Numbers 32 - ქართული ბიბლია სრული ვერსია

¹ რეუბენიანებს და გადიანებს დიდძალი საქონელი ჰყავდათ; და იხილეს, რომ ქვეყანა იაყზერისა და ქვეყანა გალაადისა ვარგოდა ფარებისათვის.

² მივიდნენ გადიანები და რეუბენიანები, და უთხრეს მოსეს და ელეაზარ მღვდელს და თემის თავკაცებს:

³ ყატაროთი, დიბონი, იაყზერი, ნიმრა, ხეშბონი, ელყალე, შებამი, ნებო და ბეყონი –

⁴ ქვეყანა, რომელიც მოსრა უფალმა ისრაელის თემის წინაშე, კარგია ფარებისათვისა, შენს მსახურებს კი ფარები ჰყავთ.

⁵ და კიდევ უთხრეს: „თუ მადლი ვპოვეთ შენს თვალში, მიეცი ეს ქვეყანა შენს მსახურთ სამფლობელოდ; ნუ გადაგვიყვან იორდანეს გადაღმა.“

⁶ მაგრამ უთხრა მოსემ გადიანთ და რეუბენიანთ: „თქვენი ძმები ომში წავლენ და თქვენ აქ დარჩებით?

⁷ რატომ უცრუებთ გულს ისრაელიანებს იმ ქვეყანაში გადასვლაზე, რომელიც მისცა მათ უფალმა?

⁸ ასე მოიქცნენ თქვენი მამები, როცა გავგზავნე ისინი კადეშ-ბარნეაყიდან ქვეყნის დასაზვერად;

⁹ და მივიდნენ ისინი ეშქოლის ხეობამდე და იხილეს ქვეყანა, და დაუშალეს ისრაელიანთ იმ ქვეყანაში შესვლა, რომელიც მისცა მათ უფალმა.

¹⁰ აღეგზნო უფლის რისხვა იმ დღეს, დაიფიცა მან და თქვა:

¹¹ ვერ იხილავენ ეგვიპტიდან გამოსული კაცები, 20 წლისა და ზევით, იმ ქვეყანას, რომელზეც შევფიცე აბრაამს, ისააკს და იაკობს, რადგან არ დამემორჩილნენ მე,

¹² გარდა ქალებისა, კენიზელი იეფუნეს ძისა, და იესო ნავეს ძისა, რადგან ისინი დაემორჩილნენ უფალს.

¹³ და აღეგზნო რისხვა უფლისა ისრაელზე და ახეტიალებდა მათ უდაბნოში ორმოც წელიწადს, ვიდრე არ გადაშენდა მთელი თაობა, რომელიც ბოროტად იქცეოდა უფლის თვალში.

¹⁴ და აჰა, ახლა თქვენ აღმდგარხართ თქვენი მამების მაგიერ, ცოდვილ კაცთა ნაშიერნო, რათა კვლავ გააძლიეროთ უფლის მრისხანება ისრაელზე.

¹⁵ თუ ზურგს შეაქცევთ უფალს, ის კვლავ მიატოვებს ისრაელიანთ უდაბნოში, და დაღუპავთ მთელ ამ ხალხს.“

¹⁶ და მივიდნენ ისინი მასთან, და უთხრეს: „ჩვენ აქ ავაშენებთ ცხვრის ფარეხებს ჩვენი ფარებისათვის და ქალაქებს – ჩვენი ბავშვებისათვის.

¹⁷ ჩვენ თვითონ კი უმალ შევიარაღდებით და წავუძღვებით ისრაელიანთ, ვიდრე მათ თავ-თავიანთ ადგილას არ მივიყვანთ. ხოლო ჩვენი ბავშვები დარჩებიან გამაგრებულ ქალაქებში, ამ ქვეყნის მკვიდრთა საფრთხის გამო.

¹⁸ არ დავბრუნდებით ჩვენს სახლებში, ვიდრე არ დაიმკვიდრებს ყოველი ისრაელიანი თავის სამკვიდროს.

