Luqaasi 4 - Kafa Linguistics Project

Yesuusin Gondoon Shuuniiya Daabiloosi Qiicco

¹ Arooba Yesuusi Yaafe Ayaanoona ceenniꞌi Yoordaanoosi aacoochee wottehe; Yaafe Ayaanoo barahooch biin daammiye.

² Aroochaa aabbe qemon daabiloosi biin gondoon shuuniiya qiiccee beehe. Are aabo bulliich amoonolla maataanoone. Ebiyee gubb shaacehe.

³ Arooba Yesuusin daabiloosi “Yeerichi Bushoo ne gaata, eke hini xaqqoon ‘Kosho tunebe’ getiree tuniibe” iye.

⁴ Yesuusiyoo wochiꞌi, “ ‘Asho kosho ikkeetona kashoona beetaachemmone’ getaa Yaafe Macaafooch kooreetone” iye.

⁵ Aroochee daabiloosi Yesuusin ikke xoobooch kichiꞌi alemooch beeti taatee showoo bullin qillifee yexx bedaan beetaa bekkiihe.

⁶ Daabiloosiyoo ishichiye: “Eboshi bulli toommooch ukkirittinoonaa oogoona taach ichetone; konichona daaggaꞌa imoyich ta hakkitoyich, neech immemmo taane.

⁷ Ebich taach ne goyinnegaata, ebi bulli neech tunemmone” iye.

⁸ Arooba Yesuusi wochiꞌi, “ ‘Ne Nuggishoo Doono Yeerich goyinnebe; biich baach maddebe’ gettaa Yaafe Macaafooch kooreetone” iye.

^9-11 Ebiyee gubb, daabiloosi Yesuusin Yerusaalem daammii, Yeerichi yaafee kechi guummooch kichii neechiꞌi ishichiye: “ ‘Yeeri neen boonoshi quyemmoyich bi maraakeenaꞌon neecha getiree deejjemmone; ne baatoon xaqqo bi yexaachemmoyich boonoshi kishoona neen tiijjemminaꞌone’ getaa Yaafe Macaafooch kooreetone; ebich Yeerichi Bushoo ne gaata, eke hiniichee dugilla awureeree kindibe” iye.

¹² Yesuusiyoo wochiꞌi, “ ‘ “Eke Nuggishoo Doono Yeeri taan bi wodiyoon beegona” getiree gondoon shuunaaye’ getaa kooreetone” iye.

¹³ Daabiloosiyoo Yesuusin bulli mooyona gondoon shuuniiya, baribare mooyon giddiibee bi qiiccoon bi ciichitoyee gubb, andich Yesuusin qajjiꞌi hammiye.

Galiilee Showooch Shuunooch Yesuusi Gimo

¹⁴ Yesuusiyoo Yaafe Ayaano immiti giidoona Galiilee showooch wottee hammiye. Bi shigo are showoo bulliich waayeehe.

¹⁵ Biyoo Ayihudeenaꞌo kiceebeeti kexinaꞌoochaa dojjii beehe; asheenaꞌo bulliyoo biin naadii beeheete.

Yesuusin Naazireetechi Asheenaꞌo Qayo

¹⁶ Yesuusiyoo bi dicciti Naazireet waaꞌi, bi doyitoommon shambetooba boonoshi kiceebeeti kexooch giyiye; shemmoyich bi tiyimmona,

^17-19 keemechi Isiyaasichi macaafoon biich immiyeete. Biyoo macaafoon galliꞌi, “Iriteetinaꞌoyich mishiraachee qaaroon ta gettemmoyich Yeeri taan bi huuttitoyich, Doonochi Ayaano ta toommoochiye. Kecaa cuchetinaꞌonoo ‘Biicheyemmo ittoshine’, aaf doogeenaꞌonoo ‘Wochinnoon ciinnemmo ittoshine’ getiree mishiraachoon ta gettemmoyich, xukketinaꞌon ta wodiyemmoyich, ‘Doono Yeeri bi deꞌoon bi bekkiyemmi nato, ebiyoche’ getiree mishiraachoon ta gettemmoyich taan wochetone” getaa kooreeton shemmehe.

²⁰ Bi shemmetoyee gubb macaafoon qoddiꞌi kellechoyich immiichii kotehe. Ayihudeenaꞌo kiceebeeti kexooch beetinaꞌo bulli biin manjiiꞌi boonoshi ciinnii beetaa,

²¹ biyoo “Hanaach hini Yaafe Macaafee qaaro ittoshi waayee beetaa, ceennitone” iye.

²² Asheenaꞌo bulli “Bi gettito iberoone” ii beeheete. Bi noonoochee kechiibeeti yibbaatee shaawon worganeꞌi, “Hini uro Yooseefichi bushoo toone?” iyeete.

²³ Yesuusiyoo “Ittoshi ‘Aakumoocho, eke ne qelloon wodiibe! Qifirinaahi katemooch ne shuuneto bullin waayeto noone; ebiyoommon wotta hini ne hajjee showooch shuunebe’ getiree taan iberoon ebichi shaahiyoona gettemmo ittoshine” iye.

