Yaaꞌoo 17 - Kafa Linguistics Project

Cooxon Yebbeti Ure

¹ Shabaatte xoofeenaꞌon yechiti shabaatte maraakeenaꞌo daggoochee ikkoo waaꞌi taach “Wobe; meeti aacinaꞌo toommooch koteti aricheti yahechi ure toommooch Yeeri aabichiree bi nallemmo gaata neech bekkiibona.

² Showeexi taateenaꞌo biinna tookkii shuno maaheete; asho mashiibeeti uyoona bi mashoommon, showee toommooch beeti asheenaꞌo biinna tookkii shunee mamona masheheete” iꞌi gettiye.

³ Yeerichi Ayaanee giidoo ta toommooch tunetaa, are maraakoo barahooch taan daammiye; Yeerin naaggiibeeti shigoona ceenniti ceelle cooxon yebbaꞌa beeti ikke ureen beeggeho; ebi cooxo shabaatte qellechonaa aashire qarechonane.

⁴ Damere tahoonaa maddoonon tahee, aachoonaa aaxxe xaqqeenaꞌona, inqeenaꞌonoo shashitine; bi kishoonoo ciigiiti mooyonaa shunee bi mami eeꞌoona ceenniti aachee xoofoon yechetine.

⁵ Bi baroochoo aacheeti mooyon yechiti shigo: Ooge Katemee Baablooni, Yahechinaꞌonaa Showee Toommeexi Ciigeetinaꞌonochi Indee, getaa kooreetone.

⁶ Ureyoo yaafeenaꞌochi damoona, Yesuusichon miixeti asheenaꞌochi damoona mashetin beeggeho. Biin ta beeggehooba, oogeton worganeho.

⁷ Maraakoo taach ishichiye: “Ebi shaahoon ne worganeto amoyichiye? Ebi ureechon aacheeti mooyon, bi yebbeti shabaatte qellechonaa aashire qarechona tuneti cooxochi aacheeti mooyonoo ta neech gettemmo taane.

⁸ Ne beeggeti cooxo ebiyee aaf beetone; and aalloone; oppee hoonoochee kechaniye bi ii beeto; aalleshoo gettemmone. Showoo halleetoochee tiijjiꞌi boonoshi shigo kashee macaafooch kooreyaani, hini showee toommooch beeti asheenaꞌo, ebi cooxo ebiyee aaf beeto, and aallo, tunebaani gubb woyemmo bi tunoon boonoshi beegiyooba worganemminaꞌone.

⁹ “Ebi mooyon ariyoyich oogeti shalligoo qaawiihe; shabaatte qello ure koteti shabaatte geppeenaꞌone; wotta shabaatte taateenaꞌone.

¹⁰ Uucheenaꞌo dihitinaꞌone; ikkoo and taateꞌi beetone; ciireexo batt waataan beetone; bi waataanoo bi taatemmo giisheche aaboon baachiye.

¹¹ Ebiyee aaf beebee echeti, and aalli cooxo bi qelloona wotta shimittinnee taatoone; shabaatteexi ikkoone; ebi aroo aallemmone.

¹² “Ne beeggeti aashire qaro batt taateyaani aashire taateenaꞌochi shaahiyoone; tunebaani cooxona tookki ikke saatoon boonoshi taatemmoyich taatittino boonoshich ichemmone.

¹³ Eboshiyoo ikke kashoon tuneree boonoshi hakkoonaa boonoshi taatittinoonon cooxoyich guudii immemminaꞌone.

¹⁴ Eboshiyoo Bagoona koyemminaꞌone; tunebaani Bago boonoshin koyi wochemmone; ebiyoo Bago dooninaꞌochi Doono, taateenaꞌochi Taatoo bi tunetoyichiye; biinna tookkii beeti ceekkeetinaꞌo, kaaccitinaꞌonaa gibeneetinaꞌona wotta koyi wochemminaꞌone” iye.

¹⁵ Aree hillooch maraakoo taach ishichiye: “Yahechi ure boonoshi toommooch kotaꞌa bi beetaa ne beeggeti aacinaꞌo, ashi yoodi yoodeenaꞌonaa dofee asheenaꞌona, aageteenaꞌonaa baribare noonoona yibbaateebeeti asheenaꞌonochi shaahiyeenaꞌone.

¹⁶ Ne beeggeti aashire qaroonaa cooxona yahechi ureen shixxemminaꞌone; shokke kishoo biin tunii, shokkaachoon biin echiyemminaꞌone; bi meenonoo maayemminaꞌone; qaaqqoonoo biin michemminaꞌone.

¹⁷ Yeeri bi gaboon boonoshi tuniyemmoyich, bi gettiti mooyo ceennimmi wottoon ikke kashoon tuneree boonoshi taatittinoon cooxoyich boonoshi guudii immemmoyich, bi gabiti gaboon boonoshi mullooch kotiitone.

¹⁸ Ne beeggeti ure showee toommooch beeti taateenaꞌo bulli toommooch taataabeeti ooge katemeechi shaahiyeene” iye.