LUKA 1 - Buka Apuna (I Lotu Katolika)

Na tamasinga tanga o Teopilo

¹ Teopilo koro. Rako na enoni ka bani uhungia, viga segea na sihonga renigi na tarani, ga bani akê me noga i pasimami.

² Ngaira ka bani segegi so na tarani, gami rongogi tenira na enoni, ga bani bâsigi na tarani ngegana, matena ga haganega, ma ka ateate renia na taroha koro.

³ Ma inê mareku kê bani garigi maninga na tarani hato ngegana tenigi na haganegani. Vikana inê kê takusia, vi i koro, be segegi so tatage tangago, maneraha.

⁴ Inê kê kato vikana, hanana igo ko page girara bâkoro, vi na tarani hato, go bani rongogi ngegana, ka monari.

Na angelo Gabiriele ki tamasi tanga o Sakaria

⁵ Igê na matena iana o Herote i marungia i Galilea, ki oga i ngekana ta na mane ni vogasiha, o Sakaria na atana. Ngaia ki na hitangita na haku na mane ni vogasiha iana o Abia. Na gete iana kani ka Elisabete. Ngaia ki na gete tenia na raraha iana na mane ni vogasiha nikâ.

⁶ Na parongaterua ki koro i maana God. Ngairerua karu râ surigi maninga na ramata hato ma na tamasinga iana na Araha.

⁷ Ngairerua karu pe apara kare rârâ, suria ka Elisabete ki gomara, ma ngairerua o Sakaria ma ngaia karu gemêa ngavê.

⁸ I ta na tangiana o Sakaria ki tanua na tagaraha ni vogasiha i maana God i Ruma ni Rotu, renia ki na matena iana i tanua igê na vogasiha, ga tanua i na ara ni tangiana.

⁹ Suria na tauhata na mane ni vogasiha ngaira ka kasikasi pepa, hanana vi ga girara, o ti ki sungia na marâ, i sigini koro, igê na bea ni vogasiha. Mo Sakaria ki ura. Vikê ngaia ki banu igê na kiboru apuna i na Ruma ni Rotu iana na Araha.

¹⁰ Ma ngaia ki sungia na marâ, i sigini koro, matena na hakuta na enoni ka nunginungi i Ruma ni Rotu.

¹¹ Ma na angelo iana na Araha ki vora me tanga, ma ki ura i otona na bea ni vogasiha, ga susungia igê na marâ, i sigini koro.

¹² Matena o Sakaria ki bâsia, ngaia ki gasuga ma ki magu.

¹³ Ma na angelo ki vi tanga ki vi: “Sakaria, siana ko magu! God ki aganaria na nunginungiha iamu, ma ka Elisabete, kaniamu, ki page apara na kare mane tangamurua. Go hêtana nga vi o Joane.

¹⁴ I page koro ngavê na obamu ma ko page vagevage bâraha, ma na enoni rako getera ka page vagevage bâraha renia, matena i voravora me.

¹⁵ Ngaia ki page maneraha i maana God. Ngaia ki asa iana, vi ge tono na vaini se ta na marâ, vi ge ruguhia na enoni. Ma na Higona Apu ki page angaria, haganega tenia na matena, i voravora me igê.

¹⁶ Ma ngaia ki page horogi na aitangihata rako na Ai ni Isiraele, ka aporo tanga na Araha God iata.

¹⁷ Ngaia ki hagananê renia na Araha, ki ramoramo ma ki raramohaga manga o Elia na poropete. Ngaia ki page hagahakura aporo na bani enoni ma na kareta. Ngaia ki page horogi na aitangihata na enoni, ga guguruga, hanana ga paronga aporo mangara na enoni, ga râ suria na tamasinga iana God. Ngaia ki page hagarêra na kariana God tanga na râha me iana na Araha.”

¹⁸ O Sakaria ki hagatea na angelo, ki vi: “Manga i he kanigê page girara, vi na tarana ngekana ki page voravora me monari? Inê kê merahaga ngavê, ma na gete iaku nikâ ki gemêa.”

¹⁹ Na angelo ki arami, ki vi: “Inê ki no Gabiriele. Inê na kariana God, gê tagara tanga. Ngaia ki hagatorê, kê tamasi tangago ma kê hagarongogo renia na taroha koro ngekê.

²⁰ Ma igo ko haritohea na tamasinga iaku, i page voravora me monari igê na matena tanga. Suria igo ko haritohea, hoi, i bara tangago, vi gu page tamasi; igo ko page bibi, mataro me na tangiana i voravora monari igê na suruha iaku tangago.”

²¹ Igê na matena ngekana na enoni ka naasia makira o Sakaria, ma ka hehagateri, ka vi: “Tanu hega kani oga arihu igê na kiboru apuna i Ruma ni Rotu?”

