Luqaasi 10 - Kafa Linguistics Project

Shabaa Gutte Asheenaꞌon Kaacciꞌi Yesuusi Wocho

¹ Ebiyee gubb, Doono Yesuusi aaraa gutte bi dabbeenaꞌoyee bare shabaa gutteenaꞌon ukkiriihe; gutti guttoo tuniiꞌi, bi hammemmi katemoonaa gafoo bullinooch biyee shiichiree boonoshi shaggemmoyich daachiihe.

² Hamma boonoshi tiyimmona, boonoshich ishichiye: “Qecceyemmi maayo woddoone; tunebaani qeccii kicechinaꞌo giishecheenaꞌone. Illa maayi Doono maayo beeti budooch qeciree kicemminaꞌon bi daachiyemmoyich corootibote.

³ Illa tibote; bagoochoommon okereenaꞌo daggooch ittoshin wochemmo taane.

⁴ Kolloon woyee kojjoon woyee caammoon yechaahote; gommon hamibee koninolla diggiyoyich neexeyaahote.

⁵ “Koni kexoocholla ittoshi giyigaata, shiichiree, ‘Diggoo hini kexooch tunebe’ getote.

⁶ Yeerichi diggoyich bedditi asho arooch bi beegaata, ittoshi diiroo bi toommooch tunemmone; bi aallegaata, are diiroo ittoshi waan wottemmone.

⁷ Shuunecho biin shuuniito waanee maayi beddiye; ebich are kexoochaa boonoshi giddiimmon maa uyibee kotebote. Ittoshi qeyiibeeti kexon qayiree bare kexooch hammaahote.

⁸ “Ittoshi giyimmi katemoo bulliich beeti asheenaꞌo ittoshin boonoshi iibbiigaata, boonoshi giddiimmon mamote;

⁹ are katemooch beeti biiyechinaꞌon wodiibote; arooch beeti asheenaꞌoyichoo ‘Yeerichi taatittine ittoshi kellooch shaggetine’ getote.

¹⁰ Tunebaani ittoshi giyimmi katemoo bulliich beeti asheenaꞌo ittoshin iibbiyoo boonoshi qayigaata, gommooch keyiree,

¹¹ ‘Ittoshi toommooch miixoo bi tunemmoyich, no baatooch beeti ittoshi katemeexi quttoonolla tebbemmo noone; tunebaani ebin ariibote: Yeerichi taatittine ittoshi kellooch shaggetine’ getote.

¹² Ittoshich gettoye: Nallaa gallooba are katemeexi asheenaꞌoyee Sodoomi katemeexi asheenaꞌoyich gaawiye” iye.

Keejje Katemee Asheenaꞌo Ittibateyoo

¹³ “Koraziine, neech woowo! Beetisayide, neech woowo! Ittoshich bekketi gaakkechi shuunoo Xiroosinaa Sidooninoyich bi bekketo gaata, wonna dookoon tahe tullooch koteree, axaaxee gommoochee Yeer waan wotteshinaꞌone.

¹⁴ Tunebaani nallaa gallooba ittoshiyee Xiroosi asheenaꞌonaa Sidooni asheenaꞌonoyich gaawemmone.

¹⁵ Hini Qifirinaahe! Shimaayooch beddaahaa ciixenne? Tunebaani kindiiree Siꞌoolooch duppeyemmi neene” iye.

¹⁶ Ebiyee gubb, Yesuusi bi dabbeenaꞌon “Ittoshichon waayeebeeto, taachon waayee beetone; ittoshin qajjiibeeto, taan qajjii beetone; taanoo qajjiibeeto, taan wocheti Yeerin qajjii beetone” iye.

Shabaa Gutte Asheenaꞌo Boonoshi Wocheetoochee Wotto

¹⁷ Shabaa gutteenaꞌo boonoshi wocheetoochee oogichii emiriibee wotteꞌi, Yesuusin “Doonocho, yinneenaꞌolla ne shigoon no ceeggemmona nooch yittiꞌi hajjee beetinaꞌone” iyeete.

¹⁸ Yesuusiyoo ishichiye: “Sheexaanoo xeeyoochoommon shimaayoochee kindiꞌi bi dihaa beeggoye.

¹⁹ Dingeroonaa barahee machoonon baatoona ittoshi neexxemmoyich, ittoshin shixxiibeeti Sheexaanee giidoo bullin yittiiree ittoshi hajjemmoyich, ukkirittinoon ittoshich immeto taane. Ittoshich etto tunemmi mooyo amolla aalloone.

²⁰ Tunebaani ittoshi shigo shimaayeexi macaafooch bi kooreetoyich emiribotalli, yinneenaꞌo ittoshich boonoshi yittiꞌi hajjee beetoyich emiriyaahote” iye.

Yesuusi Emiroo

²¹ Arooba Yesuusi Yaafe Ayaanoona oogichii emiriꞌi “Showoonaa shimaayoonochi Doono tuneti ta Nihoocho, ebin ariyechinaꞌonaa shalligechinaꞌona ariyaachemmoyich ne aachitoyich, gaggereenaꞌoomminaꞌoyichoo ne bekkiitoyich neen galletehoye. Iberoone, ta Nihoocho, ebin tuniyoyich gaaweti ne daaggoo tunetone” iꞌi Yeerin galletehe.

