Numbers 29 - ქართული ბიბლია სრული ვერსია

¹ მეშვიდე თვის პირველ დღეს წმიდა შეკრებილობა გქონდეთ. არავითარი საქმე არ აკეთოთ. ბუკისცემის დღე იყოს ის თქვენთვის.

² და შესწირეთ სრულადდასაწველი კეთილსურნელებად უფლისათვის: ერთი მოზვერი, ერთი ვერძი, შვიდი უხინჯო წელგამოვლილი კრავი.

³ მათთან ერთად პურეულის ძღვენი ხორბლის გამტკიცული ფქვილისა ზეთში მოზელილი, ეფის სამი მეათედი მოზვერზე, ორი მეათედი ვერძზე,

⁴ და ერთი მეათედი თითოეულ იმ შვიდ კრავზე,

⁵ და ერთი ვაცი ცოდვის მსხვერპლად, რათა მიგეტეოთ.

⁶ გარდა ახალმთვარობის სრულადდასაწველისა და მისი პურეულის ძღვენისა, და მათი საღვრელებისა, რჯულის მიხედვით კეთილსურნელებად შესწირეთ საცეცხლო მსხვერპლი უფალს.

⁷ მეშვიდე თვის მეათე დღეს წმიდა შეკრებილობა გქონდეთ. დაიოკეთ თქვენი სულები და არავითარი საქმე არ აკეთოთ.

⁸ და შეწირეთ სრულადდასაწველი უფალს კეთილსურნელებად: ერთი მოზვერი, ერთი ვერძი, შვიდი უხინჯო წელგამოვლილი კრავი;

⁹ მათთან ერთად პურეულის ძღვენი, ხორბლის გამტკიცული ფქვილი ზეთში მოზელილი, ეფის სამი მეათედი მოზვერზე, ორი მეათედი ვერძზე,

¹⁰ და ერთი მეათედი თითოეულ იმ შვიდ კრავზე.

¹¹ ერთი ვაცი ცოდვის მსხვერპლად, თქვენს მისატევებლად, გარდა ცოდვის მსხვერპლისა და ყოველდღიური სრულადდასაწველისა და მისი პურეულის ძღვენისა და მათი საღვრელებისა.

¹² მეშვიდე თვის მეთხუთმეტე დღეს წმიდა შეკრებილობა გქონდეთ. არავითარი საქმე არ აკეთოთ და იდღესასწაულეთ უფლის დღესასწაული შვიდ დღეს;

¹³ და შესწირეთ უფალს სრულადდასაწველი, საცეცხლო მსხვერპლი – კეთილსურნელებად: 13 მოზვერი, 2 ვერძი, 14 უხინჯო წელგამოვლილი კრავი;

¹⁴ მათი პურეულის ძღვენი სამი მეათედი ეფა ხორბლის გამტკიცული ფქვილი ზეთში მოზელილი, თითო მოზვერზე იმ ცამეტ მოზვერთაგან; ორი მეათედი თითო ვერძზე იმ ორ ვერძთაგან,

¹⁵ და ეფის ერთი მეათედი თითო კრავზე იმ თოთხმეტ კრავთაგან.

¹⁶ და ერთი ვაცი ცოდვის მსხვერპლად, გარდა ყოველდღიური სრულადდასაწველისა, მისი პურეულის ძღვენისა და მისი საღვრელისა.

¹⁷ მეორე დღეს შესწირე: 12 მოზვერი, 2 ვერძი, 14 უხინჯო წელგამოვლილი კრავი;

¹⁸ და მათი პურეულის ძღვენი, და მათი საღვრელები მოზვრებისათვის, ვერძებისათვის და კრავებისათვის მათი რაოდენობის მიხედვით, წესისამებრ,

¹⁹ და ერთი ვაცი ცოდვის მსხვერპლად, გარდა ყოველდღიური სრულადდასაწველისა, მისი პურეულის ძღვენისა და მათი საღვრელებისა.

