Numbers 27 - ქართული ბიბლია სრული ვერსია

¹ და მოვიდნენ ასულნი ცელოფხადისა, ხეფერის ძისა, გალაადის ძისა, მაქირის ძისა მანაშეს ძისა, იოსების ძის საგვარეულოდან. მის ასულებს ერქვათ: მახლა, ნოყა, ხოგლა, მილქა და თირცა.

² და წარდგნენ მოსეს წინაშე და ელეაზარ მღვდლის წინაშე, თავკაცთა და მთელი თემის წინაშე კარვის კართან ამ სიტყვებით:

³ „მამაჩვენი უდაბნოში მოკვდა და არ ყოფილა უფლის წინააღმდეგ ამბოხებულთა დასში, კორახის დასში, არამედ თავისი ცოდვით მოკვდა. და ვაჟი არ ჰყავდა მას.

⁴ რატომ უნდა გაქრეს მამაჩვენის სახელი თავისი საგვარეულოდან იმის გამო, რომ ვაჟი არ ჰყავდა? მოგვეცი ჩვენ სამკვიდრებელი მამაჩვენის ძმებს შორის.“

⁵ წარადგინა მოსემ მათი საქმე უფლის წინაშე.

⁶ და უთხრა უფალმა მოსეს:

⁷ „მართალს ამბობენ ასულნი ცელოფხადისა, მიეცი მათ საკუთარი სამფლობელო მათი მამის ძმათა შორის და გადაიტანე მათი მამის სამკვიდრებელი მათზე.

⁸ და ისრაელიანებს განუცხადე: ‘თუ კაცი მოკვდება და ვაჟი არ ეყოლება მას, გადაიტანეთ მისი სამკვიდრებელი მის ასულზე.

⁹ თუ არ ჰყავს ასული, მაშინ გადაეცით მისი სამკვიდრებელი მის ძმებს.

¹⁰ თუ არ ჰყავს მას ძმები, მაშინ გადაეცით მისი სამკვიდრებელი მისი მამის ძმებს.

¹¹ და თუ არ ჰყავს ძმები მის მამას, მაშინ გადაეცით მისი სამკვიდრებელი მის უახლოეს ნათესავს მისი საგვარეულოდან, და დაიმკვიდროს იგი. და ეს იყოს ისრაელიანთათვის სამართლის წესად, როგორც უბრძანა უფალმა მოსეს.’“

¹² უთხრა უფალმა მოსეს: „ადი ყაბარიმის მთაზე და გადახედე ქვეყანას, რომელიც მე მივეცი ისრაელიანთ.

¹³ და როცა იხილავ მას, შენც შეეძინები შენს მამებს, როგორც შეეძინა აარონი, შენი ძმა.

¹⁴ რადგან ეურჩეთ ჩემს ბრძანებას ცინის უდაბნოში თემის დრტვინვის დროს, როცა ჩემი სიწმიდე უნდა გამოცხადებულიყო მათ თვალწინ წყლებთან.“ (ეს არის მერიბათ-კადეშის წყლები ცინის უდაბნოში.)

¹⁵ და უთხრა მოსემ უფალს:

¹⁶ „დაე უფალმა, ყოველი ხორციელის სულთა ღმერთმა, დაუდგინოს კაცი ამ თემს,

¹⁷ რომელიც გამოვა მათ წინაშე და რომელიც შევა მათ წინაშე, რომელიც გაიყვანს მათ და რომელიც შემოიყვანს მათ, რათა არ იყოს უფლის თემი იმ ცხვარივით, რომელსაც არა ჰყავს მწყემსი.“

¹⁸ და უთხრა უფალმა მოსეს: „მოიყვანე იესო, ძე ნავესი, კაცი, რომელშიც არის სული, და დაადე ხელი,

¹⁹ დააყენე იგი ელეაზარ მღვდლის წინაშე და მთელი თემის წინაშე, და დამოძღვრე იგი მათ თვალწინ.

²⁰ და უწილადე შენი დიდება, რათა უსმინოს მას ისრაელიანთა მთელმა თემმა.

²¹ მააგრამ ის უნდა იდგეს ელეაზარ მღვდლის წინაშე, რომელიც გამოიკითხავს მისთვის ურიმის სამართალს უფლის წინაშე; მისი ბრძანებით გავა და მისი ბრძანებით შემოვა ის, და ყოველი ისრაელიანთა მთელი თემი მასთან ერთად.“

²² და გააკეთა მოსემ, როგორც უბრძანა მას უფალმა, და მოიყვანა იესო და წარადგინა იგი ელეაზარ მღვდლის წინაშე და მთელი თემის წინაშე,

²³ დაასხა მას ხელები და დანიშნა იგი, როგორც ბრძანა უფალმა მოსეს პირით.