Numbers 28 - ქართული ბიბლია სრული ვერსია

¹ და ელაპარაკა უფალი მოსეს და უთხრა:

² „უბრძანე ისრაელიანებს და უთხარი მათ, ნუ დაივიწყებენ, რომ თავის დროზე შემომწირონ საჩემო შესაწირავი, ჩემი პური, ჩემი საცეცხლო მსხვერპლი, საჩემო კეთილსურნელებად.

³ და უთხარი მათ: ესაა საცეცხლო მსხვერპლი, რომელიც უნდა შესწიროთ-თქო უფალს: ორი უხინჯო წელგამოვლილი კრავი, ყოველდღიურად, მუდმივი აღსავლენი,

⁴ ერთი კრავი დილით და მეორე კრავი საღამო ხანს;

⁵ და პურეულის საძღვნოდ – ეფის მეათედი ხორბლის გამტკიცული ფქვილი ჰინის მეოთხედ ზეთში მოზელილი.

⁶ ეს – ყოველდღიური სრულადდასაწველია, როგორიც სინაის მთაზე იქნა შეწირული საცეცხლო მსხვერპლი უფლისათვის კეთილსურნელებად.

⁷ და მასთან ერთად საღვრელი ჰინის მეოთხედია ერთ კრავზე. საწმიდარში დაღვარე ღვინის საღვრელი უფლისათვის.

⁸ მეორე კრავი საღამო ხანს შესწირე დილანდელი ძღვენითა და საღვრელით. შესწირე უფალს საცეცხლო მსხვერპლი კეთილსურნელებად.

⁹ შაბათ დღეს შესწირე ორი უხინჯო წელგამოვლილი კრავი, და პურეულის ძღვენი ეფის ორი მეათედი ხორბლის გამტკიცული ფქვილი ზეთში მოზელილი, და მისი საღვრელი.

¹⁰ ეს საშაბათო სრულადდასაწველია ყოველ შაბათს, გარდა ყოველდღიური სრულადდასაწველისა და მისი საღვრელისა.

¹¹ თქვენი ახალმთვარობის პირველ დღეს შესწირეთ სრულადდასაწველი უფალს: ორი მოზვერი, ერთი ვერძი და შვიდი უხინჯო წელგამოვლილი კრავი

¹² და პურეულის ძღვნად ეფის სამი მეათედი ხორბლის გამტკიცული ფქვილი ზეთში მოზელილი, თითო მოზვერზე, და ეფის ორი მეათედი ხორბლის გამტკიცული ფქვილი ზეთში მოზელილი, თითო ვერძზე,

¹³ და პურეულის საძღვნოდ თითო კრავზე ეფის ერთი მეათედი ხორბლის გამტკიცული ფქვილი ზეთში მოზელილი; ეს არის სრულადდასაწველი კეთილსურნელება, საცეცხლო მსხვერპლი უფლისათვის.

¹⁴ მათი საღვრელი უნდა იყოს: ნახევარი ჰინი ღვინო მოზვერზე, ერთი მესამედი ჰინი ვერძზე და ერთი მეოთხედი ჰინი კრავზე. ეს არის სრულადდასაწველი ახალმთვარობას, წელიწადის ყოველ თვეს.

¹⁵ და ერთი ვაცი შესწირეთ უფალს ცოდვის მსხვერპლად; ყოველდღიური სრულადდასაწველის გარდა უნდა შეიწიროს იგი, მის საღვრელთან ერთად.

¹⁶ პირველი თვის მეთოთხმეტე დღეს უფლის პასექია.

¹⁷ და იმავე თვის მეთხუთმეტე დღეს დღესასწაულია. შვიდი დღე ხმიადი უნდა ჭამოთ.

¹⁸ პირველი დღე წმიდა შეკრებილობისაა; არავითარი საქმე არ აკეთოთ.

¹⁹ და შესწირეთ საცეცხლო, სრულადდასაწველი მსხვერპლი უფალს: ორი მოზვერი, ერთი ვერძი და შვიდი უხინჯო წელგამოვლილი კრავი.

²⁰ და მათთან ერთად მოიტანეთ პურეულის ძღვენი: ხორბლის გამტკიცული ფქვილი ზეთში მოზელილი, ეფის სამი მეათედი მოზვერზე და ორი მეათედი ვერძზე,

²¹ ეფის ერთი მეათედი მოიტანე თითოეულ იმ შვიდ კრავზე,

²² და ერთი ვაცი ცოდვის მსხვერპლად, რათა მიგეტეოთ;

²³ გარდა დილის სრულადდასაწველისა, რაც ყოველდღიური სრულადდასაწველია, შესწირეთ ესენი.

²⁴ ასე მოიტანეთ შვიდეულის ყოველ დღეს: პური საცეცხლო მსხვერპლად, კეთილსურნელებად უფლისათვის; გარდა ყოველდღიური სრულადდასაწველისა და მისი საღვრელისა ესეც უნდა მოიტანოთ.

²⁵ და მეშვიდე დღეს წმიდა შეკრებილობა გქონდეთ, არავითარი საქმე არ აკეთოთ.

²⁶ და პირველნაყოფთა დღეს, როცა ახალი პურეულის ძღვენს შესწირავთ უფალს თქვენს შვიდეულებში, წმიდა შეკრებილობა გქონდეთ. არავითარი საქმე არ აკეთოთ.

²⁷ შესწირეთ სრულადდასაწველი კეთილსურნელებად უფალს: ორი მოზვერი, ერთი ვერძი და შვიდი უხინჯო წელგამოვლილი კრავი,

²⁸ და მათთან ერთად პურეულის ძღვენი ხორბლის გამტკიცული ფქვილისა ზეთში მოზელილი: ეფის სამი მეათედი თითო მოზვერზე, ორი მეათედი ვერძზე,

²⁹ ერთი მეათედი თითოეულ იმ შვიდ კრავზე,

³⁰ და ერთიც ვაცი თქვენი მიტევებისთვის.

³¹ ყოველდღიური სრულადდასაწველისა და მისი პურეულის ძღვენის გარდა შესწირეთ ესენი მათ საღვრელებთან ერთად. უხინჯონი უნდა იყვნენ ისინი.