HEBEREO 1 - Buka Apuna (I Lotu Katolika)

God ki tamasi i harana o Karena tangagia

¹ I nago hagarako God ki tamasi i harata na poropete tangara na êvarika igê rako na tarani.

² Ma i ngekê, na tangiani na hatongini, ngaia ki bani tamasi i harana o Karena tangagia. Ma renia na ani ngekê God ki hagavorara na ara ni marâ hato, ma nikâ ngaia ki na ani, God i bani atea, ki nahunigi na ara ni marâ hato.

³ Ngaia ki na taketakena na raramohana God. Ngaia ki na nununa ngavê God, ma ki usuria God. Ma renia na tamasinga raramohaga hunia ngaia ki têra na ara ni marâ hato, hanana ga gâga. Matena i tananira hato na enoni tenigi na tasi iata, ngaia ki aporo i pasina God raramohaga hunia, ma ki araha henia.

O Karena God ki raha teharira na angelo

⁴ O Karena God ki raha teharira na angelo, renia na ata, God i hêtana renia, ki teharigi na atata na angelo.

⁵ Suria God ki pe visia rârâ tanga ta na hitangita na angelo iana, ke vi, “O Kareku kani igo. I ngekê inê kê aparago.” Ma God ki pe vi nikâ tanga ta na hitangita na angelo iana, ke vi, “Inê ka no Vaemana. Ma ngaia ki no Kareku.”

⁶ Matena God ki hagatorangenia me noga o Karena i tage i maveta, ngaia ki vi nikâ, ki vi, “Na ara ni angelo hato iana God ki tuguhira, viga rahesia.”

⁷ God ki tamasi renira na angelo, ki vi vikê: “God ki katora na angelo iana, ka vora re na roga raha. Ma ki katora na kariana, ka vora re na vavatani na gi.”

⁸ Ma God ki tamasi renia nga o Karena, ki vi vikê: “Na arahanga iamu, God, ki page gâga tare ma tarema! Igo ko marungira na kariamu igê na otoha.

⁹ Igo ko takuia na otoha, ma ko kikitenigi na marâ, ga pe oto. Tahema God, inê na God iamu, kê bani atego, ma kê bani kasigo akê nga teharira na kariamu.”

¹⁰ Ngaia ki vi nikâ: “Igê na haganegahana igo, Araha, ko hagavora na maveta, ma renigi na rimamu maremu igo ko hagavoragi na vavearo.

¹¹ Ngaira hato ka page maguhuru, ma igo nga ko page gâga tare, ki bê ki arâ. Ngaira hato ka page êvariga mangagi na gahu.

¹² Igo ko page rumira manga na gahu. Ma igo ko page urusigi mangagi na gahu, ga urusigi. Ma igo, igo nga ko page tagenana tare, ma ki asa hagetage, vi gu page me.”

¹³ God ki pe visia rârâ tanga ta na hitangita na angelo iana, ke vivi: “Gu oga so heniê ikê igê na atohaku, igê na otohaku, ku araha, mataro me kê katora na merongamu, ka voravora re na êguga iamu.”

¹⁴ Hoita, na angelo hato ngaira ka na nunuta ma, ma ka tê viteana God, ma God ki hagatorangenira, hanana ga tamanira na ani, ga page tahi.