²² Aree hillooch “Ta Nihoo bulli mooyon taach immitone; Nihoo Yeeriyee damba Yeerichi Bushoo taan koni ta gaata ariibeeto aalloone. Yeerichi Bushoo tayee beshetaa, wotta Yeerichi Bushoo ta biich bekkiiya ta daaggiti ashoyee beshetaa, Nihoo Yeeri koni bi gaata biin ariibeeto aalloone” iye.

²³ Ebichi hillooch Yesuusi bi dabbeenaꞌo waan wotteꞌi boonoshi ikkeetoyich “Ittoshi beeggii beeton, beeggii beetinaꞌo diireetinaꞌone.

²⁴ Ittoshich gettoye: Meeti keemechinaꞌonaa taateenaꞌona ittoshi beeggii beeton beegoyich qaatitinaꞌone; tunebaani beegaaneenaꞌone. Ittoshi waayee beetonoo waayoyich qaatitinaꞌone; tunebaani waayeyaaneenaꞌone” iye.

Deꞌe Shamaaree Uroochi Shaahiyoo

²⁵ Ikke areddoon, Muusichi Sheeree dojjecho Yesuusin muriciiya qaawii kotoochee tiyiꞌi, “Dojjechocho, bulli yemeenee kashoon ta danemmoyich, amoon hallibote?” iꞌi echehe.

²⁶ Yesuusiyoo “Muusichi Sheeree Macaafooch kooreeto amoone? Aroochee amooniye ne ciinnaabeeto?” iye.

²⁷ Uroo wochiꞌi, “ ‘Ne Nuggishoo Doono Yeerin ceeni ne mulloona, ceeni ne kashoona, ceeni ne giidoona, ceeni ne shalligoonoo shune; neenoommi ne manoon neenna tachiree shune’ ii beetone” iye.

²⁸ Yesuusi “Iberoon gettehine; ebin ne tuniigaata, bulli yemeenee kashoon danemmo neene” iye.

²⁹ Are uroo bi qelloon deꞌo tuniiya qaawiꞌi Yesuusin “Ta manochi konine?” iꞌi echehe.

³⁰ Yesuusiyoo wochiꞌi ishichiye: “Ikke uro Yerusaalemee Yaariki katemooch hammii bi beetaa, diqqich bokkeenaꞌo biinna daneheete. Biin boggiꞌi bi tahoon shoottiyeete; yexxiinoo iyeete; bi kasheyoo kechi beddaachaa qajjii hammiyeete.

³¹ Diqqoona ikke qeeshoo are gommona hammiibee uro dihiꞌi beeti xaaꞌooch shaggiꞌi beeggiichii gommon ikke baddaa kuxxii beshehe.

³² Wotta ikke Lewee asho are uro dihiꞌi beeti xaaꞌooch shaggiꞌi beeggiichii gommon ikke baddaa kuxxii beshehe.

³³ Ebiyoommon wotta are gommona ikke Shamaaree asho hammiibee uro dihiꞌi beetooch shaggiye; beeggiꞌinoo ariqqehe;

³⁴ bi waan giddeꞌi zayitoonaa woyinee uyoonon uroochi mayooch ukkiꞌi kaappiye; bi hajjee kuroon yebbiiꞌi gijjoo qocaa qeyeebeeti ikke iibbee kexooch daammiye; aroochaanoo shiimeebee quyeꞌi qeyiye.

³⁵ Deco haraa gutte diinaaroon kichii iibbee kechi doonoyich immiꞌi, ‘Hini uroon gaawichiree shiimebe; hini ta immeti gijjoo bedo qayigaata, ne kichito bullin ta wottehooba qoccemmo taane’ iichii hammiye.

³⁶ “Illa hini keeminaꞌoochee bokkeenaꞌo kishooch dihiti uroyich manoon tuneto neech aabi shaahii beete?” iꞌi echehe.

³⁷ Muusichi Sheeree dojjecho wochiꞌi, “Ariqqeꞌi gaachetone” iye. Yesuusiyoo “Ne wotta hamiree ebiyoommon tuniibe” iye.

Yesuusi Maarittinaa Maariyamina Waan Shaggii Boonoshin Beego

³⁸ Yesuusi bi dabbeenaꞌona tookkii hammiibee ikke gafooch shaggiye; Maaritti getteebeeti ikke ure bi kexooch biin iibbiihan.

³⁹ Biichoo Maariyami getteebeeti manee beetine. Maariyami Yesuusichi baatooch kotaachaa bi gettii beeton waayaa beehan.

⁴⁰ Tunetaa Maaritti shuunoo biich bi meettitoyich, bi mullo shacehe; Yesuus waan giddaꞌa, “Ta Doonocho, ta manee shuunoo bullin ta toommooch duppaachaa bi qayon beeggaabee, cikkii qajjenne? Eke ne getaa, waaree taan gaachebuye” iyan.

⁴¹ Doono Yesuusi wochiꞌi, “Maaritte, Maaritte! Meeti mooyona ne mulloon xuuxiihine; iriteenoo iyine.

⁴² Tunebaani qaaweeto ikke mooyo baachiye; Maariyamiyoo are gaaweti mooyon yechetine; biichoo bacheyaache” iye.