Yaaꞌoo 19 - Kafa Linguistics Project

¹ Aroyee gubb dofee ashi qaaroommi ooge qaaro shimaayoochaa ishichii bi beetaa waayeho: “Haleluya! Wodiyoo, oogee yiiroonaa giidoona no Nuggishoochone.

² Bi nalloo iberoonaa cadiqoonane; bi shunee mamona showoon eeꞌiiti, aricheti yahechi ure toommooch nallitone; bi maddechinaꞌochi damoyich bi toommooch nichoon kichitone” iye.

³ Wochinnoonoo cookiibee, “Haleluya! Cufoo bi waanee bulli yemeenoon keyi beeyemmone” iye.

⁴ Hiyaa awudde geeneenaꞌonaa kashechi awudde halleenaꞌona boonoshi baroona guufeꞌi taatee qeenooch koteti Yeerich “Ameena; Haleluya!” iibee goyinneheete.

Bagoochi Gaaro

⁵ Aree hillooch taatee qeenoochee qaaro kechiꞌi, “Bi guuninaꞌo ittoshi bulli, biich shattiibeeti gishiisheenaꞌonaa ogoogeenaꞌonote! No Nuggishoon galletebote!” iye.

⁶ Wochinnoon dofee asheenaꞌochi qaaroommi qaaro, ogooge aacinaꞌochi qaaroommi qaaro, giidechi xeeyee qaaroommi qaaroo ishichiꞌi bi getaa waayeho. “Haleluya! Beshe Hakkechi no Nuggishoo Doono Yeeri taatetone.

⁷ Bagoochi gaaro shaggitoyich, bi woꞌeyoo bi qelloon bi qanniitoyich emiribone; emiroona wucwucone; oogee yiiroonoo Yeerich imbone.

⁸ Bagoochi woꞌechoo muttee tuppoochee cicii yokketaa shippeti, wacciibeeti xalle tahoon bi tahemmoyich ichehe” iye. Ebi are muttee tuppoochee cicii yokketaa shippeti taho yaafeenaꞌo shuuneti cadiqee shuunee shaahiyoone.

⁹ Are maraakoo taach ishichiye: “ ‘Bagoochi gaaree gifirooch ceekketinaꞌo diireetinaꞌone’ getiree kooribe” iye. Daakkiꞌinoo taach “Ebi Yeerichi ibere qaaroone” iye.

¹⁰ Hini are maraakoyich goyinneya bi baatooch dihiyo; tunebaani aroo “Neen ariibe! Eechiyaahine! Neechoommon, Yesuusi miixeti iberoon yechiti ne maneenaꞌochoommonoo Yeerichi guuno taane; Yeerich baachiye ne goyinnemmo. Yesuusi miixeti iberoo Yeerichi wochoon boonoshi gettemmoyich asheenaꞌon shuurikkii beeti ayaanoone” iye.

Nacce Hareshoon Yebbeto

¹¹ Shimaayoo qecheetaa beeggeho; ebiyoche nacce hareshoo bekkehe; aroon yebbeto Gibeneetonaa Iberoona getteehe; biyoo tachiꞌi nallii, bi shixechinaꞌonoo koyee beetone.

¹² Bi aafo qaaqqee aaxxoommone; bi shimboochoo meeti gubbichoon uketone; bi ikkeeto baachalli koniyoona ariyaani kooreeti shigo biich beetone.

¹³ Damoona muureeti tahoon tahetone; bi shigoo Yeerichi Qaaro getteehe.

¹⁴ Shimaayooch beeti dofee ginee naayinaꞌo muttee tuppoochee cicii yokketaa shippeti nacce xalle tahoon tahee, nacce haresheenaꞌon yebbeꞌi biin dabbiyeete.

¹⁵ Aageteenaꞌon koyi bi wochemmi aci goraado bi kookkoochee kechiye; biyoo xuuree gumboona boonoshin hajjemmone; woyinee aafoon oppoochaa asho kotoommon, ebiyoommon Beshe Hakkechi Yeerichi kaaree shiixxee naxeechi oppoochaa boonoshin kotemmone.

¹⁶ Bi tahoonaa bi doshoonooch, Taateenaꞌochi Taatoo, Dooninaꞌochi Doono, immi shigo kooreetone.

^17-18 Ikke maraakoo aabee toommooch neexeꞌi bi beetaa beeggeho; oogeti qaaroona cookiꞌi shimaayoona yoobbiibeeti gaceenaꞌoyich “Wobote; taateenaꞌonaa hume ginee iraasheenaꞌonochi meenon, giidechinaꞌochi meenon, haresheenaꞌonaa boonoshin yebbetinaꞌonochi meenon, guuchi yareenaꞌonaa xalle yareenaꞌonochi meenon, gishiisheenaꞌonaa ogoogeenaꞌonochi meenon, asheenaꞌo bullichi meenon ittoshi maayemmoyich, Yeerichi gifiree maayo qannitooch waaree kiceebote” iye.

¹⁹ Hareshoon yebbetonaa bi ginee naayinaꞌonon kocha cooxo, showee toommeexi taateenaꞌonaa boonoshi ginee naayinaꞌona kiceetinaꞌon beeggeho.

²⁰ Cooxo yechehe; cooxo aafoochaa gaakkechi shuunoon bekkiibee, cooxochi malletoo geddetinaꞌon, biin shaahiitaa shuuneetoyich goyinnetinaꞌonoo muricciiti koote keemecho biinna tookkii yechehe. Gutteenaꞌoo kashoona beebee waageroo micciibeeti qaaqqee baharooch duppeheete.

²¹ Echetinaꞌoo hareshoon yebbetochi kookkoochee kechiibeeti aci goraadoona kochee qitiyeete; gaceenaꞌo bulliyoo boonoshi meenon maa michiyeete.