TAHINGA 11 - Buka Apuna (I Lotu Katolika)

Na rongoha viga page meme na bêbê ni kare mane

¹ Ma hemuri na Araha ki vi tanga o Moise, ki vi: “Inê kê hagaitangira hagetage nikâ na maneraha i Esipito ma na kariana, ma ki kahu hagamarumungenigamu hura. Ngaia ki page paigamu hura hete.

² Hoi, go tamasi tangara na Isiraelita ma ko vi tangara ngaira hato, hanana ga nungigi na mahe na golo ma na siliva tenira na ai ni Esipito ga merabasigu hetanga.”

³ Na Araha ki katora na ai ni Esipito ka hagahigasira na Isiraelita. I monari, na mane igê na gavumane ma na enoni hato ka vi, vi o Moise ki na mane ni ramoha raha.

⁴ O Moise ki vi tanga na maneraha, ki vi: “Na Araha ki vi vikê: Igê na gupuna bungiana inê kê page arâhia i Esipito,

⁵ ma na ara ni bêbê ni kare mane ka page meme, haganega tenia o karemu vi page urusigo, mataro me tanga na bêbê ni kare mane iana na gete rakuraku i garasi ngêra. Ka page meme nogata na kareta mane hagâkani na togoha.

⁶ Na angiha maramara ki page akê me i Esipito hagenani, na angiha maramara ga pe bani rongo kuruhana me noga i nago, ma ki asa vige akê me nikâ i hemuri.

⁷ Nga noga ma i pasita na Isiraelita ki mareha rârâ igê vi na kere enagita, naka ma vi na o ma ki asa vê, vige ngirira na Isiraelita se vi na togoha iata. Vikana igo ko page tahetara, vi inê nga na Araha kanigê katoa ki tora hegetigi i bararogata na ai ni Esipito ma na Isiraelita.”

⁸ O Moise ki vi nikâ: “Na ara ni mane ni hagaotonga iamu ka page arâ me ka tubê tangê, ma ka page avarasiê, hanana gê merahura na kariaku hato. I na murina ngekana inê page huhura.” Ma o Moise ki mangariaga bâraha ma ki râ pania na maneraha.

⁹ Na Araha ki bani vi tanga o Moise, ki vi: “Na maneraha ki asa, vige tê viteamu, hanana inê kê katogi nikâ na mena i Esipito.”

¹⁰ O Moise mo Aroni karu bani katogi na mena hato ngegana i maana na maneraha. Ma na Araha ki naka na maneraha ki ama ni hahêaga nga ma ki pe hagamarumungenira hura na Isiraelita vige pania i Esipito.