TAHINGA 5 - Buka Apuna (I Lotu Katolika)

O Moise ma o Aroni i maana na maneraha i Esipito

¹ Ma hemuri o Moise mo Aroni karu râ i pasina na maneraha i Esipito, ma karu vi tanga, karu vi: “Na Araha, na God na Isiraelita ga rahesia, ki vi vikê: ‘Gu hagamarumungenira na kariaku ke hura, ke katoa na tangiana raha igê na bagamasusu raha, hanana ge hagarahasiê igê.”

² Na maneraha ki hagate suraga, ki vi: “Ti ka na Araha? Ti kani pasi rongo ringena ki kasira hura na Isiraelita? Inê kê pe hagarea na Araha! Inê ki asa be hagamarumungenira na Isiraelita ke hura.”

³ O Moise ma o Aroni karu arami, karu vi: “Na God na Isiraelita ga rahesia, kani hagagiraragami renia marena. Gu nakagami, kami tavoraha banu igê na bagamasusu raha tanga na agua, i hagatê na tangiani gi oru, hanana mi vogasia igê na Araha God iamami. Manga vi igami ma kami pe katokato vikana, ngaia ki page hagamesigami renia na ringa se na hearihatana.”

⁴ Na maneraha ki hagatererua o Moise mo Aroni, ki vi: “Tanu hega kamuru obania, vigamu torera hura na enoni tenigi na tagaraha iata? Muru tugurira hete na kare rakuraku ngegana ke tagara!

⁵ Igamu ka na ani mu rako teharira na ai ni Esipito. Ma i ngekê igamu kamu usi nikâ vari, vigamu tagara?”

⁶ Igê na tangiana nga ngekana na maneraha ki bonasira na mane ni Esipito, ka tugurira na Isiraelita tangagi na tagaraha ma na Isiraelita ga bâsurigi na tagaraha, ki vi:

⁷ “Siana kamu vatera na enoni na ri, hanana viga tagarahigi renigi na hê. Mu tugurira vê ke râ ma ke gari mareta.

⁸ Henaka, ma igamu kamu ama ni bonasira nga, hanana ga tagarahigi ki tongatonga nga na hê manga bani hanani, mareha vige tihia na hê gi tage. Ngaira ka pe nahunigi bâraha na tagaraha, tahema ngaira ka ama ni nungiê nga, vigê hagamarumungenira ka huhura, hanana ga vogasia na God iata!

⁹ Mu hagatagarahira raha nga. Siana hagetage ka mamaro, hanana siana ke nahunia na kere matora tanga ge karingagi na hagaparunga ngegana.”

¹⁰ Na mane ga tugurira na kare rakuraku ma na Isiraelita tangagi na tagaraniha, ngaira ka râ ma ka vi tangara na Isiraelita, ka vi: “Na maneraha ki vi, vi ngaia ki hato vige vategamu nikâ na ri.

¹¹ Ngaia ki vi, vi igamu maremi kamu arâ kamu garigari i ta na agua mavê, mu takusia vigamu tarahugi igê. Henaka, ma igamu ki tuguhigamu, vigamu tagarahigi ki tongatonga na hê manga bani hanani.”

¹² Tahema, na enoni ka gari na ri suria i Esipito hagenani.

¹³ Na mane ga tugurira igê na tagaraha, ngaira ka uhungira nga, viga katora ka tagarahigi na hê ka tongatonga manga bani hanani i na ara ni tangiani, tagenana manga i nago, matena i vatera mênga na ri.

¹⁴ Na mane ni Esipito ga tugurira igê na tagaraha, ngaira ka ramusira na Isiraelita, ga bâsurigi na tagaraniha. Ngaira ka hagate suraga, ka vi: “Tanu hega na hê mu tagarahigi ka pe tonga manga bani hanani?”

¹⁵ Vikê na mane ga bâsurigi na tagaraniha ka râ i pasina na maneraha ma ka tamasi hagagege tanga, ka vi: “Maneraha, tanu hega ko katogami vikana?

¹⁶ Igo ko vi pusigami tenigi na ri. Henaka, ma igo ko ama ni bonasigami nga, hanana vigami tagarahigi na hê! Ma ku bâ, ngaira ka ramusigami nikâ. Bâ na perenga iamu!”

¹⁷ Na maneraha i Esipito ki arami, ki vi: “Igamu kamu marusi ngavê ma kamu usi vigamu tagara. Tahema igamu kamu nungiê, hanana vigê hagamarumungenigamu kamu huhura, hanana vigamu vogasia na Araha.

¹⁸ Mu aporo kamu tagara! I asa hagetage be vategamu na ri! Henaka, ma ki tuguhigamu, vigamu tagarahigi na hê ka tongatonga manga bani hanani.”

¹⁹ Na mane ga bâsurigi na tagaraniha, ka kahu girara, vi ngaira ka nahunia na bagabevoana, suria na maneraha ki bonasira, hanana viga tagarahigi na hê ki tongatonga i na ara ni tangiani manga bani hanani.

²⁰ Matena ga aporo, ngaira ka tarahurerua o Moise mo Aroni, garu oga naasira.

²¹ Ngaira ka vi tangarerua o Moise mo Aroni, ka vi: “Na Araha ki bani girara na tarana muru katoa, ma ki page hagaitangigamurua renia, suria muru katora na maneraha ma na kariana, ka kitenigami. Igamurua kamuru katora ma, hanana vige nahuigami kami meme.”

²² Ma hemuri o Moise ki aharia aporo na Araha, ma ki vi: “Araha, tanu hega kanigo katora bera na kariamu? Go hagatorangeniê me ikê tanga na ta?

²³ Haganega me tenia na matena gê tamasi urusigo igê tanga na maneraha, ngaia ki kahu hagamamasiagara ngavê. Ma igo ki mareha ngavê, vigu tamanira rârâ!”