Numbers 17 - ქართული ბიბლია სრული ვერსია

¹ და ელაპარაკა უფალი მოსეს და უთხრა:

² დაელაპარაკე ისრაელიანთ და გამოართვი მათ კვერთხები – თითო კვერთხი თითო ტომს, ყოველ თავკაცს მამისსახლის მიხედვით; ყოველ კვერთხს თავისი პატრონის სახელი დააწერე.

³ ხოლო აარონის სახელი წააწერე ლევის კვერთხს, რადგან ერთი კვერთხია მათი მამისსახლის თავკაცისათვის.

⁴ დააწყვე ისინი საკრებულო კარავში სჯულის კიდობნის წინ, სადაც მე გამოგეცხადებით.

⁵ და ვისაც მე ამოვირჩევ, მისი კვერთხი აყვავდება; და ასე დავაცხრობ ისრაელიანთა ჯანყს, რომ აჯანყებულან თქვენს წინააღმდეგ.

⁶ უთხრა მოსემ ყოველივე ეს ისრაელიანთ, და მისცა მას ყველა თავკაცმა თითო კვერთხი, მათი ტომების მიხედვით, სულ 12 კვერთხი, და აარონის კვერთხი იყო მათ კვერთხებს შორის.

⁷ და დააწყო მოსემ კვერთხები უფლის წინაშე საკრებულო კარავში.

⁸ და მეორე დღეს შევიდა მოსე საკრებულო კარავში, და აჰა, აყვავდა აარონის კვერთხი ლევის სახლიდან, აყვავდა, გაიფურჩქნა ყვავილი და გამოისხა ნუში.

⁹ და გამოუტანა მოსემ ყველა კვერთხი უფლისაგან ყველა ისრაელიანს. ნახეს მათ და აიღო თითოეულმა თავისი კვერთხი.

¹⁰ და უთხრა უფალმა მოსეს: „დააბრუნე აარონის კვერთხი სჯულის კიდობნის წინ შესანახად, ნიშნად ჭირვეულ ძეთათვის, და შეწყდება მათი დრტვინვა ჩემზე, და აღარ მოისრებიან.“

¹¹ და გააკეთა მოსემ, როგორც უბრძანა უფალმა.

¹² და უთხრეს ისრაელიანებმა მოსეს: „აჰა, ვიხოცებით, იღუპება ყველა ჩვენგანი!

¹³ ყველა, ვინც მიუახლოვდება უფლის კარავს, კვდება. ნუთუ ყველანი დასაღუპად ვართ განწირული?“