²⁴ Yesuusi daakkiꞌi ishichiye, “Iberoon ittoshich gettoye: Amoommo tunetaa keemechochi yibbaatoon bi hajjee showee asheenaꞌo waayeyaacheete.

²⁵ Tunebaani iberoon ittoshich gettoye: Eliyaasichi yemeenooba keejje natonaa shiritte agenoonon Yeeri shimaayoon hicaa, amiyo dihoo qajjitoyich, showoo bulliich kupphe shaacoo giyiyooba, Israꞌeelee showooch meeti xuume maacheenaꞌo beeheete.

²⁶ Bi tunetaa Sidoonee showooch beeti Tsarefaati katemeexi ikke xuumee Eliyaasin bi deggemmoyich bi waanalli, Israꞌeelee xuume maacheenaꞌo daggoochee koni waanona Yeeri biin wocheyaanoone.

²⁷ Wotta keemechi Elisayichi yemeenooba Israꞌeelee showooch meeti qeddee shaddee biiyechinaꞌo beetinaꞌone; tunebaani Sooriyee showeexi Naꞌimaaniyee damba boonoshi daggoochee ikkolla wodito aalloone” iye.

²⁸ Arooba Ayihudeenaꞌo kiceebeeti kexooch beetinaꞌo bulli ishin waayeꞌi oogichii ippeheete.

²⁹ Tiyiꞌi boonoshi katemee daggoochee maach biin xuqqiibee kichiichii, “Qaaꞌooch dufone” iꞌi boonoshi katemoo shuuneeti xaaꞌooch beeti geppee cillooch daammiyeete.

³⁰ Tunebaani bi boonoshi daggoona kuxxiꞌi beshee hammiye.

Yinnoon Ashi Toommoochee Yesuusi Yooho

³¹ Yesuusi are Naazireetee kindiꞌi Galiilee showooch beeti Qifirinaahi katemooch hammiye. Aroochaa shambetooba asheenaꞌoyich dojjii beehe.

³² Sheeroon immiibeeti taatoochoommon bi yibbaatetoyich, waayetinaꞌo bi dojjiti doyoona worganeheete.

³³ Arooba Ayihudeenaꞌo kiceebeeti kexooch yinno bi toommooch beeti uro beehe. Bi qaaroon oogichii cookiꞌi,

³⁴ “Woowo! Naazireetechi Yesuuso, no mooyooch neen amo geddiye? Noon goochiiya waanne? Koni ne gaata ariyaabeeto taane; Yeerichi Yaafoo neene” iye.

³⁵ Yesuusiyoo “Ne noonoon yeshe! Hini uro toommoochee tibe” iꞌi noggehe. Yinnoo boonoshi daggooch dichiichii, uroon amoonolla hallaanoon bi toommoochee tiyiye.

³⁶ Ebich asheenaꞌo bulli oogichii worganeꞌi boonoshinaa boonoshina “Ebi amoone? Ukkirittinoona, hakkoonoo yinneenaꞌon ‘Tibote’ iye; bi getaa, boonoshiyoo tiyiyeete” iꞌi yibbaateheete.

³⁷ Bi shigoo are guudoona beeti showoo bulliich waayeehe.

Biiyechi Meeti Asheenaꞌon Yesuusi Wodiyoo

³⁸ Yesuusi Ayihudeenaꞌo kiceebeeti kexoochee kechii hammiꞌi Simooni kexooch giyiye. Simoonichi amaatee kupphe achee gaamee biiyoona bi biiyetoyich, Yesuusin “Hini ureen wodiibe” iꞌi qolleheete.

³⁹ Biyoo ureechi gaꞌooch neexeꞌi, hini achee gaamoon qaye bi getaa, bekkech qajjiye. Areegaata ure tiyaa maayoon boonoshich giddiihan.

⁴⁰ Womikka aabe giyemmona, asheenaꞌo baribare biiyoona biiyetinaꞌo bullin Yesuus waan deebiyeete. Biyoo boonoshi bullin bi kishoona yechiꞌi wodiihe.

⁴¹ Yinneenaꞌoo wotta “Ne Yeerichi Bushoo neene” iꞌi cookiibee asheenaꞌo toommoochee tiyiyeete. Yesuusiyoo hini are yinneenaꞌon noggehe; Kiristoosi bi tunoon arii beetinaꞌo boonoshi tunetoyich, amoonolla boonoshi yibbaatemmoyich daaggaanoone.

Meeti Katemoochaa Mishiraachee Qaaroon Yesuusi Geto

⁴² Showoo harimmona, Yesuusi tiyiꞌi ikke qere xaaꞌooch hammiye. Dofee asheenaꞌoo biin qaawiibee bi waan shaggiyeete. “Noon dufiree hammaaye” iꞌi bajja qaawiyeete.

⁴³ Tunebaani biyoo “Bare katemeenaꞌoochoo wotta Yeerichi taatittinee mishiraachee qaaroon geto taach qaawii beetone; ebichiye Yeeri taan bi wocheto” iye.

⁴⁴ Yihudee showooch beeti, Ayihudeenaꞌo kiceebeeti kexooch guuddiꞌi Yeerichi qaaroon gettii beehe.