Malachi 4 - ქართული ბიბლია სრული ვერსია

¹ რადგან აჰა, მოდის დღე, თონესავით ავარვარებული, და ყველა ამპარტავანი და ბოროტმოქმედი ჩალა იქნება და გადაბუგავს მათ მომავალი დღე, – ამბობს ყოვლისშემძლე უფალი, – ისე, რომ არ დატოვებს არცერთ ღერს.

² ამოგიბრწყინდებათ, ჩემი სახელის მოშიშნო, მზე სიმართლისა და კურნება იქნება მის ფრთებზე. თქვენც გამოხვალთ და აკუნტრუშდებით ბაგიდან გამოშვებული ხბორებივით.

³ გათელავთ უკეთურთ, რადგან უნდა გაცამტვერდნენ ისინი თქვენს ტერფებქვეშ იმ დღეს, რომელსაც მე ვამზადებ, – ამბობს ყოვლისშემძლე უფალი. –

⁴ გაიხსენეთ მოსეს, ჩემი მორჩილის, რჯული, წესები და სამართალნი, რომელიც ვუბრძანე მას ხორების მთაზე მთელი ისრაელისთვის.

⁵ აჰა, მოგივლენთ ელია წინასწარმეტყველს უფლის დიდი და საშინელი დღის დადგომამდე.

⁶ ის დააბრუნებს მამების გულს შვილების გულთან და შვილების გულს მამების გულთან, რომ ჩემი მოსვლისას არ შევმუსრო ქვეყანა შეჩვენებით.