Dojjecho 2 - Kafa Linguistics Project

Qellee Shuno Gaacaallo Tuno

¹ Tawoo ta mulloona, “Ta qelloon emirikkoona emiroo amo gaata beegona” iyo; tunebaani ebiyoo duuboone.

² Miico geyo bi tunoon beeggeho; emiroo bi gaaco amoone?

³ Asheenaꞌo qamini boonoshi kashee yemeenooch boonoshi tuniyemmi gaawe mooyo amo gaata ta beeggemmi wottoon, ta shalligoona yaabeyaꞌa, ta ashittinoon woyinee uyoona emirikkoyich, yeexerittinoonoo yeshoyich ta mulloona qiicceho.

⁴ Aricheti meeti mooyinaꞌon tuniiho; ta qellich kexinaꞌon haggeho; woyinoonoo bechiyo.

⁵ Bechee mixinaꞌon bechaꞌa yanneto tuniiho. Ebi arooch aafeebeeti baribare mixinaꞌon bechiyo.

⁶ Ebi mixinaꞌon uchoyich aachi oppeenaꞌon iijjeho.

⁷ Guuninaꞌonaa gonneenaꞌonon kemeho; kexooch shiijjeti guuninaꞌoo taach beeheete; tayee aaf Yerusaalem beebee echetinaꞌoyee beshe miimon, bagoonaa emmishoonon hajjiyo.

⁸ Ta qellich aachoonaa birewoonon kiciyo; taateenaꞌonaa woraaferasheenaꞌona boonoshi gaannoon taach beshiiꞌi immiyeete. Shoddeebeeti anaaminaꞌonaa maacheenaꞌonon qannayiyo; ashoon emirikkiibeeti meeti naamacheenaꞌon kiciyo.

⁹ Ebina tayee aaf Yerusaalem beebee echetinaꞌo bulliyee beshoon oogeho. Andoo ta shalligoo ta waan manjiꞌi beetone.

¹⁰ Ta aafo ciinniꞌi qaatito bullin daneho; ta mulloyichoo emiroon bayaano taane; ta shuuneto bullina ta mullo emiriye; ebiyoo ta aayo bullichi gatiyoone.

¹¹ Ta shuuneti shuunoo bullin, shuunaa danoyichoo ta aajjeti aayo bullinoo gabaꞌa bulliyona duubo bi tunoon, yongoon yookkii dabboommo bi tunoonoo ariiho. Hini showee toommooch gaacechi amee mooyolla aalloone.

¹² Tawoo shalligoo, geyoonaa tuushoona amo gaata ariiya qaawiyo. Aafi taatoo tuniitoyee besh digeni taatoo amoon tuniyoon hakkehe?

¹³ Bekko manderoyee bi beshoommon shalligoo tuushoyee bi beshoon beeggeho.

¹⁴ Mullechi asho gommon ciinniꞌi shaꞌehe; tunebaani mullaallo manderoona shaꞌehe. Ebi tunetaa boonoshi gutti ciiro hajjaa shaahoo bi tunoon shalligiyo.

¹⁵ Aroochee ta mulloona “Mullaallo toommooch shaggiibeeto ta toommoochoo shaggemmone; ishigaata, ebi shaahoon mullecho ta tunee gaaco amoone?” iyo. Andoo ta mulloona “Ebiyoo duuboone” iyo.

¹⁶ Mullechi asho tuneba mullaalli asho bulli aaboon shalligee betaachemmone; waabeeti yemeenooch bulliyona batteyemmone. Wuche, wuche! Mullechoo mullaallo qitoommon bi qitemmo aabichireeshiye!

¹⁷ Hini showee toommooch tuneebeeti mooyo taan bi maggetoyich, kashoon shixxeho; bulliyona duubo, yongoon yookkii dabboommone.

¹⁸ Tayee gubb woyemmi ashoyich dufiichi hammemmo ta tunetoyich, hini showee toommoochaa ta aajjeto bullin shixxeho.

¹⁹ Ebi asho mullecho woyee mullaallo bi tunoon koni ariihe? Tunebaani hini showee toommoochaa ta aajjetonaa ta shalligoona ta daneto bullinochi toommooch doonjemmo biine; ebiyoo wotta duuboone.

²⁰ Ebich hini showee toommoochaa ta aajjeti aayo bullina ta gibenoon kuxxo.

²¹ Asho shalligoona, ariyoonaa acona bi aajjiti aayo bullin, bare asho bi aayaanoona bi emiremmoyich duppiichii hammii beetone. Ebiyoo duubo, gondeexi gonde mooyone.

²² Ashoo showee toommoochaa bi aajjiibeeti aayonaa yulloonoochee bi danemmi gaaco amoone?

²³ Bi yemeeno bullin bi shuunoo xuuxoonaa ayinoonane; xumoonona bi eengoo kashee qeyaanoone; ebiyoo wotta duuboone.

²⁴ Ashich mamonaa uyonoyee, bi shuuneti shuunoona emiroonoyee besh, gaawe mooyo aalloone. Ebiyoo Yeer waanee bi ichoon beeggeho.

²⁵ Bi daaggaanoon mamonaa emiroonon hakkemmo konine?

²⁶ Biin emirikkiibeeti ashoyich Yeeri shalligoon, ariyoonaa emiroonon immiye; tunebaani Yeeri biin shattii beetoyich bi immemmoyich, aajjiꞌi gaannoon kicoon axaaxechoyich immiye; ebiyoo duubo, yongoon yookkii dabboommone.