Jowẹlị 1 - FỊAFỊA BAỊBỤLỤ

Tomi Ma Kururum Igurube Na Samụnọ-sakị Dogi-ḅo Gulugulu Mẹ Gotẹ

¹ Mie KỊNỊNYANAḄỌ ḅe kẹ Jowẹlị Pẹtụwẹlị tụḅọ ḅe ḅara fịrịma oku mẹ:

² Ọmịnị omongiapụ, ó ḅeri-tokoloma ì pokii! Juda ḅụ sime-ḅọ sime-ḅọ pokii. Jen sakị nwẹn pembema ye paka tẹ ọmịna sakị anịanịa ọmịna atẹngịapụ sakị ḅụ?

³ Ọmịnị anị gbolomaye ḍuko ọmịna awọmẹ pịrịị, yee ini sọ ḍuko ịna awọmẹ pịrị, yee ịna awọmẹ pịkị ḍuko ḅo ḅarị apụ ma pịrị.

⁴ Fiin-arị igurube ogbo fị kọnma aị, ḍosiarị igurube ogbo fị tẹẹ; ḍosiarị igurube ogbo fị kọnma aị, ikiriarị igurube ogbo fị tẹẹ.

⁵ Ọ́ naa saakị tẹ owuu, ọmịnị iru ḅuu ebeka amẹẹ; owu pakamaa, ọmịnị tọrụ-ḅaa-a iru ḅuu apụ; girepu-asịnmgbọlụ ma tẹ ịn kẹ ịwọ iru mịẹ ḅẹ aị ma in guluguluma tẹẹ.

⁶ Jen sịẹ owu kẹ wamịna amakiri mẹ paka tẹẹ. Ịn kụrọ nyana wararị tẹ ịn pịkị kpọma ḅakam kịẹn-ḅịḅị ḅụ, ịna aka ma ọkụkụ aka oḅu ḅara oḅuarị, tẹ ịna tọrọkọ ḅẹ aka kịka ye anie ịyọrọ ọkụkụ aka sime-ḅara.

⁷ Ịn wamịna girepu-aḍụọ ma guluguluma tẹẹ, pịkị ịla asịn ma tokuru mẹnị fama tẹẹ. Ini apara ma kpụkpụnụ sin nwenii tẹ ḅara ma ḅịya-ḅịya tẹẹ.

⁸ Ọmịnị tomi, ọmịnị owu pakamaa, ẹrẹḅọtụḅọ akpa ịnwaịn tẹ á sime ḅẹ-yearị owiḅọ fị kururu ḅara.

⁹ Mgbọlị-fịye ḅẹ agba na iru agba na Tamụnọ-warị mẹ ḅio daasịẹ tẹẹ; anịẹrẹsị KỊNỊNYANAḄỌ ḅe fịrịmẹnjịapụ, agbamịẹapụ ma kururuarị

¹⁰ Ḍụọ-akiri ma gulugulu tẹẹ, kiri mẹ ḅarị fịaị pakama-a; anịẹrẹsị mgbọlị-fịye ḅarị ofori. Ịwọ iru fa tẹẹ, Pulo sọ fa tẹẹ.

¹¹ Ọmịnị ḍụọ-kọrịapụ, ó ḅioḅẹngbọ sii nyanaa; ọmịnị girepu-aḍụọ ma ḍikiḍikiarịapụ, ọmịnị owu pakamaa; ịn kẹ witi na bali na sịn afịaị ma inn, soku-ḅẹ afịaị mamgba gulugulu tẹ ẹrẹsị.

¹² Girepu-aḍụọ ma na, ịla asịn ma na, eneme ma na kpatụ tẹẹ. Fị-fị asịn mamgba ịnyịnya sara tẹ fịịm. Tomi ḅarị inetẹ ḍereku-a.

Ịn Tomi Ma Ḅẹẹm Ịn Pịkịma Tamụnọ Dama-ḅoo

¹³ Ọmịnị agbamịẹapụ, ọmịnị ọmịna akapa ḅiri tẹ owuu, ọmịnị agbamịẹ-anga mẹ ḅụ fịrịmẹnjịarị apụ, ọmịnị owuu! Ó mu Tamụnọ-warị mẹ ḅio bebe ḍin kẹ kururuu! Mgbọlụ-fịye ḅẹ agba na iru agba na daasịẹ tẹẹ, Tamụnọ warị mẹ ḅio.

¹⁴ Ó ḅuru-ịmọ tọn pakamaa, kobiri sịịn! Amakiri mẹ ḅẹ sịḅịdapụ ma na tomi ma na kobiri ḅoo, KỊNỊNYANAḄỌ ọmịna Tamụnọ ḅẹ Warị mẹ ḅio, tẹ owu pakama ọ̀ pịrịị.

¹⁵ Yei, anị ḅalafama ene mẹ! Anị Kụrọmamgba-nyana KỊNỊNYANAḄỌ ḅe amakiri mẹ guluguluma ḅarị ene mẹ ḅo kpeki tẹẹ.

¹⁶ Ḍikii! Wamịna tọrọkọ anị paka tẹẹ: wa soku-ḅẹ afịaị ma gulugulu fama tẹẹ. Wamịna Tamụnọ ḅe warị mẹ ḅio sọ ḍereku fa tẹẹ.

¹⁷ Samụnọtẹ kiri mẹ ḅio, ḍiḅi aị ma kpatụarị. Kẹ koko ḅẹ mgbọlị-afịaị sọ ḅarị ofori, tẹ mie ḅụ mgbọlị-afịaị koko ayọ ma kaan tẹ koro simearị.

¹⁸ Nambulo ma olokuarị ḅara ḍikii! Ịn fị ḅẹ osuka gotẹ mẹnjị-ikelekelarị; anana ogbo-ogbo ma sọ tọrụsiẹrịarị.

¹⁹ KỊNỊNYANAḄỌ, àrị owu pakama ị́ pịrịarị, osuka ma na sịn ma na samụnọ-kpakịkị tẹ ẹrẹsị, gbala fịnị arị dọkịma ye ọkụ.

²⁰ Piri-ḅio-ḅẹ anama ma sọ owu pakama ị́ pịrịarị, ḍawọ ḅio ḅẹ aminji ma ḅo fa kụlụkụlụ tẹ ẹrẹsị.