²² Na matena i hura me, ngaia ki bara tanga, vi ge meratamasi. Tahema ngaira ka girara, vi ngaia ki rigia ta na marâ igê na kiboru apuna i Ruma ni Rotu. Ngaia ki hagarari ma tangara na enoni renigi na rimana, suria i bi.

²³ Bevoana ga hato na tangiani iana, i hagarahe igê na Ruma ni Rotu, o Sakaria ki aporo i pasina.

²⁴ I ta na matena i muri ka Elisabete, na gete iana, ki atui, ma ki goga ma i ruma surigi na hageha gi rima.

²⁵ Ngaia ki vi: “I ngekê na Araha ki takuiê igê na tarana ngekê. Ngaia ki tamaniê, ma ki hato, vi na enoni vi ge visiê, vi gê gomara!”

Na angelo Gabiriele ki tamasi tanga ka Maria

²⁶ Matena ka Elisabete ki obara noga surigi na hageha gi ono, God ki hagatora na angelo Gabiriele ki râ i Nasarete, i ta na hinua i Galilea.

²⁷ Ngaia ki tora tamasinga tanga ta na kere gete tatara, ga bani atengenia tanga ta na mane. O Josepo na atana na mane ngekê. Ngaia ki na raraha iana na maneraha o Tavite. Na atana na kere gete kani ka Maria.

²⁸ Na angelo ki banu me i pasina ma ki vi: “Oi, Maria, gete koro! Na Araha ki oga henigo ma ki bani hagakorogo teha!”

²⁹ Ka Maria ki tako bâraha renia na tamasinga iana na angelo, ma ki tako i obana, ki vi: “Tanu hega kani tamasi tangê vikana?”

³⁰ Ma na angelo ki vi tanga, ki vi: “Maria, siana ko magu, renia God ki bani hagakorogo.

³¹ Igo ko page atui, ma ko page apara na kare mane, ma ko hêtana nga vi o Jesu.

³² Ngaia ki page araha, ma na atana ki no Karena God na Araha raha teha. Ma na Araha God ki page hagêguria, ki maneraha manga o Tavite na êvarina.

³³ Ma ngaia ki page marungira tare na raraha iana o Jakobo; ma na arahanga iana ki asa hagetage, vi ge page hato!”

³⁴ Ka Maria ki vi tanga na angelo, ki vi: “Inê na gete tatara. Manga i he kanigê girara, vi voravora me na tarana vikana?”

³⁵ Na angelo ki arami, ki vi: “Na Higona Apu ma na raramohana God kani garu page angarigo. Tahema na kare, go page apara, ki apuna, ma ka page visia, vi o Karena God.

³⁶ Takusia keogamu mêri, ka Elisabete. Na enoni ka vi, vi ngaia ki gomara. Ma ngaia nogana ki bani obara noga surigi na hageha gi ono, henaka i gemêa ngavê,

³⁷ suria i mareha rârâ ta na marâ, vi ge bara tanga God.”

³⁸ Ma ka Maria ki arami, ki vi: “Inê na kariana na Araha. I koro ma, i voravora me tangê na marâ, go visia.” Ma na angelo ki râ pania.

Ka Maria ki vatugia ka Elisabete

³⁹ Igê na kere matena i muri ka Maria ki hagarurugu susu, ma ki tavoraha tanga ta na hinua igê na hungani i Jutea.

⁴⁰ Ngaia ki banu i ruma iana o Sakaria, ma ki tarahua ka Elisabete ma ki visia koro.

⁴¹ Matena ka Elisabete ki rongoa na tamasinga iana ka Maria, na kare ki gusure i obana. Na Higona Apu ki angaria ka Elisabete.

⁴² Ma ka Elisabete ki tamasi raha, ki vi: “Go hagâvo teharira na gete hato! Ma ki hagâvo nikâ na kare, go page apara!

⁴³ Inê kê kone. Tanu hega kani tarahuê na tarana raha ngekê. Kenana na Araha iaku ki vatugiê.

⁴⁴ Bâ, matena gê rongoa na tamasinga iamu, na kare i obaku ki gusure, suria i vagevage.

⁴⁵ Igo ko koro era, suria igo ko tongesuria, vi na tamasinga iana na Araha tangago ki page voravora me monari!”

Na ki iana ka Maria

⁴⁶ Ka Maria ki vi: Inê kê visia raha na Araha i maurihaku hagenani.

⁴⁷ Inê kê vagevage igê na aitangihaku renia God na Hagamauri iaku.

⁴⁸ Bâ, inê na gete purua ma kê tagara tanga, ma ngaia ki takusiê! Ma haganega tenia i ngekê na enoni hato ka page visiê koro.

⁴⁹ Renia God raramohaga hunia ki tanugi na marâ raha tangê. Ma ki koro na enoni hato ka rahesia.

⁵⁰ Ngaia ki takuira tare, ki bê ki arâ, na enoni hato, ga hanetasia.

