Dojjecho 4 - Kafa Linguistics Project

Xuꞌo, Aayonaa Shiqqittinoona

¹ Wottoo hini showee toommooch tuneebeeti xuꞌo bullin beeggeho; xukketi asheenaꞌo eeppii beeheete; tunebaani boonoshin goggiyemmo aalloone. Boonoshin xuqqii beetinaꞌo hakkechinaꞌo tunetoyich, boonoshin goggiyemmo aalloone.

² Tawoo “And kashoona beetinaꞌoyee qitii beshetinaꞌoyich gaawiye” iyo.

³ Tunebaani ebi gutteenaꞌoyee batt shiijjeyaanoyich, hini showee toommooch tuneebeeti gonde mooyonoo beegaanoyich gaawiye.

⁴ Wottoo aayonaa shuunee ariyoona asho bi giyoon qanaatoochee tiyitona bi tuniibeeto tunoon beeggeho; ebiyoo wotta duubo, yongoon yookkii dabboommone.

⁵ Bi kishoon tiqqeꞌi koteebeeti yeexeroo, shaacoona qitiye.

⁶ Aajjii yulloona daneebeeti gutte kishoyee, tooqqii kashoona daneebeeti ikke kishoo gaawiye; woddoo aayo yongoon yookkii dabboommone.

⁷ Wottoo hini showee toommoochee ta beeggeti bare duube mooyo beete;

⁸ ebiyoo bushaalli, manaalli shiqqe uroochi mooyone; ebi uro aajjiichii wotteyaanoone; biich beeti gaannoona michiꞌi tooꞌaanoone; biyoo “Ta qelloon emirikkaanoon ta aajjaabeeto konichiye?” iꞌi gabiye. Ebiyoo duubo, xuuxee beemone.

⁹ Boonoshi aayo gaawe gaacecho bi tunetoyich ikkoo baach tunoyee guttoo tuno gaawiye.

¹⁰ Gutteenaꞌoochee ikkoo dihigaata ikkoo tiijjiye; tunebaani ikkoo bi ikkeeto beechii bi dihigaata biin tiijjemmo aallo bi tunetoyich biich woowo!

¹¹ Gutteenaꞌo ikkooch boonoshi tokketegaata qeecciye. Ikkoo baach bi tokketegaata aabichi qeeccehe?

¹² Giidecho bi giidoon ikkoo toommooch bi bekkiigaata, gutteꞌi wochoon hakkiyeete. Naayeeti (yoohiyeeti) woderoo kaatee kuxeyaache.

¹³ Ciicoon waayeyaani mullaalli geene taatoyee, mullechi girechi gurimaashoo gaawiye.

¹⁴ Ebi gurimaashoo taatoo tunoyich cuyee kexoochee waato bi tunetaanoona, woyee girechon tuneꞌi ebi bi taateti showoochaa shiijjeto bi tunetaanoona, bi gaawiye.

¹⁵ Hini showee toommooch beeti, wottoo shaꞌeebeeti asheenaꞌo bulli, taatoochi xaaꞌooch kereyemmi gurimaashoona tookkii boonoshi beetaa, beeggeho.

¹⁶ Taateꞌi bi qeejjii beehooba biich hajjee beetinaꞌo mattiqutteenaꞌone; tunebaani biyee digenichinaꞌo biinna emiraaneenaꞌone. Ebiyoo duubo, yongoon yookkii dabboommone.