TAHINGA 2 - Buka Apuna (I Lotu Katolika)

I vora o Moise

¹ Igê na matena ngekana ta na mane tenia na raraha iana o Levi ki êragia ta na gete tenia na raraha iana o Levi nikâ.

² Ngairerua karu apara na kare mane. Matena na gete ngekê ki bâsia, vi o karena ki apekoro ma ki bâkoro, ngaia ki pinihia surigi na hageha gi oru.

³ Ma na matena i bara tanga, vige ama ni pinihia nga, ngaia ki hêria na erere renigi na ohe ma ki taruhia renigi na puru pusia na ve. Ngaia ki naka o karena igê, ma ki pinihia na erere i gupuni na huru i papana na ve.

⁴ Keogana na kare ki ahi tarege, ki bâbâ renia, vi na tarana ta ki page tarahua na kare.

⁵ Ka karena na maneraha i Esipito ki râ me i ve hanana vi mamanu. Na kere gete tagara iana ka haninia na akerena na ve. Ki parama ka karena na maneraha ma ki gasuga renia na erere igê na huru i suru borahu. Vikê ngaia ki bonasia na hitangita na kere gete tagara iana, ki râ ki torea me tanga.

⁶ Ka karena na maneraha i Esipito ki tangahia na erere ma ki bâsia na kare mane. Na kare ki angiangi ma na kere gete ki takuia, ma ki vi: “E, na karena na Isiraelita ngekê.”

⁷ Ma keogana na kare ki hagate, ki vi: “I hega, go obania vari, vigê arâ ma kê merâ me na hehene na Isiraelita, hanana ge hagasusua ma ke marupea tangago?”

⁸ Ngaia ki arami, ki vi: “Ua, koro era! Gu râ ku merâ me.” Hoi, na kere gete ki râ ma ki merâ me kenana monari na kare.

⁹ Ka karena na maneraha ki vi tanga kenana na kare, ki vi: “Gu torea na kare ikê, ku hagasusua ma ku marupea tangê, ma inê kê page vurigo. Vikê ngaia ki torea na kare ma ki marupea.

¹⁰ I hemuri, matena na kare ki raha ki tari getea, na kanana ki merâ tanga ka karena na maneraha, ma ngaia ki marupea manga vi na karena marena. Ngaia ki tako munimuni, ki vi: “Suri inê kê hagatahia tenia na ve, tahema inê be hêtana, vi o Moise.”

O Moise ki gava tanga i Mitiani

¹¹ I ta na tangiana, matena o Moise ki vora na mane na gapu haoru, ngaia ki râ ki bâsira na goana na Isiraelita. Ngaia ki bâsira na ai ni Esipito, ga hagatutunguhira igê na tagaraha ma ka hagamamasiagara. Ngaia ki bâsia ta na mane ni Esipito ki tahuru hunia na mane na Isiraelita, na hitangita na goana ngaia o Moise.

¹² O Moise ki bâ rârâ tarana ma ki sirasirera. Ma na matena i mareha rârâ ta na enoni, vige bâ me, ngaia ki nahu hunia na mane ni Esipito ma ki ahunia na gahuana i one.

¹³ Na tangiana i muri me ngaia ki râ nikâ, ma ki bâsirerua na mane na Isiraelita gi rua garu heariha. Ngaia ki vi tanga na ani i hagagava ki vi: “Tanu hega go nahuia na goamu?”

¹⁴ Na mane ki arami, ki vi: “Ti kani kasigo ko marungigami ma ko surigami? Go obania vari, vigo nahuiê kê meme manga go nahu hunia noga na mane ni Esipito?” Hoi, o Moise ki magu ma ki tako, ki vi: “E, ngaira ka bani girarê, vigê nahuia na mane ki me.”

^15-16 Matena na maneraha i Esipito ki rongoa na tarana ngekana, ngaia ki kato vi hagatora ka nahuia o Moise ki meme. Ma o Moise ki gava, ki râ ki oga i Mitiani. I ta na tangiana, matena o Moise ki mamaro hagarangia na vekaru, ka karena gi pi o Reuele, na mane ni vogasiha i Mitiani, ngaira ka râ me, tanga ga titi ve, hanana viga hagavunusigi na maraguhu tangara na sipi ma na goti iana o vaemata.

¹⁷ Ma tani na mane ga bâsuri togoha ka tarigenira ka karena o Jetero. Hoi, o Moise ki aharaga ma ki ramo renira ma ki hagatonomira ngaia na togoha na anina o Jetero.

¹⁸ Matena na kere gete ka aporo i pasina o vaemata, ngaia ki hagatera, ki vi: “Tanu hega, i ngekê kamu hatani aporo me?”

¹⁹ Ngaira ka arami, ka vi: “Ta na mane ni Esipito kani urapusigami tenira na mane ga bâsuri togoha. Nikâ ngaia ki ti na ve ma ki hagatonomira na togoha iaka renigi.”

²⁰ Ngaia ki hagatera ka karena, ki vi: “I he ngaia? Tanu hega mu pania vê i ngekana? Mu râ, kamu vi tanga, ke râ me ke ngê i pasika!”

²¹ Vikê o Moise ki agana, ki oga i ngekana. O Reuele ki hagaauragingenia ka Sipora ka karena henia.

²² Ngairerua karu apara na kare mane. O Moise ki tako ki vi: “Inê kê mamahuara ma ikê.” Tahema inê be hêtana o kareku, vi o Geresome.

²³ Rako na harisi i hemuri na maneraha i Esipito ki me. Ma na Isiraelita ka ama ni hagagege nga, suria na ai ni Esipito ka ama ni hagamamasiagara nga renigi na tagaraha raha. Ngaira ka avaravara ngavê ma God ki rongogi na avarasiha iata.

²⁴ Ngaia ki rongogi na hagagegeha iata, ma ki takusia aporo na suruheri iana henira o Abarahamo, o Isako ma o Jakobo.

²⁵ Ngaia ki bâsigi na hagamamasiaganiha, ga tarahura na Isiraelita, ma tahema i takuira ma ki tako renira.