Numbers 34 - ქართული ბიბლია სრული ვერსია

¹ და ელაპარაკა უფალი მოსეს და უთხრა:

² „უბრძანე ისრაელიანთ და უთხარი მათ: მალე შეხვალთ თქვენ ქანაანის ქვეყანაში. და აჰა, ესაა ქვეყანა, რომელიც გერგებათ სამკვიდროდ, ქვეყანა ქანაანისა თავისი საზღვრებით.

³ თქვენი იქნება სამხრეთის მხარე ცინის უდაბნოდან, ედომის მახლობლად, გექნებათ სამხრეთ საზღვარი მარილოვანი ზღვის კიდიდან აღმოსავლეთის მიმართულებით,

⁴ და გადაუხვევს საზღვარი სამხრეთიდან ყაკრაბიმის მაღლობისაკენ და გაივლის ცინისაკენ, და იქნება მისი გარე საზღვარი სამხრეთიდან კადეშ-ბარნეაყის მიმართულებით, და იგი გავა ხაცარ-ადარისაკენ და ჩაუვლის ყაცმონს.

⁵ გადაუხვევს საზღვარი ყაცმონიდან ეგვიპტის ნაღვარევისაკენ და გავა ზღვის მიმართულებით.

⁶ ხოლო დასავლეთის საზღვრად გექნებათ დიდი ზღვის სანაპირო. ეს იქნება თქვენთვის დასავლეთის საზღვარი.

⁷ და ეს იქნება თქვენთვის ჩრდილოეთის საზღვარი: დიდი ზღვიდან გაატარეთ იგი ჰორის მთის მიმართულებით.

⁸ ჰორის მთიდან გაატარეთ იგი ხამათისაკენ, და იყოს საზღვრის ბოლო ცედადთან.

⁹ და გავა საზღვარი ზიფრონისაკენ, და იქნება მისი ბოლო ხაცარ-ყენანთან. ეს გექნებათ ჩრდილოეთის საზღვრად.

¹⁰ და გაატარეთ საზღვარი აღმოსავლეთის საზღვარი ხაცარ-ყენანიდან შეფამისკენ,

¹¹ და დაეშვება საზღვარი შეფამიდან რიბლასაკენ, ყაინის აღმოსავლეთით, და დაეშვება საზღვარი და შეეხება ქინერეთის ზღვის სანაპიროს აღმოსავლეთიდან.

¹² და დაეშვება საზღვარი იორდანესაკენ და იქნება მისი ბოლო მარილოვან ზღვასთან. ეს იქნება თქვენი ქვეყანა მისი საზღვრებით ყოველი მხრიდან.“

¹³ და უბრძანა მოსემ ისრაელიანთ ასე: „აჰა, ქვეყანა, რომელსაც დაიმკვიდრებთ წილისყრით, რომლის მიცემაც ბრძანა უფალმა ცხრა ტომისათვის და მანაშეანთა ნახევარტომისათვის.

¹⁴ რადგან რეუბენიანთა ტომმა თავისი გვარეულობების მიხედვით, და გადიანთა ტომმა თავისი გვარეულობების მიხედვით, და მანაშეს ნახევარტომმა მიიღეს თავიანთი წილი.

¹⁵ ამ ორმა ტომმა და ნახევარტომმა მიიღეს თავიანთი წილი იორდანეს გაღმა, იერიხოს პირდაპირ, აღმოსავლეთით.“

¹⁶ და ელაპარაკა უფალი მოსეს და უთხრა:

¹⁷ „ეს არის იმ კაცთა სახელები, რომელნიც გაანაწილებენ ქვეყანას: ელეაზარ მღვდელი და იესო, ძე ნავესი.

¹⁸ თითო ტომიდან თითო თავკაცი მოიყვანეთ ქვეყნის გასანაწილებლად.

¹⁹ და ეს არის სახელები ამ კაცებისა: იუდას ტომიდან ქალები, იეფუნეს ძე;

²⁰ სიმეონიანთა ტომიდან შემუელი, ძე ყამიჰუდისა;

²¹ ბენიამინის ტომიდან ელიდადი, ძე ქისლონისა;

²² დანიანთა ტომიდან თავკაცი ბუკი, ძე იოგლისა;

²³ იოსებიანთაგან: მანაშეანთა ტომიდან თავკაცი ხანიელი, ძე ეფოდისა;

²⁴ ეფრემიანთა ტომიდან თავკაცი კემუელი, ძე შიფტანისა;

²⁵ ზებულუნიანთა ტომიდან თავკაცი ელიცაფანი, ძე ფარნაქისა;

²⁶ ისაქარიანთა ტომიდან თავკაცი ფალტიელი, ძე ყაზანისა;

²⁷ აშერიანთა ტომიდან თავკაცი ახიჰუდი, ძე შელომისა;

²⁸ ნაფთალიანთა ტომიდან თავკაცი ფედაჰელი, ძე ყამიჰუდისა.“

²⁹ ესენი არიან ისინი, რომლებსაც უბრძანა უფალმა ქანაანის ქვეყნის განაწილება ისრაელიანთათვის.