Numbers 12 - ქართული ბიბლია სრული ვერსია

¹ და როცა ხაცეროთში იყვნენ, მირიამმა და აარონმა გაკილეს მოსე ქუშელი ცოლის გამო, რადგან ქუშელი ქალი შეირთო მან ცოლად.

² და თქვეს: „განა მხოლოდ მოსეს ელაპარაკებოდა უფალი? განა ჩვენც კი არ გველაპარაკებოდა?“ და ესმა ეს უფალს.

³ ხოლო მოსე იყო ძალზე თავმდაბალი კაცი დედამიწის ზურგზე მცხოვრებ ყველა ადამიანზე მეტად.

⁴ უეცრად უთხრა უფალმა მოსეს, აარონსა და მირიამს: „გამოდით სამივე საკრებულო კარავთან.“ და გავიდა სამივე.

⁵ და ჩამოვიდა უფალი ღრუბლის სვეტში, და დადგა კარვის შესასვლელთან, და მოუხმო აარონსა და მირიამს, და ორივე გავიდა.

⁶ და უთხრა: „ისმინეთ ჩემი სიტყვები: თუ არის ვინმე თქვენგანი უფლის წინასწარმეტყველი, მე, უფალი, ხილვაში ვეცხადები მას, სიზმარში ვლაპარაკობ მასთან.

⁷ მაგრამ ასე არაა ჩემს მსახურ მოსესთან; მას მინდობილი აქვს მთელი ჩემი სახლი.

⁸ მასთან მე პირისპირ ვლაპარაკობ, ცხადლივ და არა იგავებით, უფლის სახეს ჭვრეტს იგი. და როგორ არ გეშინიათ ჩემი მსახურის, მოსეს, წინააღმდეგ ლაპარაკისა?“

⁹ და აღინთო რისხვა უფლისა მათ მიმართ, და წავიდა იგი.

¹⁰ და ღრუბელი განშორდა კარავს. და აჰა, მირიამი თოვლივით დაფარა კეთრმა. და შეხედა აარონმა მირიამს, და აჰა, კეთრი მოსდებია მას.

¹¹ და უთხრა აარონმა მოსეს: „გევედრები, ბატონო ჩემო, ნუ დაგვსჯი, ასე უგუნურად რომ მოვიქეცით და შევცოდეთ.

¹² ნუ დაემსგავსება მირიამი იმ მკვდარს, რომელიც თავისი დედის საშოდან მკვრადშობილი გამოდის.“

¹³ და შეჰღაღადა მოსემ უფალს: „ღმერთო, გევედრები, განკურნე იგი!“

¹⁴ მაგრამ უფალმა უთხრა მოსეს: „მამამისს რომ მისთვის სახეში შეეფურთხებინა, შვიდ დღეს ხომ ვერ გამოჩნდებოდა სირცხვილით? დაე, შვიდ დღეს დაიმალოს ბანაკს გარეთ, და შემდეგ დაბრუნდეს.“

¹⁵ და გაიყვანეს მირიამი ბანაკს გარეთ შვიდი დღით. და ხალხი მირიამის დაბრუნებამდე არ აყრილა, რომ გზას გასდგომოდა.

¹⁶ შემდეგ დაიძრა ხალხი ხაცეროთიდან და დაბანაკდა ფარანის უდაბნოში.