²⁰ მესამე დღეს: 11 მოზვერი, ორი ვერძი, 14 უხინჯო წელგამოვლილი კრავი,

²¹ და მათი პურეულის ძღვენი და მათი საღვრელები მოზვერებისათვის, ვერძებისათვის და კრავებისათვის მათი რაოდენობის მიხედვით, წესისამებრ,

²² და ერთი ვაცი ცოდვის მსხვერპლად, გარდა ყოველდღიური სრულადდასაწველისა და მისი პურეულის ძღვენისა და მისი საღვრელისა.

²³ მეოთხე დღეს: ათი მოზვერი, ორი ვერძი, 14 უხინჯო წელგამოვლილი კრავი,

²⁴ და მათი პურეულის ძღვენი და მათი საღვრელები მოზვერებისათვის, ვერძებისათვის და კრავებისათვის, მათი რაოდენობის მიხედვით, წესისამებრ,

²⁵ და ერთი ვაცი ცოდვის მსხვერპლად, გარდა ყოველდღიური სრულადდასაწველისა, მისი პურეულის ძღვენისა და მისი საღვრელისა.

²⁶ მეხუთე დღეს: ცხრა მოზვერი, ორი ვერძი, 14 უხინჯო წელგამოვლილი კრავი,

²⁷ და მათი პურეულის ძღვენი, და მათი საღვრელები მოზვერებისათვის, ვერძებისათვის და კრავებისათვის, მათი რაოდენობის მიხედვით, წესისამებრ.

²⁸ და ერთი ვაცი ცოდვის მსხვერპლად, გარდა ყოველდღიური სრულადდასაწველისა, მისი პურეულის ძღვენისა და მისი საღვრელისა.

²⁹ მეექვსე დღეს: რვა მოზვერი, ორი ვერძი, 14 უხინჯო წელგამოვლილი კრავი,

³⁰ და მათი პურეულის ძღვენი და მათი საღვრელები მოზვერებისათვის, ვერძებისათვის და კრავებისათვის მათი რაოდენობის მიხედვით, წესისამებრ;

³¹ და ერთი ვაცი ცოდვის მსხვერპლად, გარდა ყოველდღიური სრულადდასაწველისა, მისი პურეულის ძღვენისა და მისი საღვრელებისა.

³² მეშვიდე დღეს: შვიდი მოზვერი, ორი ვერძი, 14 უხინჯო წელგამოვლილი კრავი,

³³ და მათი პურეულის ძღვენი, და მათი საღვრელები მოზვერებისათვის, ვერძებისათვის და კრავებისთვის, მათი რაოდენობის მიხედვით, წესისამებრ,

³⁴ და ერთი ვაცი ცოდვის მსხვერპლად, გარდა ყოველდღიური სრულადდასაწველისა, მისი პურეულის ძღვენისა და მისი საღვრელისა.

³⁵ და მერვე დღეს დღესასწაული იყოს თქვენთვის: არავითარი საქმე არ აკეთოთ;

³⁶ შესწირეთ სრულადდასაწველი, საცეცხლო მსხვერპლი, კეთილსურნელებაა უფლისათვის: ერთი მოზვერი, ერთი ვერძი, შვიდი უხინჯო წელგამოვლილი კრავი,

³⁷ და მათი პურეულის ძღვენი და მათი საღვრელები მოზვრისათვის, ვერძისათვის და კრავებისათვის, მათი რაოდენობის მიხედვით, წესისამებრ,

³⁸ და ერთი ვაცი ცოდვის მსხვერპლად, გარდა ყოველდღიური სრულადდასაწველისა და მისი პურეულის ძღვენისა და მისი საღვრელისა.

³⁹ ესენი შესწირეთ უფალს თქვენს დღესასწაულებზე, გარდა თქვენი აღთქმისა და თქვენი ნებაყოფლობითი მსხვერპლისა: თქვენი სრულადდასაწველები და თქვენი პურეულის ძღვენი და თქვენი საღვრელები და თქვენი სამადლობელო მსხვერპლები.“