TAHINGA 6 - Buka Apuna (I Lotu Katolika)

¹ Ma na Araha ki vi tanga o Moise, ki vi: “Hoi, i ngekê igo ko page bâsigi na tarani gê page katogi tanga na maneraha. Inê kê page tuguria, ki agana ki hagamarumungenira nga na kariaku, ka huhura. Inê kê page tuguria, hanana i paira hura hete tenia na agua iana.”

God ki hagatorangenia nikâ o Moise

² God ki tamasi tanga o Moise, ki vi: “Inênga ki na Araha.

³ Inê kê bani hagabângeniê mareku tangara o Abarahamo, o Isako mo Jakobo, hanana vi inê ki na God raramohaga huniê, ma kê pe hagagirarara renia na ataku apuna vi Araha.

⁴ Nikâ inê kê naka na suruheri iaku henira, gê suru, vigê haganahunira renia i Kanani, ga bani oga mamahuara igê.

⁵ I ngekê inê kê bani rongogi na hagagegeha iata na Isiraelita, na ai ni Esipito ka hagamamasiagara ngavê, ma inê kê takusia aporo na suruheri iaku.

⁶ Hoi, gu hagarongora na Isiraelita, vi inê kê vi vikê tangara, kê vi: ‘Inênga ki na Araha. Inê be hagatahigamu. Inê be rupasigamu tenigi na hagamamasiganiha iata na ai ni Esipito. Inê be hagabângenia na raramohaku raha, hanana ve hagaitangira ngavê ngaira ma kê hagatahigamu igamu.

⁷ Inê be katogamu kamu vora nga na kariaku mareku, ma bê God nga iami. Matena inê kê rupasigamu tenigi na hagamamasiaganiha i Esipito, igamu kamu kahu aitangisiê, vi inênga ki na Araha God iami.

⁸ Inê be bêngenigamu tanga na agua, gê bani suru, hanana vigê haganahunira o Abarahamo, o Isako mo Jakobo renia. Inê be haganahunigamu renia, kamu nahunia nga maremi. Inê nga ki na Araha.”

⁹ O Moise ki hagarongora vikana na Isiraelita, ma ngaira ka usi vige karinga, suria na hagamamasiaganiha raha ki katora ka bagahagêguri.

¹⁰ Ma hemuri na Araha ki tamasi tanga o Moise, ki vi:

¹¹ “Râ ma ku vi tanga na maneraha i Esipito, hanana ge hagamarumungenira nga na Isiraelita, ke huhura tenia na agua iana.”

¹² Ma o Moise ki arami, ki vi: “Manga vi na Isiraelita ma ka pe têtê viteaku, na maneraha ki bara ngavê, vige tê viteaku nogana. Inê ki mareha rârâ vi na mane ni tamasinga bâkoro.”

¹³ Na Araha ki bonasirerua o Moise mo Aroni, ki vi: “Muru hagarongora na Isiraelita ma na maneraha i Esipito, vi inênga kanigê kasigamurua, hanana muru bêngenira hura na Isiralita tenia i Esipito.”

Na êvariterua o Moise mo Aroni

¹⁴ O Rubeni na bêbê ni kare iana o Jakobo ki aparara o karena ge he: o Ganoke, o Palu, o Geseroni mo Karami. Ngaira ka na êvarita na varo ni nuni, ga hêtata renigi na atata hehegitigi.

¹⁵ O Simeone ki aparara o karena ge ono: o Jemuele, o Jamini, o Ohata, o Jakini, o Sogare, mo Saulo karena na gete i Kanani. Ngaira ka na êvarita na varo ni nuni, ga hêtata renigi na atata hehegitigi.

¹⁶ O Levi ki aparara o karena gi oru: o Geresoni, o Kehata, mo Merari. Ngaira ka na êvarita na varo ni nuni, ga hêtata renige na atata hehegitigi. O Levi ki tonga na harisi iana 137 ma ki kahu me.

¹⁷ O Geresoni ki aparerua o karena gi rua: o Libini mo Simi. Na raraha iaterua ka rako.

¹⁸ O Kehata ki aparara o karena ge he: o Amarama, o Isihare, o Geberoni mo Usiele. O Kehata ki tonga na harisi iana 133 ma ki kahu me.

¹⁹ O Merari ki aparerua o karena gi rua: O Magili mo Musi. Ngaira hato ngegana ka na varo ni nuni tenia o Levi.

²⁰ O Aramana ki êragia kesina o vaemana. Ngairerua karu aparerua o Aroni mo Moise. O Amarama ki tonga na harisi iana 137 ma ki kahu me.

²¹ O Isihare ki aparara o karena gi oru: o Koraga, o Nepege mo Sikiri.

²² O Usiele ki aparara nogana o karena gi oru: o Misaele, o Elesapane mo Sitiri.

²³ O Aroni ki êragia ka Eliseba, ka karena o Aminataba, kesina o Nagasoni. Ngairerua karu aparara o Nataba, o Abihu, o Eleasare mo Itamare.

²⁴ O Koraga ki aparara o karena gi oru: o Asire, o Elekana mo Abiasapa. Ngaira ngegana ka na êvarita na hakuta gi oru igê na raraha iana o Kora.

²⁵ O Eleasare, o karena o Aroni, ki êragia na hitangita ka karena o Putiele. Ngairerua karu apara o Pinegasi. Ngaira hato ngegana ka na êvarita na hakuta igê na varo ni nuni iana o Levi.

²⁶ O Aroni mo Moise ngairerua ka na ani na Araha ki bonasirerua, ki vi: “Muru bêngenira hura na raraha iana o Isiraele tenia i Esipito.”

²⁷ Ngairerua ka na ani garu nungia na maneraha i Esipito, hanana vi hagamarumungenira hura na Isiraelita tenia i Esipito.

Na Araha ki hagatorangenirerua o Moise mo Aroni

²⁸ Matena na Araha ki tamasi tanga o Moise i Esipito,

²⁹ ngaia ki vi: “Inê nga ki na Araha. Gu hagarongoa na maneraha i Esipito renigi na ara ni marâ, gê visigi tangago.”

³⁰ Ma o Moise ki arami, ki vi: “Igo ko bani girara, vi inê ki mareha rârâ, vi na mane ni tamasinga bâkoro. Na maneraha i Esipito ki bara, vige tê viteaku.”