⁵¹ Ngaia ki hagabângenia na raramohana raha hunia, ma ki tokorenira na enoni paroparo henigi na katoha iata.

⁵² Ngaia ki kasira so na maneraha henigi na raramohata. Ngaia ki kasira akê na enoni purua.

⁵³ Ngaia ki votogi bâraha na marâ koro tangara na enoni, ga matareha. Ngaia ki hagatorangenira vê baguru na enoni ruruguha.

⁵⁴ Ngaia ki hagamonaria na suruha iana tangara na êvarika. Ngaia ki tamanira na raraha iana o Isiraele.

⁵⁵ Ngaia ki pe bonotenia, vi ge takuira tare o Abaramo ma na raraha hato iana.”

⁵⁶ Ka Maria ki oga na ararina na hageha gi oru i pasina ka Elisabete, ma hemuri ki kahu aporo i pasina.

I vora me o Joane Batisita

⁵⁷ I râ me na matena, i riki igê na gerina ka Elisabete, ma ki apara na kare mane.

⁵⁸ Na enoni i hinua iana ma na goana ka rongoa, vi God ki koro era tanga, ma ngaira hato ka vagevage henia.

⁵⁹ Matena na kere kare ki hato huria na tangiani ge varu, ngaira ka râ me, vi ga retea râ na gavona na varana. Ngaira ka obania, vi ga hêtana renia vi o Sakaria, na atana o vaemana.

⁶⁰ Ma kenana na kare ki vi: “Mareha, mareha! Na atana ka no Joane!”

⁶¹ Ma ngaira ka vi tanga, ka vi: “Se, ma igo ko pe nahunia rârâ na ata ngekana igê na raraha iamu!”

⁶² Ma ngaira ka hagarari tanga o vaemana na kare, ka hagatea renia vi na ani ta na ata kani obania, vi hêtana renia na kere mane.

⁶³ O Sakaria ki nungia ta na marâ, vi segesege igê, ma ki segea, ki vi: “O Joane ngekê!” Ma ngaira hato ka panga renia bâraha.

⁶⁴ Ki parama o Sakaria, ma ki girara i kahu tamasi aporo nikâ, ma ki haganega ki visia raha God.

⁶⁵ Na enoni hato i hinua ka konekone bâraha, ma na enoni hato i na ara ni hinua igê hungani i Jutea ka rongogi na tarani ngegana.

⁶⁶ Na enoni hato, ga rongoa, ka takoha renia ma ka hehagateri renia, ka vi: “Na kere kare ngekana ki page voravora renia na ta?” Suria i monari, na Araha raramohaga ki anumasia.

Na ki iana o Sakaria

⁶⁷ Na Higona Apu ki angaria o Sakaria, o vaemana o Joane, ma ki katoa o Sakaria ki tamasi ki vi:

⁶⁸ “Ge visia raha na Araha, na God iata na Isiraelita! Suria ngaia ki râ me, hanana i tamanira na kariana ma ki rupasira.

⁶⁹ Ngaia ki vategia na Hagamauri raramohaga, i râ me tenia na raraha iana o Tavite, na kariana.

⁷⁰ I nago vê noga ngaia ki bani surua na marâ ngekana igê na tamasinga iata na poropete koro iana.

⁷¹ Ngaia ki bani surua, vi hagatahigia tenira na merongaka ma tenia na raramohata na enoni hato, ga kitenigia.

⁷² Ngaia ki bani vi, vi takuira na êvarika ma ki hagamonaria na suruheri apuna iana.

⁷³ Ngaia ki bani naka na suruha tanga o Abaramo, na êvarika. Ma ngaia ki tohe renia ma ki suru gatagata,

⁷⁴ vi ngaia ki hagatahigia tenira na merongaka, hanana igia ka rahesia puruguni.

⁷⁵ Ge paronga koro ma ototo i maana suria na mêrihaka hagenani.

⁷⁶ Ma igo, kareku, ka page visigo, vi igo ka na poropete iana God, na Araha raha i teha. Igo ko page hagenago tarana na Araha, hanana go hagarêa na tara tarana na Araha.

⁷⁷ Ma igo ko page hagarongora na kariana na Araha, vi ngaia ki page hagatahira ma ki page bonotenigi na tasi iata.

⁷⁸ Suria na God iaka ki takuigia bâraha, ma ki marupegia bâkoro. Manga na kahuagana mave ki mavesia na maveta, ngaia ki page mavesigia renia na taroha na vuripusiaka.

⁷⁹ Ma ngaia ki page mavesira na enoni hato, ga magutenia na roto na mera, hanana i hagaotogia suria na tara tanga na marapeha.”

⁸⁰ Na kare ki raha, ma ki ramo na apena, ma ki gatagata na takoha koro igê na aitangihana. Ngaia ki oga igê na manihê, mataro me na tangiana i arâ me mave igê i pasita na Ai ni Isiraele.