Leviticus 12 - ქართული ბიბლია სრული ვერსია

¹ და ელაპარაკებოდა უფალი მოსეს და უთხრა:

² უთხარი ისრაელის ძეთ: თუ დაორსულდა ქალი და შვა ვაჟი, შობის შემდეგ შვიდ დღეს უწმიდურია ქალი; როგორც წიდოვნების დროს, ისე უწმიდურდება.

³ მერვე დღეს წინადაცვითონ ბიჭს ჩუჩის ხორცი.

⁴ 33 დღე იჯდეს ქალი თავისი სისხლის განწმედისათვის; არაფერს წმიდას არ შეეხოს და საწმიდარში არ მივიდეს, ვიდრე არ შესრულდება მისი განწმედის დღეები.

⁵ თუ გოგოს შობს, მაშინ იგი უწმიდურია ორ კვირას, ისევე, როგორც მისი წიდოვანების დღეებში, და 66 დღე იჯდეს თავისი სისხლის განწმედისათვის.

⁶ როცა დასრულდება მისი განწმედის დღეები ძისა ან ასულისათვის, მოიყვანოს წელგამოვლილი კრავი სრულადდასაწველად და მართვე მტრედისა ან გვრიტი ცოდვის შესაწირად საკრებულო კარვის შესასვლელთან, მღვდელთან;

⁷ მღვდელი შესწირავს ამას უფლის წინაშე, გამოითხოვს მისთვის შენდობას და განიწმიდება ქალი წიდოვნებისგან. ეს არის ვაჟისა თუ გოგოს შობის წესი.

⁸ თუ ქალს არ მიუწვდება ხელი კრავზე, მაშინ აიღოს ორი გვრიტი ან მტრედის ორი მართვე: ერთი სრულადდასაწველად, ხოლო მეორე ცოდვის მსხვერპლად; და შეუნდობს მას მღვდელი, და გასუფთავდება იგი.