Hebrews 6 - ქართული ბიბლია სრული ვერსია

¹ ამიტომ წინ წავიდეთ ქრისტეს სიტყვის საწყისებიდან და ვისწრაფოთ სრულყოფისაკენ, ნუ შევჩერდებით კვლავ საძირკველის ჩაყრაზე – მკვდარ საქმეთა მონანიებაზე და ღმერთის რწმენაზე,

² ნათლობათა, ხელდასხმის, მკვდართა აღდგომისა და საუკუნო სასჯელის მოძღვრებაზე.

³ ამასაც გავაკეთებთ, თუ ღმერთი ნებას მოგვცემს.

⁴ რადგან შეუძლებელია, რომ ერთხელ უკვე განათლებულნი, რომელთაც იგემეს ზეციური ნიჭი და წმიდა სულის ზიარნი გახდნენ,

⁵ იგემეს ღმერთის სიტყვის სიკეთე და მომავალი საუკუნის ძალები, –

⁶ ხოლო შემდეგ დაეცნენ, კვლავ განახლდნენ მოსანანიებლად, რადგან ისინი კვლავ ჯვარს აცვამენ ღმერთის ძეს და განაქიქებენ მას.

⁷ რადგან მიწა, რომელიც იწოვს მასზე მრავალგზის მოსულ წვიმას და აღმოაცენებს მცენარეს, სასარგებლოს მათთვის, ვისთვისაც ის მუშავდება, ღმერთისგან იღებს კურთხევას.

⁸ მაგრამ თუ ის იძლევა ეკალსა და კუროსთავს, მაშინ ის უვარგისია და ლამის დასაწყევლი. მისი ბოლო გადაწვაა.

⁹ მაგრამ, საყვარელნო, თუმცა ასე ვლაპარაკობთ, გვჯერა, რომ უკეთესის ღირსნი ხართ და ხსნას ხართ მიწევნულნი.

¹⁰ რადგან ღმერთი არაა უსამართლო, რომ დაივიწყოს თქვენი საქმე და სიყვარული, რომელიც გამოიჩინეთ მისი სახელისათვის, წმიდებს რომ ემსახურებოდით და კვლავაც ემსახურებით.

¹¹ მაგრამ გვსურს, რომ ყოველი თქვენგანი ბოლომდე იჩენდეს იმავე სიბეჯითეს,

¹² რათა არ გაზარმაცდეთ, არამედ მიბაძოთ მათ, ვინც რწმენით და სულგრძელებით იმკვიდრებს აღთქმებს.

¹³ რადგან, როცა ღმერთი აღუთქვამდა აბრაამს, რაკი არ შეეძლო, ვინმე თავისზე დიდი დაეფიცა, საკუთარი თავი დაიფიცა

¹⁴ და თქვა: „ჭეშმარიტად, გაკურთხებ შენ და გავამრავლებ შენს მოდგმას.“

¹⁵ და ამგვარად, სულგრძელი მოთმინებით მიიღო აბრაამმა აღთქმული.

¹⁶ რადგან ადამიანები თავისზე მაღალს იფიცებენ, და ფიცია მათი ყოველგვარი დავის დასასრულის დამამტკიცებელი.

¹⁷ ასე, როცა ღმერთს სურდა უფრო ცხადად ეჩვენებინა აღთქმის მემკვიდრეთათვის თავისი ნების უცვალებლობა, ფიცი მოიშველია,

¹⁸ რათა ორი უცვალებელი საქმის მეშვეობით, რაშიც შეუძლებელია ღმერთმა იცრუოს, გვქონდეს ჩვენ, – რომელნიც ვისწრაფეთ, რათა ჩავჭიდებოდით ჩვენს წინ მდებარე იმედს, – მტკიცე ნუგეში,

¹⁹ რომელიც ჩვენი სულისათვის ღუზასავით საიმედოა და მტკიცე და აღწევს ფარდის მიღმა,

²⁰ სადაც ჩვენთვის წინამორბედად შევიდა იესო და გახდა მღვდელმთავარი მელქისედეკის წესით უკუნისამდე.