Joel 4 - ქართული ბიბლია სრული ვერსია

¹ რადგან აჰა, იმ დღეებში და იმხანად იქნება, რომ შემოვაბრუნებ იუდეას და იერუსალიმს.

² შევკრებ ყველა ხალხს და ჩავიყვან იოშაფატის ველზე; იქ განვსჯი მათ ჩემი ერის გამო, ჩემი სამკვიდრო ისრაელის გამო, რომ გაფანტეს იგი წარმართთა შორის და დაინაწილეს ჩემი ქვეყანა.

³ წილი ყარეს ჩემს ერზე, ყმაწვილი მეძავზე გაცვალეს, ყმაწვილქალი ღვინოზე გაყიდეს და სვამდნენ.

⁴ რა გინდათ ჩემგან, ცორო და ციდონო, და ფილისტიმის მხარეებო? სამაგიერო ხომ არ გინდათ მომიზღათ? თუ ამას მიპირებთ, ადვილად და მალევე მოვაქცევ თქვენს თავზე თქვენსავე შურისგებას.

⁵ იმის გამო, რომ ჩემი ვერცხლი და ოქრო გაქვთ წაღებული, და თქვენს ტაძრებში გაქვთ შეზიდული ჩემი რჩეული განძეული.

⁶ ბერძნებს მიჰყიდეთ იუდეისა და იერუსალიმის შვილები, რომ მოგეშორებინათ ისინი თავიანთი საზღვრებიდან.

⁷ აჰა, აღვძრავ მათ იმ ადგილიდან, სადაც გაყიდეთ, და თქვენს თავზე მოვაქცევ თქვენსავე შურისგებას.

⁸ მივყიდი თქვენს ძეთა და ასულთ იუდაელთ და ისინი მიჰყიდიან მათ საბაელთ, შორეულ ხალხს, როგორც ნათქვამი აქვს უფალს.

⁹ გამოაცხადეთ ეს ამბავი ხალხებში, განემზადეთ ომისათვის, აღძარით გმირები, რომ ფეხზე დადგეს ყველა მეომარი.

¹⁰ სახნისებისაგან მახვილები გამოჭედეთ, თოხებისაგან – შუბები! უძლურმა თქვას: ძლიერი ვარო!

¹¹ იჩქარეთ, დაიძარით, ხალხებო, ყოველი მხრიდან და შეგროვდით! იქ მიავლინე, უფალო, შენი გმირები!

¹² გაიღვიძონ ხალხებმა და მიაშურონ იოშაფატის ველს, რადგან იქ დავჯდები, რომ განვსაჯო ყველა ხალხი, ვინც კი გარშემოა.

¹³ გაამზადეთ ნამგლები, რადგან დაპურდა ყანა. წადით, ჩადით, რადგან აივსო საწნახელი, გალიცლიცდა კოდები, რადგან გამრავლდა მათი ბოროტება.

¹⁴ ურდოები აწყდებიან სასჯელის ველს, რადგან ახლოვდება უფლის დღე სასჯელის ველზე.

¹⁵ მზე და მთვარე დაბნელდება, ვარსკვლავებს წაერთმევათ ბრწყინვალება.

¹⁶ იგრგვინებს უფალი სიონიდან და ხმას გამოსცემს იერუსალიმიდან; შეირყევა ცა და მიწა, მაგრამ უფალი დაიცავს თავის ერს და დაიფარავს ისრაელის ძეთ.

¹⁷ მაშინ მიხვდებით, რომ მე ვარ უფალი, თქვენი ღმერთი, სიონზე, ჩემს წმიდა მთაზე, დავანებული; გახდება იერუსალიმი საწმიდარი და ვეღარასოდეს შევა იქ უცხოთესლი.

¹⁸ იმ დღეს გადმოჩქეფს მთებიდან შანარი და რძე გადმოიღვრება ბორცვებიდან; და წყლით გაივსება იუდეის ყოველი ხევი, წყარო გამოვა უფლის სახლიდან და აავსებს შიტიმის ხევს.

¹⁹ გაუკაცურდება ეგვიპტე და უდაბნოდ იქცევა ედომი, რადგან ჩაგრავდნენ იუდაელთ, უცოდველ სისხლს ღვრიდნენ მათ ქვეყანაში.

²⁰ უკუნისამდე დარჩება იუდეა, და თაობიდან თაობამდე – იერუსალიმი.

²¹ ავიღებ მათ სისხლს, რაც არ ამიღია; და სიონზე დაივანებს უფალი.