¹⁹ რადგან არ დავიმკვიდრებთ მათთან ერთად იორდანეს გაღმა და იმას იქით, თუკი იორდანეს გამოღმა, აღმოსავლეთ მხარეს, შეგვხვდება სამკვიდრო.“

²⁰ და უთხრა მათ მოსემ: „თუ გააკეთებთ ამას, თუ შეიარაღებულნი გახვალთ საომრად უფლის წინაშე,

²¹ და თითოეული თქვენთაგანი შეიარაღებული გადავა იორდანეს გაღმა უფლის წინაშე, ვიდრე არ განდევნის უფალი თავის მტრებს თავის წინაშე,

²² და თუ დაპყრობილი იქნება ქვეყანა უფლის წინაშე, მერე დაბრუნდით და უბრალონი იქნებით უფლისა და ისრაელის წინაშე, და თქვენი სამფლობელო იქნება ეს ქვეყანა უფლის წინაშე.

²³ თუ ასე არ გააკეთებთ, მაშინ შესცოდავთ უფალს და იცოდეთ, რომ თქვენი ცოდვა მოგეწევათ.

²⁴ აიშენეთ ქალაქები თქვენი ბავშვებისათვის და ფარეხები თქვენი ფარებისათვის, ოღონდ ის, რაც თქვენი პირიდან გამოვიდა, შეასრულეთ.“

²⁵ და უთხრეს მოსეს გადიანებმა და რეუბენიანებმა: „შენი მსახურნი ისე მოიქცევიან, როგორც ჩვენი ბატონი ბრძანებს.

²⁶ ჩვენი ბავშვები და ჩვენი ცოლები, ჩვენი ფარები და მთელი ჩვენი საქონელი დარჩება აქ, გალაადის ქალაქებში.

²⁷ ხოლო ყოველი შენი მსახური, საომრად შეიარაღებული უფლის წინაშე გავა ბრძოლაში, როგორც ამბობს ჩვენი ბატონი.“

²⁸ და უბრძანა მათ შესახებ მოსემ ელეაზარ მღვდელს, იესო ნავეს ძეს, და ისრაელიანთა ტომთა მამამთავრებს,

²⁹ და უთხრა მათ მოსემ: „თუ გადავლენ გადიანები და რეუბენიანები თქვენთან ერთად იორდანეს გაღმა საომრად, შეიარაღებულნი უფლის წინაშე, და დაპყრობილ იქნება ის ქვეყანა თქვენს წინაშე, მაშინ მისცემთ მათ გალაადის ქვეყანას სამფლობელოდ;

³⁰ ხოლო თუ არ გადმოვლენ შეიარაღებულნი თქვენთან ერთად, მაშინ ისინიც მიიღებენ სამფლობელოს თქვენს შორის ქანაანის ქვეყანაში.“

³¹ მიუგეს გადიანებმა და რეუბენიანებმა: „როგორც უფალმა უთხრა შენს მსახურთ, ისე გავაკეთებთ.

³² ჩვენ გადავალთ შეიარაღებულნი უფლის წინაშე ქანაანის ქვეყანაში და ჩვენი სამკვიდრებლის სამფლობელო იორდანეს გამოღმა გვექნება.“

³³ და მისცა მათ მოსემ, გადიანთ და რეუბენიანებს, და იოსების ძის, მანაშეს, ნახევარტომს, სამეფო სიხონისა, ამორეველთა მეფისა, და სამეფო ყოგისა, ბაშანის მეფისა, მიწა მისი ქალაქებითა და ამ ქვეყნის ქალაქების შემოგარენით.

³⁴ და ააშენეს გადიანებმა დიბონი, ყატაროთი, ყაროყერი,

³⁵ და ყათროთ-შოფანი, იაყზერი, იოგბეჰა,

³⁶ ბეთ-ნიმრა და ბეთ-ჰარანი, გამაგრებული ქალაქები მათი ფარეხებითურთ.

³⁷ და რეუბენიანებმა ააშენეს ხეშბონი, ელყალე, კირიათაიმი,

³⁸ ნებო და ბაყალ-მეყონი, რომელთაც სახელები შეუცვალეს, და სიბმა; და უწოდეს სახელები ქალაქებს, რომელნიც მათ ააშენეს.

³⁹ წავიდნენ ძენი მაქირისა, მანაშეს ძისა, გალაადში და დაიპყრეს იგი, და განდევნეს ამორეველნი, რომელნიც იყვნენ იქ;

⁴⁰ და მისცა მოსემ გალაადი მაქირს, მანაშეს ძეს, და ის დამკვიდრდა იქ.

⁴¹ იაირი, მანაშეს ძე, წავიდა და დაიპყრო მათი სოფლები, და უწოდა მათ იაირის სოფლები.

⁴² და წავიდა ნობახი და დაიპყრო კენათი და მისი გარეუბნები და უწოდა მას ნობახი თავისი სახელის მიხედვით.