapu ngavê renira.

¹⁵ Matena na maneraha ki bâsia, vi na kararê ka me hato, ngaia ki hahêaga aporo. Na maneraha ki usi, vige tê viteaterua o Moise mo Aroni, manga i bani visia na Araha.

¹⁶ Na Araha ki vi tanga o Moise, ki vi: “Go vi tanga o Aroni, ki tahurua na ano renia na vato iana, ma na akuhukuhugana na ano ki page vora re na namu suria i Esipito hagenani.

¹⁷ Vikê o Aroni ki tahurua na ano renia na vato iana ma na akuhukuhugana hato na mako i Esipito ka varo re na namu, ga manasira na enoni ma na togoha hato.

¹⁸ Na mane ni girarasiha ka uhungia nogata igê na mangataniha nikâ iata, ma ki bara tangara. Na namu ka oga suria na ara ni agua hato.

¹⁹ Na mane ni girarasiha ka vi tanga na maneraha, ka vi: “God kani katoa na tarana ngekê!” Ma na maneraha ki ama ni hahêaga nga. Ngaia ki usi, vige tê viteaterua o Moise mo Aroni, manga i bani visia na Araha.

²⁰ Na Araha ki vi tanga o Moise, ki vi: “Igê na mahogotana i gomaha mavoraro go arâ vurusia na maneraha, matena i arâ tanga na ve i Nile, ma ko hagarongoa, vi inê na Araha kê vi, ‘Gu hagamarumungenira hura na Isiraelita na kariaku, hanana ngaira ka rahesiê.

²¹ Hoi, manga igo ma ko usisi, inê kê hagaitangigamu, igo, na kariamu ma na enoni i na agua iamu renira na rango ru. Na ruma hato iata na ai ni Esipito ka page vunuvunu mamasuaga renira na rango ru ma ka page manasia na ano.

²² Inê be hagatahira na kariaku i na apanena i Gosene tenira na rango ru. Ga page mareha ngavê na rango ru i ngekana. Inê kê page katoa vikana, hanana igo ko tahetara, vi inê na Araha kê raramohaga igê na agua ikê.

²³ Inê be katoa, ke tora hegitigi i berarogata na kariamu ma na kariaku. Na mena ngekê ki page voravora me i gomaha.” Ma ki vora me.

²⁴ Na Araha ki kasira na ruruha raha ni rango ru igê na ruma raha iana na maneraha ma surigi na ruma iata na kariana. Na rango ru ka hagamamasiaga ngavê i Esipito hagenani.

²⁵ Ma hemuri na maneraha ki unirerua o Moise mo Aroni ma ki vi tangarerua, ki vi: “Muru râ ma kamuru vogasia na God iami igê nga na agua ikê.”

²⁶ O Moise ki arami, ki vi: “I pe arari vikana, suria na ai ni Esipito ki page era na obata renigi na ganiani, mi vogasia na Araha God iamami renigi. Manga igami ma kami taugi na ganiani, ga hagaera obata na ai ni Esipito ma kami vogasi renigi mave ka bâsigami, ngaira ka page ariha hunigami.

²⁷ I tuguhigami nga, vigami tavoraha banu igê na bagamasusu raha tanga na agua, i hagatê na ararini na tangiani gi oru, hanana mi susu igê tanga na Araha God iamami, manga i bani bonasigami renia.”

²⁸ Na maneraha ki arami, ki vi: “Hoi, inê kê hagamarumungenigamu hura, hanana mu vogasia na Araha, na God iami, igê na bagamasusu raha, manga vi igamu ma kamu arâ tanga na agua i pe hagatê. Mu nungia God tangê.”

²⁹ O Moise ki arami, ki vi: “Gê aporo ma kê kahu nungia na Araha, hanana vi i gomaha na rango ru ka page anu tenigamu, igo, na kariamu ma na enoni hato i Esipito. Ma siana hagetage ko hagaparugamirua nikâ, se vigo manimanira na enoni tenia vige râ ma ke vogasia na Araha.”

³⁰ O Moise ki pania na maneraha ma ki avarasia na Araha.

³¹ Na Araha ki aganaria na nungiha iana. Na rango ru ka anu tenira na maneraha, na kariana ma na enoni hato i Esipito. I mareha rârâ na ani gi tage na rango ru, vige hita so.

³² Henaka i manga ngekana, ma na maneraha ki hahêaga mênga ma ki pe hagamarumungenira hura nikâ na enoni.