Dojjecho 9 - Kafa Linguistics Project

Asho Bulli Qitemmo Tuno

¹ Ebi bulli mooyon ta mullooch kotiyaꞌa ta yexiitoyee gubb, cadiqeenaꞌo, shalligechi asheenaꞌonaa boonoshi shuunoona Yeerichi kishooch tunoon ariiho. Gubb tunemmi mooyo shuno tuneba shixo ariibeeti asho aalloone.

² Cadiqoonaa xuꞌechonoyich, deꞌoonaa gondoonoyich, xalloonaa eeꞌoonoyich, deejjoo giddii beetonaa giddiyaanoonoyich, asho bulli toommooch shaggemmi ixoo ikkoone. Deꞌe ashich axaaxechoyee beshe gaawe ixoo aalloone; wogoon shattii beetonaa wogo giyii beetona barbariitaa ciicheyaachemmone.

³ Kashecho bullichi ciiro ikke shaahoo tuno, ebi hini showee toommooch tuneebeeti gonde mooyone. Asheenaꞌochi mullooch gondo ceennitone; boonoshi kashee yemeeno bulliich boonoshi mullooch geyo beetone; ciiroochaanoo qitemminaꞌone.

⁴ Tunebaani kashoona beeti ashich gaawe gibeno beetone; qititi daaheroyee kashoona beeti kunaanoo gaawiye.

⁵ Kashoona beetinaꞌo qitemminaꞌo boonoshi tunoon ebi ikke mooyon arii beetinaꞌone; tunebaani qititinaꞌo amoonolla ariyaaneenaꞌone; illa bare gaaco boonoshich aalloone. Ebiyee gubboo boonoshin shalligemmo koniyoona aalloone.

⁶ Boonoshi shunoo, boonoshi kaaroonaa boonoshi qanaatoona boonoshina tookkii battee echetone. Hini showee toommooch tuneebeeti mooyo bulliichee boonoshich qoodoo amolla aalloone.

⁷ Ebich and illa, ne maayoon emiroona mame; ne woyinee uyoonoo emiroona uye; ebiyoo Yeeri ne tuniyemmoyich bi qaawiti mooyone.

⁸ Bulli aaboon nacce tahoon tahebe; ne qelloocheenoo huutoon kuxxaahine!

⁹ Ne kashoonaa hini showee toommoochaa ne aajjeti aayonoyich, ne qoodoo ebi bi tunetoyich, Yeeri neech immiti hini showee toommeexi duube ne kashee yemeenooch ne shunnaabeeti ne mecheena tookki emiribe!

¹⁰ Ebi ne hamma iyaabeeti maash shuunoonaa gaboona, ariyoonaa shalligoona aallo bi tunetoyich, ne shuunoo bullin neech beeti hakkoona shuunebe!

¹¹ Hini showee toommoochee bare mooyon beeggeho; ebiyoo, woco afaafinechinaꞌoyich, koyoo ginee anaaminaꞌoyich, kosho mullechinaꞌoyich, gaanno beelleenaꞌoyich, gaawe aafoona ciicheyoo ariyechinaꞌoyich, tunee bi qayoniye. Bulli mooyon daniibeeto deconaa ixoonane.

¹² Asho bi ciiro aata gaata ariyaache. Haashoo dabbooch bi yechoommon, kafoo ballaattooch bi yechoommon, asho gabaanoon diqqoona qitoona danehe.

Shalligoo Besho Tuno

¹³ Wotta taan oogichii worganikkiti shalligee shaahiyoon hini showee toommoochee beeggeho:

¹⁴ Giisheche asho beeti ikke giisheche katemee beehan; ikke giidechi taatoo ebi katemeen kocha tiyii, ooge xaqqee gutoon gutiꞌi giichiye.

¹⁵ Ebi katemeech shalligechi ikke girechi uro beehe; biyoo ebi katemeen bi shalligoona wodiihe. Tunebaani koniyoona ebi girechon shalligito aalloone.

¹⁶ Ebi girechochi shalligoo hoxeeto, bi yibbaatoo waayeyaano bi tunetaanoona, “Giidoyee shalligoo beshiye” iyoye.

¹⁷ Mullaalleenaꞌochi iitee daggoochee waayeebeeti taatoochi cookee qaaroyee, dechiitee yibbaateebeeti, shalligechochi qaaroon waayo gaawiye.

¹⁸ Ginee qiicoyee shalligoo beshiye; axaaxechi ikke asho meeti gaawe mooyon aalliyoon hakkiye.