Yaaꞌoo 21 - Kafa Linguistics Project

Andire Showoonaa Andire Shimaayoona

¹ Andire showoonaa andire shimaayoonon beeggeho. Aafi showoonaa aafi shimaayoona beshetone; baharoo ebiyee bekk aalloone.

² Yaafe katemee, andire Yerusaalemi, kenooch hamma macecikkiti tahoon tahaa qannaa tiyeti woꞌeen shaahaꞌa shimaajj beeti Yeer waanee bi kindaa beetaa beeggeho.

³ Aree hillooch ooge qaaro qeenoochee kechiꞌi, “Ebiyoche, Yeerichi qeyi xaaꞌoo asheenaꞌo daggooch tunetone; boonoshina tookki beeyemmone; boonoshiyoo bi asheenaꞌo tunemminaꞌone. Yeeriyoo bi qelloona boonoshina tookki tuneree boonoshi Nuggishoo tunemmone.

⁴ Biyoo acimo bullin boonoshi aafoochee hidemmone; aafi mooyinaꞌo boonoshi beshetoyich, ebiyee bekk qitoo aalloone; muusheno tuneba eefo tuneba biiyo tuneba aalloone” iꞌi bi getaa waayeho.

⁵ Taatee qeenooch koteti Yeeri “Ebiyoche, bulli mooyon andiriyemmo taane” iye. Daakkiꞌinoo taach “Ebi qaaro gibeneetonaa iberoona bi tunetoyich kooribe” iye.

⁶ Wotta taach ishichiye: “Illa mooyo bulli ceennitone. Alfoonaa Oomeegoona, Shiichoonaa Tacona taane; shachewetoyich kashee aachi xuuphoochee baad cikki immemmo taane.

⁷ Gondoochi giidoon kochii wochito ebin woraashemmone; biich Nuggishoon tunemmo taane; biyoo ta bushoon tunemmone.

⁸ Tunebaani shateenaꞌo, Kiristoosi toommooch mulloon tooꞌiyaaneenaꞌo, gonde mooyon shuunoona eeꞌetinaꞌo, ashoon wuxitinaꞌo, shunimaayeenaꞌo, iicechinaꞌo (qaaxechinaꞌo), shahalloyich goyinnee beetinaꞌo, kooteenaꞌo bulliyoo duppeyemmi xaaꞌoo qaaqqoonaa waageroona micciibeeti baharoochiye; ebiyoo guttinnee qitoone” iye.

Andire Yerusaalemi

⁹ Aree hillooch ciireexi shabaatte naxo ceenniti shabaatte xoofeenaꞌon yechiti shabaatte maraakeenaꞌoochee ikkoo waaꞌi taan “Hach ta waan wobe! Bagoochi mechee tunemmi woꞌeen neech bekkiibona” iꞌi gettiye.

^10-11 Yeerichi Ayaanee giidoo ta toommooch tunetaa, are maraakoo oogeti genje guudi toommooch taan kichiye; Yeerichi oogee yiiroo beeti yaafe katemee Yerusaalemi shimaajj beeti Yeer waanee bi kindaa beetaa taach bekkiihe. Bi aaxxoo yasphiido getteebeeti ooge aaxxe xaqqoommi shaahaachaa, bi daggoona beshii bekkiibeeti burciqoommine.

¹² Bi guudoona uxereeti uxeroo oogeti genjoone; aaraa gutte kellechone; aaraa gutte kelloon quyeebeeti aaraa gutte maraakeenaꞌo neexetinaꞌone; ebi aaraa gutte kellooch aaraa gutte Israꞌeelee yoodeenaꞌochi shigo kooreetone.

¹³ Aabi-keyo waan keejje kello, dambi-waan keejje kello, deshi-waan keejje kello, aabi-gimo waanoo keejje kello beetone.

¹⁴ Are katemeechi uxeroo shuuneeto aaraa gutte xaqqeenaꞌo toommoochiye; ebi aaraa gutte xaqqeenaꞌo toommooch Bagoochi aaraa gutte mishiraachechinaꞌochi shigo kooreetone.

¹⁵ Taach gettiti maraakoo hini are katemeen, bi uxeroonaa bi kelloonon qellayiya aachee gumboon yechitone.

¹⁶ Katemeechi awudde guudoona beeti awudde duuheenaꞌo tateenaꞌone; katemeechi gidoonoo bi kishooch beeti aachee gumboona qellayiye; gutte humaa awudde balle kiilo meetiro tunehan; bi maaco, bi gidoonaa neexoona tatoone.

¹⁷ Uxeree neexoon qellayiye; ashi qellayoona maraakoo qellayiti qellayee gumboona balli aabbaa awudde hiroo tunehe.

¹⁸ Katemeechi uxeroo uxereeto yasphiido getteebeeti aaxxe xaqqoonaniye; katemeyoo burciqoommi xalle aachoona shuuneetine.

¹⁹ Katemee uxeree dechiich beeti xaqqeenaꞌochi achooch baribare malletechi xaqqeenaꞌo beetinaꞌone. Uxeree dechiich beeti ikkinnee xaqqo yasphiido, guttinnoo sapiiro, keejjinnoo ageetoo, awuddinnoo maarigido,

²⁰ uuchinnoo sardonikiso, shirittinnoo saridiyoono, shabaattinnoo kirisiloobo, shimittinnoo beruullo, yiixiyinnoo topphaziyoono, aashirinnoo kiripaaso, aaraa ikkinnoo yaakinto, aaraa guttinnoo amexooso, eboshine.

²¹ Katemee aaraa gutte kelleenaꞌo aaraa gutte inqeenaꞌone; ikke kello ikkikke inqoona shuuneetone. Katemee daggeexi gommo bi daggoona beshii bekkiibeeti burciqoommi xalle aachoona shuuneetone.

²² Beshe Hakkechi Nuggishoo Doono Yeerinaa Bagoona hini are katemeechi yaafee kexo boonoshi tunetoyich, arooch yaafee kexon beegaano taane.

²³ Katemeechoo Yeerichi oogee yiiroo aaxxee beetoyich, bi ceechoo Bago bi tunetoyich, aabee aaxxo woyee agenee aaxxo qaawiyaachemmone.

²⁴ Aageteenaꞌo bi bekkoona shaꞌemminaꞌone; showee toommeexi taateenaꞌo boonoshi oogoon bi waan deebemminaꞌone.

²⁵ Aroochoo xumo aalloone; ebich katemee kelleenaꞌo ciroona hicheyaachemminaꞌone.

²⁶ Aageteenaꞌoo boonoshi oogoonaa oogee yiiroonon bi waan giijjemminaꞌone.

²⁷ Bagoochi kashee macaafooch boonoshi shigo kooreetinaꞌoyee beshetaa, amee eeꞌe mooyo tuneba tiyaariibeeti mooyon shuuneebeeto woyee kootoon koottiibeeti asho hini are katemeech ciroona giyaachemmone.